Read Besoa 1 Iohane 5 Bible Online

1 Iohane 5 - Besoa bible

1 Iohane 5

¹Upu-upu tauna to mampoinálái kaꞌIesuna Datu Topehómpóꞌ, hira miꞌi to napoánáꞌ Pueꞌ Ala. Hai heáná to mampokaꞌahiꞌ Pueꞌ Ala Umántaꞌ, bateꞌna mampokaꞌahiꞌ woꞌo upu-upu tauna to napoánáꞌ Pueꞌ Ala.

²Ane tapokaꞌahiꞌ Pueꞌ Ala hai tapeuláꞌi hawaꞌNa, lempóna mampokaꞌahiꞌkeꞌ woꞌo tauna to napoánáꞌ Pueꞌ Ala,

³láwiꞌ ane tapokaꞌahiꞌ Pueꞌ Ala, lempóna mampeuláꞌikeꞌ hawaꞌNa. Hai hawaꞌNa iti tiꞌara maꞌángkárá tapeuláꞌi,

⁴láwiꞌ upu-upu tauna to napoánáꞌ Pueꞌ Ala monangiheꞌ upu-upu to kadake i duniáꞌ deꞌe. Ánti pepoináláintaꞌ, monangikeꞌ upu-upu to kadake.

⁵Heáná to monangi upu-upu to kadake i duniáꞌ deꞌe? Bateꞌna peá tauna to mampoinálái kaꞌIesuna Ánáꞌna Pueꞌ Ala.

⁶Iesu Kerisitu ia miꞌi Ánáꞌna Pueꞌ Ala to mai i duniáꞌ. Ia rariu hai rapapate.[21] Mewaliꞌ, kamaiNa i duniáꞌ deꞌe, tiꞌara peá bona rariu, agáiáná bona rapapate woꞌo.[22] Hai Inao to Magasaꞌ mopakanótó kaꞌIesuna Ánáꞌna Pueꞌ Ala, hai apa to nauliꞌ Inao to Magasaꞌ iti, bateꞌna toꞌu.

⁷Mewaliꞌ, ara tálu pákáꞌna to mopakanótóákeꞌ kaꞌIesuna Ánáꞌna Pueꞌ Ala: Inao to Magasaꞌ, uwai to rariuá, hai waheꞌna Iesu i kamateNa. [Ara tálu pákáꞌna i surugáꞌ to mopakanótóákeꞌ kaꞌIesuna Ánáꞌna Pueꞌ Ala: Umaꞌ, Ngkóráꞌ,[23] hai Inao to Magasaꞌ; hai ara woꞌo tálu pákáꞌna sabiꞌ i duniáꞌ: Inao, uwai hai waheꞌ.][24] To tálu pákáꞌna iti hibali tunggáiána: mopakanótóákeꞌ kaꞌIana Ánáꞌna Pueꞌ Ala.

⁹Mewaliꞌ ane tapoinálái polaluitaraꞌ tauna, pelumbuꞌna mani polaluitana Pueꞌ Ala, láwiꞌ Ia mampolaluita kana i ÁnáꞌNa.[25]

¹⁰Tauna to mepoinálái i Ánáꞌna Pueꞌ Ala, raisá i laluraꞌ katoꞌuna polaluitana Pueꞌ Ala. Heáná peá to tiꞌara mepoinálái i Pueꞌ Ala, lempóna mampopodongkoꞌmoheꞌ Pueꞌ Ala, láwiꞌ tiꞌaraheꞌ mampoinálái laluitaNa mokana i ÁnáꞌNa.

¹¹Deꞌe miꞌi laluitana Pueꞌ Ala: Ia mampoweꞌikeꞌ katueꞌ to maroꞌa to tiꞌara mokahópóꞌá, hai katueꞌ iti talámbiꞌ ánti pohintuwuꞌtaꞌ hai ÁnáꞌNa.

¹²Heáná peá to mohintuwuꞌ hai ÁnáꞌNa, hira miꞌi to molámbiꞌ katueꞌ to maroꞌa to tiꞌara mokahópóꞌá, hai heáná to tiꞌara mohintuwuꞌ hai ÁnáꞌNa, tiꞌaraheꞌ molámbiꞌ katueꞌ to maroꞌa iti.

¹³Sura deꞌe kuꞌukiꞌákou to mepoinálái i Ánáꞌna Pueꞌ Ala, bona niꞌisá ntepuꞌu kamolámbiꞌmi miꞌi katueꞌ to maroꞌa to tiꞌara mokahópóꞌá.

¹⁴Pebáiꞌkeꞌ mekakae i Pueꞌ Ala, láwiꞌ taisá kaꞌina Napehádingina pembiáꞌtaꞌ, asalaꞌ apa to tapembiáꞌ iti hiolaꞌ hai peundeꞌáNa.

¹⁵Hai ane taisá kaNapehádingina pembiáꞌtaꞌ, manótó taisá woꞌo kamolámbiꞌtaꞌ miꞌi apa to tapembiáꞌ i Hia.

¹⁶Ane niꞌita hadua halalumi to mobábehi dósá to tiꞌara moánti i kapate, hangaa-ngaa nipekakaeá bona Pueꞌ Ala mampoweꞌi katueꞌ. Tauna to kutunggái iti ia miꞌi tauna to mobábehi dósá to tiꞌara moántiheꞌ i kapate. Agáiáná ara woꞌo dósá to moánti tauna i kapate, ia miꞌi to mogáákiheꞌ hangko i Pueꞌ Ala.[26] Tiꞌarakou kuhuoꞌ mampekakaeáheꞌ to mobábehi dósá iti.[27]

¹⁷Upu-upu bábehiá to kadake, bateꞌna dósá. Agáiáná ara dósá to tiꞌarakeꞌ moánti i kapate.

¹⁸Taisá, upu-upu tauna to napoánáꞌ Pueꞌ Ala, tiꞌaraheꞌ mobábehi oaꞌ dósá, láwiꞌ nakámpáiheꞌ Ánáꞌna Pueꞌ Ala. Onoꞌ miꞌi haneꞌi tiꞌaraheꞌ peisá napopoapa Datu Tokadake.

¹⁹Taisá, kitaꞌ deꞌe napoánáꞌmokeꞌ Pueꞌ Ala, hai upu-upu duniáꞌ deꞌe nakuasaꞌi Datu Tokadake.

²⁰Taisá woꞌo, haweꞌ miꞌi Ánáꞌna Pueꞌ Ala i duniáꞌ, hai Ia to mampoweꞌikeꞌ kanótó lalu bona moisákeꞌ Pueꞌ Ala to toꞌu. Mohintuwuꞌmokeꞌ hai Pueꞌ Ala to toꞌu ánti pohintuwuꞌtaꞌ hai Iesu Kerisitu ÁnáꞌNa. Ia miꞌi Pueꞌ Ala to toꞌu. Hangko i Hia talámbiꞌ miꞌi katueꞌ to maroꞌa to tiꞌara mokahópóꞌá.

²¹Ánáꞌkuꞌ, maingáꞌ-ingáꞌkou. Ineeꞌkou mampenómbái apa peá to ara i duniáꞌ deꞌe, bateꞌmi peá menómbá i Pueꞌ Ala. Hangko i kódóꞌ, IOHANE