Read Besoa Pampetudeꞌá 1 Bible Online

Pampetudeꞌá 1 - Besoa bible

Pampetudeꞌá 1

¹I lalu sura deꞌe, moliu pampetudeꞌána Iesu Kerisitu, Pueꞌ Ala mopahaweꞌ i kitaꞌ huoꞌáNa apa to hangaa-ngaa hawiáꞌ mewaliꞌ. Iesu mohuoꞌ malaꞌekaNa lao mampetudeꞌá upu-upuna iti i kódóꞌ Iohane, huoꞌáNa.

²Kódóꞌ miꞌi to moukiꞌ upu-upu to kuita iti bona kupahaweꞌákou ngkóráꞌna Pueꞌ Ala hai apa to natudeꞌáꞌaꞌ Iesu Kerisitu.

³Morasiꞌheꞌ tauna to mobásá sura deꞌe to mopahaweꞌ apa to ina mewaliꞌ, hai morasiꞌheꞌ woꞌo tauna to mampehádingi hai mampeuláꞌi apa to teukiꞌ i lalu sura deꞌe, láwiꞌ tiꞌara piꞌi marue upu-upuna deꞌe hangaa-ngaa mewaliꞌ.

⁴Sura deꞌe to hangko i kódóꞌ Iohane, kupakatuáheꞌ toSarani to toroꞌ i pitu wuaꞌna kótá to ara i poropensi Asia. Kupembiáꞌ bona Pueꞌ Ala mowátiꞌkou hangko i kabulána laluNa hai moweꞌikou roꞌa ngkatueꞌ. Kupembiáꞌ bona nilámbiꞌ pewátiꞌ deꞌe hangko i Pueꞌ Ala to ara miꞌi ami hangko i rungu-runguna, to ara deꞌe-deꞌe, hai to ina ara duuꞌna i rue-ruena. Pewátiꞌ deꞌe nilámbiꞌ woꞌo hangko i Inaona Pueꞌ Ala to mampopolumao pitu pákáꞌna bágóꞌ,[1] to ara i lindoꞌna pehodaꞌá kadatuána Pueꞌ Ala,

⁵hai hangko i Iesu Kerisitu to rungu-runguna rapopearó hangko i oloꞌraꞌ tauna to mate. Iesu Kerisitu ia miꞌi Sabiꞌ to manguliꞌ oaꞌ apa to toꞌu, hai Ia miꞌi Tadulako to mopárentái upu-upu datu i duniáꞌ. Iesu mampokaꞌahiꞌkeꞌ, hai mampehuhuꞌá wátáNa rapapate bona tekábáhákeꞌ hangko i dósá,

⁶hai Napopewaliꞌkeꞌ taunáNa i lalu popárentáꞌáNa. Napopewaliꞌmokeꞌ nodo tadulako menómbá i Pueꞌ Ala, UmáNa.[2] Iesu Kerisitu miꞌi to meawaꞌ tueꞌNa hai to makuasaꞌ duuꞌna i rue-ruena. Ami!

⁷Nipeita rái! Ane Iesu haweꞌ mai napótóꞌ gawu,[3] upu-upu tauna ina moita, haweꞌ-haweꞌ i tauna to motohuꞌ lompena Iesu hangkoia. Hai upu-upu tauna i duniáꞌ {to tiꞌara mepoinálái} ina teriaꞌheꞌ ánti kaꞌIana.[4] Iti to ina mewaliꞌ! Ami!

⁸Nauliꞌ Pueꞌ Ala, “Kódóꞌ miꞌi deꞌe Alpa hai Omega.[5] Kódóꞌ miꞌi pantepuꞌuána hai kahópóꞌána. AraMoꞌ ami hangko i rungu-runguna, araꞌAꞌ deꞌe-deꞌe, hai bateꞌna ina araꞌAꞌ oaꞌ duuꞌna i rue-ruena. Mahile kuasaꞌKuꞌ hangko i upu-upuna.”

⁹Kódóꞌ deꞌe Iohane halalu hampepepoináláimi. Hibali karapopeahiahiꞌtaꞌ, hibali kamolámbiꞌtaꞌ gáláꞌtaꞌ i lalu popárentána Pueꞌ Ala, hai hibali woꞌo kasabaraꞌtaꞌ mantódihá pepopeahiahiꞌ iti ánti peuláꞌtaꞌ i Iesu. Ane kódóꞌ deꞌe, ratibeaꞌ i puló to rahangaꞌ Patmos láwiꞌ mopahaweꞌaꞌ ngkóráꞌna Pueꞌ Ala hai mosabikiaꞌ mokana i Iesu.

¹⁰I alo penómbáꞌá, nakuasaꞌiaꞌ Inao to Magasaꞌ, hai kuhádi wambaꞌ i taleuꞌkuꞌ. Masimbuku ntepuꞌu wambaꞌ iti, nodo pokániꞌ tamburuꞌ.

¹¹Nahángáꞌáꞌáꞌaꞌ node: “Apa to nuita, nuꞌukiꞌ miꞌi i lalu sura hai nupakatuáheꞌ jemaꞌa to pitu to ara i kótá Epesu, Simirina, Pegamu, Tiatira, Saridi, Piladepia hai Laodikia.”[6]

¹²Mehaileꞌaꞌ i taleuꞌkuꞌ bona kuita heáná to molaluita i kódóꞌ, hai kuita pamboliá huluꞌ to pitu wuaꞌna to rabábehi hangko i buláwá.

¹³I oloꞌna pamboliá huluꞌ iti, kuita hadua tauna, lenggeꞌNa nodo Ánáꞌ Mánusiá.[7] Kamalóena kumbáNa haweꞌ i bitiNa, hai pondáNa nawewehi pampou buláwá.

¹⁴WuáꞌNa hai weluáꞌNa bulá mengkilaꞌ nodo kakawuꞌ. MátáNa mewangkaꞌ nodo roreꞌ api.[8]

¹⁵BitiNa mengkilaꞌ nodo tembaga to hangko rahowu i lalu roreꞌ api. WambaꞌNa masimbuku ntepuꞌu nodo uwai to mewoo.

¹⁶Tae kuánáNa motibaaꞌ pitu wuaꞌna betue, hai hangko i ngángáNa mesuwuꞌ hamata pihoꞌ to mataru to momata potimbali. LindoꞌNa mewangkaꞌ nodo pewangkaꞌna alo.

¹⁷KakuitáNa, kásáliu mopalumbáꞌaꞌ i bitiNa, nodoaꞌ tauna to mate. Hangko ionoꞌ, Napágá wátángkuꞌ hai tae kuánáNa, Nahángáꞌáꞌáꞌaꞌ, “Ineeꞌkoꞌ malááꞌ. Kódóꞌ miꞌi deꞌe to Pantepuꞌuána hai to Kahópóꞌána.

¹⁸Kódóꞌ miꞌi to tueꞌ. MateAꞌ hangkoia, agáiáná peita, Kódóꞌ tueꞌMoꞌ huleꞌ, hai ina tueꞌAꞌ oaꞌ duuꞌna i rue-ruena. Kódóꞌ to mopakanótó impirá tauna ina mate hai heáná to ina lao i katoroꞌá tomate.[9]

¹⁹Mewaliꞌ, deꞌe-deꞌe hangaa-ngaa nuꞌukiꞌ apa to nuita ininá, apa to mewaliꞌ i tempó deꞌe, hai apa to ina mewaliꞌ upu deꞌe.

²⁰Ane pitu wuaꞌna betue to nuita i tae kuánáNgkuꞌ hai pamboliá huluꞌ buláwá to pitu wuaꞌna, tiꞌara mani nuisá lempóna. Mewaliꞌ, ina Kupakanótóákoꞌ: betue to pitu wuaꞌna iti, ia miꞌi tadulako to mokádipurá pitu jemaꞌa,[10] hai pamboliá huluꞌ to pitu wuaꞌna iti, ia miꞌi jemaꞌa to pitu.”