Read Besoa 1 Iohane 4 Bible Online

1 Iohane 4 - Besoa bible

1 Iohane 4

¹Halalu-halalu to kupokaꞌahiꞌ! Ineeꞌ mpuꞌuheꞌ nipoinálái upu-upu tauna to manguliꞌ kaꞌárána Inaona Pueꞌ Ala i hira. Nipáresáꞌheꞌ sieruꞌ, ba toꞌu-toꞌu mpuꞌuheꞌ hangko i Pueꞌ Ala ba tiꞌara, láwiꞌ iumbá-umbá peá, araheꞌ nabiꞌ to mepakanawoꞌ.

²Deꞌe to mopatongawaꞌákeꞌ heáná to nakuasaꞌi Inaona Pueꞌ Ala: upu-upu tauna to mopangákuꞌ kaꞌIesuna Datu Topehómpóꞌ to mewaliꞌ tauna,[16] hira miꞌi to napoánáꞌ Pueꞌ Ala.

³Upu-upu tauna to tiꞌaraheꞌ mopangákuꞌ kaꞌIesuna Datu Topehómpóꞌ, hira iti tiꞌaraheꞌ napoánáꞌ Pueꞌ Ala. Tauna iti nakuasaꞌiheꞌ inao to hangko i Ewálina Kerisitu.[17] Nihádi miꞌi paturoꞌ to manguliꞌ kaꞌina haweꞌna tauna to ara kuasaꞌna Ewálina Kerisitu, hai deꞌe-deꞌe haweꞌ miꞌi i duniáꞌ.

⁴Agáiáná kómu ánáꞌkuꞌ, napoánáꞌmokou Pueꞌ Ala, hai ninangimoheꞌ nabiꞌ-nabiꞌ to mepakanawoꞌ iti, láwiꞌ melumbuꞌ kuasaꞌna Inao to Magasaꞌ to ara i lalumi hangko i kuasaꞌna to ara i laluraꞌ tauna to tiꞌara mepoinálái i Pueꞌ.

⁵Upu-upu nabiꞌ to mepakanawoꞌ iti, hangko i duniáꞌ to kadake, onoꞌ miꞌi haneꞌi paturoꞌraꞌ mesupaꞌ woꞌo hangko i duniáꞌ to kadake. Hai tauna to tiꞌaraheꞌ mepoinálái i Pueꞌ, hira to mampehádingi hai mampeuláꞌi paturoꞌraꞌ.

⁶Agáiáná kitaꞌ, halalu-halalu, napoánáꞌmokeꞌ Pueꞌ Ala. Heáná tauna to moisá Pueꞌ Ala, ia miꞌi to mampehádingi hai mampeuláꞌi paturoꞌkiꞌ. Heáná tauna to tiꞌara napoánáꞌ Pueꞌ Ala, tiꞌara mampeuláꞌi paturoꞌkiꞌ. Iti to mopatongawaꞌákeꞌ heáná to nakuasaꞌi Inaona Pueꞌ Ala to mopahaweꞌ paturoꞌ to toꞌu, hai heáná to nakuasaꞌi to mepakanawoꞌ.

⁷Halalu-halalu to kupokaꞌahiꞌ! Hangaa-ngaa mombepokaꞌahiꞌkeꞌ hadua hai hadua, láwiꞌ kamaꞌahiꞌ iti mentóáꞌ hangko i Pueꞌ Ala. Upu-upu tauna to mampokaꞌahiꞌ hángká rángáraꞌ, hira to napoánáꞌ Pueꞌ Ala hai moisámoheꞌ Pueꞌ Ala.

⁸Tauna to tiꞌara mampokaꞌahiꞌ hángká rángáraꞌ, tiꞌara maniheꞌ moisá Pueꞌ Ala, láwiꞌ Pueꞌ Ala ia miꞌi ahiꞌ.

⁹Hai deꞌe miꞌi rárána Pueꞌ Ala mopatongawaꞌ ahiꞌNa i kitaꞌ: ÁnáꞌNa to HaduduáNa Nahuoꞌ mai i duniáꞌ, bona kitaꞌ molámbiꞌkeꞌ katueꞌ hangko i Hia.[18]

¹⁰Deꞌe miꞌi to rauliꞌ ahiꞌ: tiꞌara kitaꞌ to rungu-runguna mampokaꞌahiꞌ Pueꞌ Ala, agáiáná Pueꞌ Ala riꞌi to rungu-runguna mampokaꞌahiꞌkeꞌ, álána Nahuoꞌ mai ÁnáꞌNa mosulewátáikeꞌ bona dósántaꞌ peisá teámpungi.

¹¹Halalu-halalu to kupokaꞌahiꞌ. Láwiꞌ Pueꞌ Ala maꞌahiꞌ i kitaꞌ, onoꞌ miꞌi haneꞌi hangaa-ngaa mombepokaꞌahiꞌkeꞌ woꞌo hadua hai hadua.

¹²Tiꞌara mani ara haweꞌ hadua to moita Pueꞌ Ala. Agáiáná kehapiꞌ noꞌonoꞌ, ane mombepokaꞌahiꞌkeꞌ hadua hai hadua, Pueꞌ Ala mohintuwuꞌ oaꞌ hai kitaꞌ, hai ahiꞌNa i lalu katueꞌtaꞌ tetámbái oaꞌ duuꞌna tiꞌara piꞌi ara kamakuraꞌna.

¹³Taisá kahintuwuꞌtaꞌ miꞌi hai Pueꞌ Ala, hai Pueꞌ Ala woꞌo mohintuwuꞌ hai kitaꞌ, láwiꞌ Napoweꞌikeꞌ Inao to Magasaꞌ.

¹⁴Kaiꞌ to mewaliꞌ suroNa, kiꞌita miꞌi Ánáꞌna Pueꞌ Ala, hai kisabiki miꞌi kaꞌIana to nahuoꞌ mai Pueꞌ Ala Umántaꞌ mewaliꞌ Topohómpóꞌ Salaꞌ tauna i duniáꞌ deꞌe.

¹⁵Heáná peá to mopangákuꞌ kaꞌIesuna Ánáꞌna Pueꞌ Ala, Pueꞌ Ala mohintuwuꞌ oaꞌ hai ia, hai ia woꞌo mohintuwuꞌ oaꞌ hai Pueꞌ Ala.

¹⁶Onoꞌ haneꞌi tahádiá kamaꞌahiꞌna Pueꞌ Ala i katueꞌtaꞌ hai mehárungákeꞌ i kamaꞌahiꞌNa i kitaꞌ. Pueꞌ Ala ia miꞌi ahiꞌ. Mewaliꞌ heáná to mampokaꞌahiꞌ oaꞌ hángká rángána, ia miꞌi to mohintuwuꞌ hai Pueꞌ Ala, hai Pueꞌ Ala mohintuwuꞌ hai ia.

¹⁷Ane mampokaꞌahiꞌkeꞌ hángká rángántaꞌ, iti miꞌi tandaꞌna mampokaꞌahiꞌkeꞌ Pueꞌ Ala, hai tiꞌarakeꞌ ina malááꞌ mampombelindoꞌá Pueꞌ Ala i alo pobutusi i kahópóꞌána duniáꞌ. Ina pebáiꞌkeꞌ mampombelindoꞌá Pueꞌ Ala,[19] láwiꞌ i duniáꞌ deꞌe, kitaꞌ mohintuwuꞌmokeꞌ hai Pueꞌ Ala hibali hai Kerisitu.[20]

¹⁸Ane taisá ntepuꞌu kamaꞌahiꞌna Pueꞌ Ala i kitaꞌ, tiꞌarapokeꞌ paraluu malááꞌ i Pueꞌ Ala. Ánti kamaꞌahiꞌNa to tiꞌara ara kamakuraꞌna, onoꞌ miꞌi haneꞌi tiꞌarapokeꞌ malááꞌ. Ane tapokalááꞌ mani kaꞌina nahukuntaꞌ Pueꞌ Ala, lempóna, tiꞌara manikeꞌ moisá ahiꞌNa i kitaꞌ.

¹⁹Kitaꞌ mampokaꞌahiꞌkeꞌ Pueꞌ Ala hai halalu hampepepoináláintaꞌ, láwiꞌ Pueꞌ Ala miꞌi to rungu-runguna mampokaꞌahiꞌkeꞌ.

²⁰Heáná to manguliꞌ, “Kupokaꞌahiꞌ Pueꞌ Ala,” agáiáná tiꞌara mampokaꞌahiꞌ halalu hampepepoináláina, ia modongkoꞌ, láwiꞌ ane ia tiꞌara mampokaꞌahiꞌ halaluna to naita, apa mani Pueꞌ Ala to tiꞌara naita.

²¹Mewaliꞌ, deꞌe miꞌi hawaꞌna Pueꞌ i kitaꞌ: heáná to mampokaꞌahiꞌ Pueꞌ Ala, hangaa-ngaa mampokaꞌahiꞌ woꞌo hángká rángána.