Read Besoa Pampetudeꞌá 14 Bible Online

Pampetudeꞌá 14 - Besoa bible

Pampetudeꞌá 14

¹Roo onoꞌ, kuita Iesu to rapándiriꞌ nodo Ánáꞌ Dimbá meángkáꞌ i wongko Buluꞌ Sio i Ierusale hingkakani hai topeuláꞌNa to hangatu iba puloꞌraꞌ hai iba sáburaꞌ.[95] I kireraꞌ, teukiꞌ hangaꞌna Ánáꞌ Dimbá hai hangaꞌna UmáNa.

²Hai kuhádi pokániꞌ to rumihi hangko i surugáꞌ, nodo pewoo uwai to mahile, hai nodo pokániꞌ gumpataꞌ. Pokániꞌ to kuhádi iti, nodo woꞌo pokániꞌ kasapi to rakáwiꞌ tauna.

³Monaniheꞌ hampákáꞌ nani to woꞌu i lindoꞌ pehodaꞌá kadatuána Pueꞌ Ala hai i lindoꞌraꞌ pinatueꞌ to iba hai totosae to motolelingiheꞌ pehodaꞌá datu iti.[96] Naniraꞌ iti, tiꞌara haweꞌ hadua tauna to nabuku mampegurui, bateꞌraꞌ peá to hangatu iba puloꞌraꞌ hai iba sáburaꞌ tauna iti. Hangko i oloꞌraꞌ tauna i duniáꞌ, hira miꞌi to nahómpóki Ánáꞌ Dimbá hangko i huku dósáraꞌ.

⁴Magasaꞌ katueꞌraꞌ nodoheꞌ to tiꞌara haweꞌ hangkani mobábehi salaꞌ hai towawine.[97] Iumbá kalaoána Ánáꞌ Dimbá, ionoꞌheꞌ woꞌo meuláꞌ. Hira to Nahómpóki Ánáꞌ Dimbá iti hangko i oloꞌraꞌ upu-upu tauna i duniáꞌ. Nodo tauna mohuhuꞌ wuaꞌ to rungu-runguna hangko i tudaꞌ-tudaꞌraꞌ i Pueꞌ Ala, hira woꞌo rahuhuꞌ nodo popenómbá to rungu-runguna i Pueꞌ Ala hai i Ánáꞌ Dimbá.

⁵Tiꞌaraheꞌ modongkoꞌ, hai tiꞌara woꞌo ara kamasalaꞌraꞌ.

⁶Hai kuita wopiꞌi hadua malaꞌeka to ntániꞌna to membara i laerawa. Malaꞌeka iti moánti Ngkóráꞌ Marasa to tiꞌara tebáliki duuꞌna i rue-ruena. Ngkóráꞌ Marasa iti ina nabámbári i tauna to toroꞌ i humalele duniáꞌ: i upu-upu kadatuá, upu-upu pemuleꞌá hai i upu-upu básá.

⁷Malaꞌeka iti molaluita napasimbuku, nauliꞌ, “Mengkoruꞌmokou i Pueꞌ Ala, hai nipomahile hangaꞌNa, láwiꞌ haweꞌ miꞌi tempó pehukuáNa. Menómbámokou i Pueꞌ Ala to mampopewaliꞌ langiꞌ, duniáꞌ, tahiꞌ hai upu-upu ulu uwai.”

⁸Hangko ionoꞌ, ara woꞌo malaꞌeka karoduána to meuláꞌ i malaꞌeka to rungu-runguna molaluita, nauliꞌ, “Magero miꞌi! Magero miꞌi {kótá to kadake to rapándiriꞌ nodo} kótá Bábeli,[98] kótá to mahile ntepuꞌu! ToBábeli iti, mowáwáháheꞌ tauna i humalele duniáꞌ mainu to melángui áláraꞌ mampeuláꞌiheꞌ bábehiáraꞌ to metitidiꞌi.”

⁹Roo onoꞌ, malaꞌeka to katálu meuláꞌ woꞌo i malaꞌeka to rodua iti, hai molaluita woꞌo napasimbuku, nauliꞌ, “Heáná peá to menómbá i binataꞌ to kadake hai lenggeꞌna binataꞌ iti, hai heáná peá to motarima tandaꞌ binataꞌ iti i kireraꞌ ba i taeraꞌ,

¹⁰tauna iti ina Nakabukoꞌi ntepuꞌuheꞌ Pueꞌ Ala, hai tiꞌara ina ara kamaluluna laluNa i hira.[99] Tauna iti ina rapopeahiahiꞌheꞌ i lalu api belerang. Malaꞌeka to magasaꞌ hai Ánáꞌ Dimbá to i surugáꞌ ina mampetiro karapopeahiahiꞌraꞌ iti.

¹¹Rámbu hangko i api to mampopeahiahiꞌheꞌ ina mengkaoreꞌ oaꞌ duuꞌna i rue-ruena. Maroꞌa mabaa ba káindi, tauna iti ina rapopeahiahiꞌheꞌ oaꞌ, láwiꞌ menómbámoheꞌ i binataꞌ to kadake hai i lenggeꞌna, hai motarimamoheꞌ tandaꞌ hangaꞌna binataꞌ iti.”

¹²Onoꞌ miꞌi haneꞌi tauna to mehárungá i Pueꞌ Ala hai mampeuláꞌi oaꞌ hawaꞌNa, hangaa-ngaa sabaraꞌheꞌ mantódihá kapári.

¹³Roo onoꞌ, kuhádi wopiꞌi wambaꞌ hangko i surugáꞌ to manguliꞌ, “Nuꞌukiꞌ miꞌi deꞌe: Mantepuꞌu deꞌe-deꞌe, morasiꞌheꞌ tauna to mepoinálái oaꞌ i Pueꞌ Iesu duuꞌraꞌ mate.” Nahániki Inao to Magasaꞌ, “Toꞌu ntepuꞌu! Láwiꞌ tauna iti bateꞌraꞌ ina mengkaroo hangko i pobágóꞌraꞌ, hai bateꞌraꞌ ina molámbiꞌheꞌ wuaꞌna bábehiáraꞌ.”

¹⁴Roo onoꞌ, kuita wopiꞌi gawu to bulá. Hai i wongko gawu iti, mehoda hadua tauna, lenggeꞌNa nodo Ánáꞌ Mánusiá.[100] I wuáꞌNa ara tatali buláwá, hai taeNa motibaaꞌ hamata kandaoꞌ to mataru.

¹⁵Hangko ionoꞌ hadua malaꞌeka to ntániꞌna mesuwuꞌ hangko i Támbina Pueꞌ Ala. Ia molaluita napasimbuku i tauna to mehoda i wongko gawu iti, nauliꞌ, “Nuwaleá miꞌi kandaoꞌMu láwiꞌ haweꞌ miꞌi tempóna mepare. Mangka miꞌi óntóꞌ duniáꞌ.”

¹⁶Hangko ionoꞌ, tauna to mehoda i wongko gawu iti morámpu upu-upu tauna i duniáꞌ. Tempóna miꞌi mobutusi kárá-káráraꞌ.[101]

¹⁷Roo onoꞌ, malaꞌeka to ntániꞌna mesuwuꞌ hangko i Támbina Pueꞌ Ala i surugáꞌ. Ia woꞌo motibaaꞌ kandaoꞌ to mataru.

¹⁸Haweꞌ wopiꞌi hadua malaꞌeka to ntániꞌna hangko i paintuá popenómbá, ia miꞌi to mokámpái api. Malaꞌeka iti molaluita napasimbuku i malaꞌeka to motibaaꞌ kandaoꞌ to mataru, nauliꞌ, “Nuwaleá miꞌi kandaoꞌmu hai nurántáhi miꞌi wuaꞌ anggoroꞌ to i duniáꞌ, láwiꞌ mangka miꞌi wuaꞌna.”

¹⁹Malaꞌeka iti mowaleá miꞌi kandaoꞌna i duniáꞌ, morántáhi wuaꞌ anggoroꞌ, hai natibe i lalu popieꞌá anggoroꞌ to mahile. Popieꞌá anggoroꞌ iti, lempóna kamabukoꞌna Pueꞌ Ala i tauna to kadake.[102]

²⁰Mewaliꞌ wuaꞌ anggoroꞌ[103] iti rapieꞌ i rawa kótá, hai hangko i popieꞌá iti, moili miꞌi waheꞌ nodo poiliána uwai to mahile. Kakaraoꞌna poiliána rekeꞌ-rekeꞌna tálu átuna kiló, kakaladuna haweꞌ i humena dárá.