Read Besoa Pampetudeꞌá 16 Bible Online

Pampetudeꞌá 16 - Besoa bible

Pampetudeꞌá 16

¹Kuhádi wopiꞌi wambaꞌ to molaluita napasimbuku hangko i lalu Támbina Pueꞌ Ala i malaꞌeka to pitu, nauliꞌ, “Laomokou mobubuha óntóꞌ pemboliá kamabukoꞌna Pueꞌ Ala i wongko duniáꞌ!”

²Lao mpuꞌu miꞌi malaꞌeka to rungu-runguna mobubuha óntóꞌ pemboliá i duniáꞌ. Iaperái mesupaꞌ bihu to meriringkuꞌi hai merángáuki[108] i tauna to menómbá i lenggeꞌna binataꞌ to kadake hai ara tandaꞌna i kireraꞌ.

³Malaꞌeka to karoduána mobubuha óntóꞌ pemboliá i tahiꞌ. Uwai tahiꞌ iti mewaliꞌ nodo waheꞌna tauna to mate, álána mateheꞌ upu-upu to tueꞌ i lalu tahiꞌ.

⁴Malaꞌeka to katálu mobubuha óntóꞌ pemboliá i upu-upu uwai hai i upu-upu ulu uwai, álána upu-upu uwai iti mewaliꞌ malei nodo waheꞌ.[109]

⁵Roo onoꞌ, kuhádi malaꞌeka to makuasaꞌ i uwai iti manguliꞌ: “Pueꞌ Ala to magasaꞌ, to ara miꞌi ami hangko i rungu-runguna, hai to ara deꞌe-deꞌe. Hintotoꞌ ntepuꞌu pehukuMu deꞌe,

⁶láwiꞌ tauna to kadake i duniáꞌ mopapatemoheꞌ taunáMu to handaꞌ, hai mobubumoheꞌ waheꞌraꞌ nábiꞌMu. Onoꞌ miꞌi haneꞌi Nubáliki miꞌi uwai i duniáꞌ mewaliꞌ nodo waheꞌ, haneꞌi Nuweꞌiheꞌ to mepapate bona rainu. Apa to Nubábehi iti, hintotoꞌ ntepuꞌu i hira!”

⁷Roo onoꞌ, kuhádi wopiꞌi wambaꞌ hangko i paintuá popenómbá to manguliꞌ: “Ó Pueꞌ Ala, hintotoꞌ hai manótó pehukuMu. Mahile kuasaꞌMu hangko i upu-upuna!”

⁸Malaꞌeka to kaꞌiba mobubuha miꞌi óntóꞌ pemboliá i alo, hai alo raweꞌi kuasaꞌ moraruki tauna.

⁹Mararuꞌheꞌ tauna ánti kamaꞌámuꞌna alo to rumihi iti, haneꞌi motitibeiheꞌ Pueꞌ Ala, láwiꞌ Ia to makuasaꞌ i pepopeahiahiꞌ iti, agáiáná tiꞌaraheꞌ mau menosoꞌ hangko i dósáraꞌ hai mopangákuꞌ kamahilena tueꞌna Pueꞌ Ala.

¹⁰Malaꞌeka to kalima mobubuha óntóꞌ pemboliá i pehodaꞌá kadatuána binataꞌ to kadake iti. I humalele kadatuána, hangkaꞌ-hangkaꞌ perái makáindi, hai tauna mokekiꞌheꞌ lilaꞌraꞌ ánti kamapáriraꞌ.

¹¹Motitibeiheꞌ Pueꞌ Ala to i surugáꞌ ánti kamapárina pehádiraꞌ hai kamaháina bihuraꞌ, agáiáná tiꞌaraheꞌ mau menosoꞌ hangko i bábehiáraꞌ to kadake.

¹²Malaꞌeka to kaꞌini mobubuha óntóꞌ pemboliá i uwai to mahile to rauliꞌ uwai Epara. Maꞌáti mpuꞌu miꞌi uwai iti, bona peisá raporárái datu-datu to mai hangko i mata alo hai surudadoꞌraꞌ to ina lao mombeala.

¹³Hai kuita wopiꞌi setáꞌ to kadake ntepuꞌu mesupaꞌ hangko i ngángána naga. Setáꞌ ntániꞌna mesupaꞌ hangko i ngángána binataꞌ to kadake, hai to ntániꞌna wopiꞌi mesupaꞌ hangko i ngángána nabiꞌ to mepakanawoꞌ. Setáꞌ to tálu iti, lenggeꞌraꞌ nodo táráwuti,

¹⁴hai makuasaꞌheꞌ mobábehi tandaꞌ kuasaꞌ. Laomoheꞌ setáꞌ to tálu iti mampohidupaꞌáheꞌ datu i humalele duniáꞌ bona hirámpuheꞌ lao mombeala i alo to meriringkuꞌi, alo pehukuá to napakanótó miꞌi Pueꞌ Ala. I tempó iti, Pueꞌ Ala to Makuasaꞌ ina monangi upu-upu ewáliNa i duniáꞌ.

¹⁵Datu-datu hai surudadoꞌraꞌ hangko i humalele duniáꞌ ina hirámpumoheꞌ i katoroꞌá to rahangaꞌ Hamagedo i lalu básá Iberani. Nauliꞌ Pueꞌ Iesu, “Nipehádingi! Ina haweꞌAꞌ i tempó to tiꞌara nisangka-sangka, nodo kahaweꞌna topanako. Morasiꞌheꞌ tauna to maingáꞌ-ingáꞌ hai motibaaꞌ oaꞌ pepoináláiraꞌ, láwiꞌ tiꞌaraheꞌ paraluu mahili i kaꞌina haweꞌKuꞌ.”[110]

¹⁷Malaꞌeka to kapituna mobubuha óntóꞌ pemboliá i laerawa. Hai kuhádi wopiꞌi wambaꞌ to masimbuku molaluita hangko i pehodaꞌána Pueꞌ Ala i lalu TámbiNa i surugáꞌ, nauliꞌ, “Hópóꞌ miꞌi tempó pepopeahiahiꞌ!”

¹⁸Hangko ionoꞌ, megumpataꞌ miꞌi, mekiláꞌ, hai melinu to rumihi.[111] Mantepuꞌu hangko i pewaliꞌána tauna i duniáꞌ haweꞌ deꞌe-deꞌe, tiꞌara mani ara linu to noꞌonoꞌ karumihina.[112]

¹⁹Kótá to kadake iti to rapándiriꞌ nodo kótá Bábeli magero mewaliꞌ tálu gááꞌna, hai kótá-kótá to kadake i humalele duniáꞌ magero woꞌo. Nabuhinao miꞌi Pueꞌ Ala Bábeli kótá to mahile iti, onoꞌ miꞌi haneꞌi Naháwángi dósáraꞌ tauna to toroꞌ ionoꞌ. Nahukuheꞌ láwiꞌ mabukoꞌ ntepuꞌu.

²⁰Ánti linu to rumihi iti, matántá upu-upu puló i tahiꞌ, hai tiꞌara piꞌi ara buluꞌ.

²¹Wuaꞌ udá to mahile ntepuꞌu, manawoꞌ hangko i langiꞌ modumpingi tauna. Ane hambuaꞌ, rekeꞌ-rekeꞌna lima puloꞌna kiló kamatimina. Onoꞌ miꞌi haneꞌi tauna motitibeiheꞌ Pueꞌ Ala, láwiꞌ rumihi ntepuꞌu karapopeahiahiꞌraꞌ iti.