Read Besoa Iudasiꞌ 1 Bible Online

Iudasiꞌ 1 - Besoa bible

Iudasiꞌ 1

¹Molámbiꞌ toSarani i kaꞌaraꞌámi Sura deꞌe hangko i kódóꞌ Iudasiꞌ ádina Iakobu[1] hai huoꞌána Iesu Kerisitu. Kupakatu sura deꞌe i kómu halalu hampepepoinálái to napileꞌi Pueꞌ Ala Umántaꞌ mewaliꞌ taunáNa. Pueꞌ Ala mampokaꞌahiꞌkou, hai Iesu Kerisitu ina mokámpáikou oaꞌ duuꞌna kaꞌina haweꞌNa huleꞌ.

²Kupembiáꞌ i Pueꞌ Ala bona mampoweꞌikou handaꞌ pewátiꞌ, roꞌa ngkatueꞌ hai ahiꞌNa.

³Halalu-halalu to kupokaꞌahiꞌ! Rungu-runguna kupoinao ntepuꞌu mampoukiꞌákou sura deꞌe, bona kupahaweꞌákou kana i katehómpóꞌ to hangko i Pueꞌ Ala i kitaꞌ, to tatarima miꞌi sangkani. Agáiáná tebáliki pekiringkuꞌ moukiꞌ mokana iti, onoꞌ miꞌi haneꞌi kuꞌukiꞌákou bona nipakaróhó pepoináláimi i paturoꞌ to toꞌu to tiꞌara peisá rabáliki. Paturoꞌ iti rapahaweꞌ miꞌi i upu-upu tauna to mewaliꞌ taunána Pueꞌ Ala.

⁴Kuꞌukiꞌ upu-upu deꞌe láwiꞌ araheꞌ tauna to menggalo i oloꞌmi to moánti paturoꞌ to salaꞌ. Rauliꞌ tauna iti toSaraniheꞌ, agáiáná katoꞌuána tiꞌaraheꞌ mengkoruꞌ i Pueꞌ Ala. Tongawaꞌ katiꞌáráraꞌ mengkoruꞌ i Pueꞌ Ala, láwiꞌ mampopobunduꞌraheꞌ kamaroꞌana Pueꞌ Ala bona mobábehiheꞌ bábehiá to kadake. Salaꞌ ntepuꞌuheꞌ, láwiꞌ mosápuákaheꞌ Pueꞌtaꞌ Iesu Kerisitu to makuasaꞌ mopárentákeꞌ. Tiꞌaraheꞌ mengkoruꞌ i Hia, mole Ia peá to hintotoꞌ tapengkoruꞌi. Tauna to mepakanawoꞌ iti, ina rahukuheꞌ, hai hukuraꞌ iti napakanótó miꞌi ami Pueꞌ Ala.

⁵Halalu-halalu, kehapiꞌ niꞌisá miꞌi upu-upu to kuhángáꞌáꞌákou deꞌe, kupoinao kupopaingáꞌákou huleꞌ noumbá pehukuna Pueꞌ Ala i tauna to kadake bábehiáraꞌ. Hangkoia Pueꞌ Ala mokábáháheꞌ toSáráeliꞌ hangko i karapohawiꞌraꞌ i tampoꞌ Másiriꞌ. Agáiáná roo onoꞌ, araheꞌ to tiꞌara mepoinálái, mewaliꞌ tauna iti Napapateheꞌ i pádá loriꞌ.[2]

⁶Niꞌisá miꞌi woꞌo mokana i malaꞌeka to toroꞌ i surugáꞌ. Hangkoia hantángáꞌheꞌ tiꞌara mampogáná mampopolumao bágóꞌ to naweꞌiheꞌ Pueꞌ Ala, onoꞌ miꞌi haneꞌi pohuꞌheꞌ mopálehi katoroꞌáraꞌ to i surugáꞌ.[3] Malaꞌeka iti natimpukumoheꞌ Pueꞌ Ala hai rante to maróhó ntepuꞌu, hai Natahaheꞌ i lalu katoroꞌá to makáindi, duuꞌna haweꞌ tempóna upu-upu kara-kara ina rahoda-hoda i alo pobutusi.

⁷Noꞌonoꞌ woꞌo tauna to toroꞌ i kótá Sodomo hai Gumora hangkoia, hai kótá-kótá ntániꞌna to hungkuꞌ ionoꞌ, molámbiꞌheꞌ woꞌo pehuku láwiꞌ bábehiáraꞌ kadake ntepuꞌu. Mebualosiheꞌ, mobábehiheꞌ bábehiá to metitidiꞌi, hai handaꞌ mani bábehiáraꞌ to meriringkuꞌi. Onoꞌ miꞌi haneꞌi kótáraꞌ rahunu, hai upu-upu tauna rapatuna.[4] Pehukuna Pueꞌ Ala i toSodomo hai toGumora iti mewaliꞌ pepaingáꞌi i upu-upu tauna, láwiꞌ upu-upu tauna to kadake bábehiáraꞌ ina rahuku i lalu api to roreꞌ oaꞌ to tiꞌara mokahópóꞌá.

⁸Noꞌonoꞌ woꞌo deꞌe-deꞌe, ara mani tauna i oloꞌmi to mampekiri peheꞌ oaꞌ bábehiá to kadake. Taunaheꞌ iti manguliꞌ ara to rapatongawaꞌáheꞌ moliu patururaꞌ, onoꞌ miꞌi haneꞌi tediiꞌ oaꞌ laluraꞌ i paturoꞌ to salaꞌ, álána mopakadake peheꞌ wátáraꞌ haduduáraꞌ. Mosápuákaheꞌ woꞌo kuasaꞌna Pueꞌ Ala, hai mosasalaꞌiheꞌ upu-upu malaꞌeka to makuasaꞌ i surugáꞌ.[5]

⁹Tiꞌaraheꞌ hibali hai Mikaeli, hadua malaꞌeka to motadulakoi upu-upu malaꞌeka. Ia tiꞌara pebáiꞌ mopakeꞌ kuasaꞌna mosalaꞌi Datu Tokadake i tempóraꞌ mamposisalaꞌi wátámandoꞌna nabiꞌ Musa, ba heáná to ina moala,[6] agáiáná nahángáꞌá peá Mikaeli, “Kupembiáꞌ bona Pueꞌ haduduáNa to ina mokambáróákoꞌ!”

¹⁰Agáiáná tauna to mepakanawoꞌ iti, mosasalaꞌi peheꞌ upu-upu to tiꞌara raisá. Tauna iti nodo peheꞌ pekiri binataꞌ, láwiꞌ mouláꞌ peheꞌ peundeꞌána laluraꞌ haduduáraꞌ, tiꞌarantoheꞌ mampekiri ba maroꞌai ba tiꞌara. Hai ánti bábehiáraꞌ to noꞌonoꞌ, onoꞌ miꞌi haneꞌi ina molámbiꞌheꞌ pehuku.

¹¹Hurewuꞌmoheꞌ, láwiꞌ mampeuláꞌi peheꞌ bábehiána Kaiꞌ[7] hangkoia, hai mampoinao peheꞌ molámbiꞌ porasiꞌáraꞌ moliu bábehiáraꞌ to salaꞌ hibali hai Bilea.[8] Moewaꞌheꞌ Pueꞌ Ala nodo Kora hangkoia, hai bateꞌna ina naropuꞌheꞌ Pueꞌ Ala nodo Kora.[9]

¹²I tempómi moromu-romu mandeꞌ, tauna to mepakanawoꞌ iti mandeꞌheꞌ hingkakani hai kómu nodoheꞌ woꞌo halalumi, agáiáná mepakahiliá ntepuꞌu bábehiáraꞌ,[10] mehioroꞌheꞌ hai mampekiri peheꞌ wátáraꞌ haduduáraꞌ. Taunaheꞌ iti tiꞌara mobunduꞌ. Hira nodo peheꞌ gawu to naꞌánti wui, agáiáná tiꞌara mopaꞌara udá. Hira nodoheꞌ kau to tiꞌara mowuaꞌ i tempó powuaꞌána. Hai nodoheꞌ woꞌo kau to raháká hante kálándána, to tiꞌara piꞌi ina tueꞌ.

¹³Hira nodo peheꞌ bálumbá tahiꞌ to rumihi to mobireꞌ,[11] láwiꞌ mobábehiheꞌ bábehiá to mepakahiliá peá. Hira nodo peheꞌ betue to tiꞌara manótó polumaoána. Pueꞌ Ala mopatimamaꞌámoheꞌ katoroꞌá to makáindi ntepuꞌu. Ina rahukuheꞌ ionoꞌ duuꞌna i rue-ruena.

¹⁴Ara laluitana nabiꞌ Henoꞌ hangkoia mokana i pehukuna Pueꞌ Ala i tauna to mepakanawoꞌ to toroꞌ tempó deꞌe. Henoꞌ iti ia miꞌi pemuleꞌána Adama to kapituna lápina.[12] Nauliꞌ node: “Toꞌu ntepuꞌu to kuhángáꞌáꞌákou deꞌe: Pueꞌ ina haweꞌ hingkakani hai malaꞌekaNa[13] to magasaꞌ to i sábuna kahandaꞌraꞌ.

¹⁵Ia ina haweꞌ bona mobutusi kárá-káráraꞌ upu-upu tauna, hai ina mohuku upu-upu tauna to tiꞌara mengkoruꞌ i Hia. Ina tongawaꞌ katiꞌáráraꞌ mengkoruꞌ, láwiꞌ mobábehiheꞌ bábehiá to kadake, hai mosápuákaheꞌ Pueꞌ Ala moliu polaluitaraꞌ.”[14]

¹⁶Taunaheꞌ iti, tiꞌaraheꞌ mamporái: mohume-humeheꞌ oaꞌ Pueꞌ Ala hai mosalaꞌiheꞌ tauna ntániꞌna. Mampeuláꞌi peheꞌ peundeꞌána laluraꞌ haduduáraꞌ, mopalóngkáheꞌ hai raundeꞌ meoreꞌ-oreꞌ mopamalulu laluraꞌ tauna bona molámbiꞌheꞌ rasiꞌ.

¹⁷Agáiáná kómu halalu-halalu to kupokaꞌahiꞌ, hangaa-ngaa nibuhinao apa to rapahaweꞌ miꞌi surona Pueꞌtaꞌ Iesu Kerisitu.

¹⁸To rapahaweꞌákou ia miꞌi: “Ane hungkuꞌ miꞌi tempó to kahópóꞌána, ina araheꞌ tauna to ina mampopowadi-wadi pepoináláintaꞌ. Ina mouláꞌ peheꞌ peundeꞌána laluraꞌ haduduáraꞌ, hai tiꞌaraheꞌ mengkoruꞌ i Pueꞌ Ala.”

¹⁹Hira iti iamoheꞌ tauna to mopaꞌaraheꞌ posisalaꞌ i oloꞌmi. Tiꞌaraheꞌ nakuasaꞌi Inao to Magasaꞌ, agáiáná nakuasaꞌiraheꞌ peundeꞌána laluraꞌ haduduáraꞌ to tiꞌara hiolaꞌ hai peundeꞌána Pueꞌ Ala.

²⁰Agáiáná kómu halalu-halalu to kupokaꞌahiꞌ! Pueꞌ Ala mampokaꞌahiꞌkou. Mewaliꞌ hangaa-ngaa nibuhinao oaꞌ kamaꞌahiꞌNa iti. Mekakaekou oaꞌ mouláꞌ peteteꞌna Inao to Magasaꞌ. Nipakaróhó pepoináláimi to magasaꞌ, bona pepoináláimi iti mewaliꞌ ntóáꞌna katueꞌmi. Hai mehárungákou oaꞌ i kaꞌina molámbiꞌmi katueꞌ to maroꞌa to tiꞌara mokahópóꞌá i kahaweꞌáNa huleꞌ Pueꞌtaꞌ Iesu Kerisitu. Mahile ahiꞌNa i kómu.

²¹

²²Ane araheꞌ tauna i oloꞌmi to bata-bata mani pepoináláiraꞌ, nipokaꞌahiꞌheꞌ wohiraꞌá.

²³Ane araheꞌ to mosuliꞌ hangko i pepoináláiraꞌ, nitulungiheꞌ hai nipaturoꞌheꞌ bona mesuleꞌheꞌ huleꞌ hai molámbiꞌheꞌ katehómpóꞌ. Ane nibábehiꞌi noꞌonoꞌ, ina tehómpókiheꞌ hangko i pehuku nodo tauna to rahore hangko i lalu naraka.[15] Agáiáná araheꞌ woꞌo tauna to rumihi kamadósáraꞌ, to mouláꞌ peheꞌ peundeꞌána laluraꞌ to kadake. Nipokaꞌahiꞌheꞌ wohiraꞌá, agáiáná maingáꞌ-ingáꞌkou bona tiꞌarakou maꞌala raꞌánti i lalu dósáraꞌ. Nipokaꞌahiꞌheꞌ tauna to madósá, agáiáná nikaraohi bábehiáraꞌ to kadake, bona tiꞌarakou woꞌo mampeuláꞌi bábehiáraꞌ to metitidiꞌi.[16]

²⁴Nitóiá miꞌi Pueꞌ Ala láwiꞌ Ia peá to makuasaꞌ mokámpáikou bona tiꞌarakou manawoꞌ i lalu dósá, hai Ia ina mekádipurá oaꞌ bona peisákou meángkáꞌ i lindoꞌNa hai moita peawaꞌNa. Tiꞌara piꞌi ara kamasalaꞌmi i peitáNa, hai ina góeꞌ lalumi.

²⁵Pueꞌ Ala, tiꞌara ara kahibaliáNa. Ia to mohómpókikeꞌ hangko i huku dósántaꞌ moliu bábehiána Pueꞌtaꞌ Iesu Kerisitu. Tapomahile hangaꞌNa láwiꞌ Ia peá to meawaꞌ, to mahile tueꞌNa, hai to makuasaꞌ. Hai Ia to hintotoꞌ mepárentá, hangko i rungu-runguna, duuꞌna deꞌe-deꞌe, hai haweꞌ i rue-ruena. Ami! Hangko i kódóꞌ, IUDASIꞌ