Read Besoa Pampetudeꞌá 17 Bible Online

Pampetudeꞌá 17 - Besoa bible

Pampetudeꞌá 17

¹Roo onoꞌ, hadua hangko i malaꞌeka to pitu to motibaaꞌ pitu pemboliá iti mai i kódóꞌ Iohane, nahángáꞌáꞌáꞌaꞌ, “Maikoꞌ, ina kutudeꞌáꞌákoꞌ noumbá karahukuna towawine to metitidiꞌi ntepuꞌu bábehiána. Towawine iti mehoda i kaꞌaraꞌá to handaꞌ uwaina.[113]

²Datu-datu i duniáꞌ mobábehiheꞌ bábehiá to metitidiꞌi hingkakani hai towawine iti, hai upu-upu tauna to toroꞌ i duniáꞌ napopainuheꞌ painu to melángui, lempóna: ia mowáwáháheꞌ mampeuláꞌi bábehiána to tiꞌara hintotoꞌ.”

³Hangko ionoꞌ, kódóꞌ Iohane, nakuasaꞌiaꞌ Inao to Magasaꞌ, haneꞌi malaꞌeka iti moántiaꞌ lao i pádá loriꞌ. Ionoꞌ kuita hadua towawine to mosaweꞌi hambaꞌa binataꞌ.[114] Binataꞌ to napesaweꞌi iti, malei ntepuꞌu, hai i humalele wátána teukiꞌ laluita to motitibei Pueꞌ Ala. Binataꞌ iti mowuáꞌ pitu hai motánduꞌ hampuloꞌ.

⁴Waruꞌna towawine iti makámumu hai malei ntepuꞌu, hai rabungaꞌ-bungaꞌi hai buláwá, mutiara hai watu akeꞌ to masuliꞌ hólóna. Ia motibaaꞌ hambuaꞌ mangku to rabábehi hangko i buláwá. Mangku iti bukeꞌ hai to mepakahiliá, ia miꞌi bábehiána to metitidiꞌi hai tiꞌara hintotoꞌ.

⁵I kirena, teukiꞌ hangaꞌ to tewuniángi lempóna, ukiꞌna node: “Kódóꞌ miꞌi kótá Bábeli to Mahile, ináraꞌ upu-upu tauna to kadake bábehiáraꞌ hai pentóáꞌána woꞌo mampopengaa bábehiá i duniáꞌ to tiꞌara hintotoꞌ.”

⁶Kuita towawine iti malangu miꞌi moinu waheꞌna taunána Pueꞌ Ala. Lempóna, handaꞌ tauna to mopangákuꞌ kaꞌIesuna Pueꞌraꞌ to napapate. Tingkáráꞌ ntepuꞌuaꞌ moita towawine iti.

⁷Hangko ionoꞌ, nauliꞌ malaꞌeka to moántiaꞌ, “Moapa riꞌi haneꞌi nupotingkáráꞌ? Tiꞌara paꞌi nuisá lempóna towawine iti hai binataꞌ to napesaweꞌi? Ina kupakanótóákoꞌ. Binataꞌ to mowuáꞌ pitu hai motánduꞌ hampuloꞌ wuaꞌna iti,

⁸hangkoia tueꞌ, deꞌe-deꞌe tiꞌara piꞌi ara, agáiáná hangkani tempó ina tueꞌ huleꞌ hai mesuwuꞌ mai hangko i pingke pehukuá to tiꞌara tehukáꞌ kakaladuna.[115] Hai roo onoꞌ, ina nahuku Pueꞌ Ala haweꞌ i rue-ruena.[116] Tauna to toroꞌ i duniáꞌ to tiꞌara teukiꞌ hangaꞌraꞌ i lalu Sura Ngkatueꞌ hangko tiꞌara mani duniáꞌ rapopewaliꞌ, ina tingkáráꞌheꞌ moita binataꞌ iti, láwiꞌ hangkoia tueꞌ, deꞌe-deꞌe tiꞌara piꞌi ara, agáiáná hangkani tempó ina haweꞌ huleꞌ.

⁹Mewaliꞌ hangaa-ngaa tapepekiri mpakaroꞌa bona taisá lempóna laluita deꞌe. Wuáꞌ binataꞌ to pitu iti, lempóna pitu wuaꞌna buluꞌ[117] to mopándiriꞌ kótá pehodaꞌána towawine iti.

¹⁰Hai wuáꞌ to pitu iti, lempóna woꞌo pitu datu.[118] Lima hangko i datu iti, matemoheꞌ. Hadua tangaꞌna mani mepárentá. Hai hadua tiꞌara mani mantepuꞌu mepárentá. Ia ina haweꞌ mepárentá, agáiáná tiꞌara marue popárentána.

¹¹Binataꞌ to tueꞌ hangkoia hai to tiꞌara piꞌi ara deꞌe-deꞌe ina mewaliꞌ datu kaꞌuwaluna. Ia ina hibali hai datu to pitu iti. Agáiáná kahópóꞌána bateꞌna ina rahuku duuꞌna i rue-ruena.

¹²Tánduꞌ to hampuloꞌ to nuita ininá, lempóna hampuloꞌ datu to tiꞌara mani mantepuꞌu mepárentá. Ina raweꞌiheꞌ tempó mepárentá hingkakani hai binataꞌ iti, agáiáná popárentáraꞌ tiꞌara marue.[119]

¹³Datu to hampuloꞌ iti, hampepekiriheꞌ motulungi binataꞌ to kadake. Upu-upu kamaróhóraꞌ hai kamakuasaꞌraꞌ mepárentá ina rapeweꞌi i binataꞌ to kadake.

¹⁴Ina mampombealaꞌáheꞌ Iesu to rapándiriꞌ nodo Ánáꞌ Dimbá. Agáiáná Ánáꞌ Dimbá ina monangiheꞌ, láwiꞌ ia miꞌi Pueꞌ to melumbuꞌ kamakuasaꞌNa hangko i upu-upu pueꞌ, hai Datu to melumbuꞌ kamakuasaꞌNa hangko i upu-upu datu. Ánáꞌ Dimbá iti ina raporángá taunáNa to Nakióꞌ hai Napileꞌi, to meuláꞌheꞌ oaꞌ i Hia.”

¹⁵Nauliꞌ wopiꞌi malaꞌeka iti i kódóꞌ, “Uwai to nuita ininá, to napehodai towawine to metitidiꞌi bábehiána iti, lempóna tauna to hangko i humalele duniáꞌ: hangko i upu-upu kadatuá hai upu-upu básá.

¹⁶Ina haweꞌ tempóna, binataꞌ hai datu to hampuloꞌ iti ina mokáhihiꞌheꞌ towawine to metitidiꞌi bábehiána. Ina moewaꞌheꞌ tauna to toroꞌ i kótá to mahile. Upu-upu óntóꞌ kótá iti ina raperampaꞌi hai raintu, bona tunamoheꞌ hai malaheꞌ miꞌi.

¹⁷Apa to rabábehi iti, ina hintotoꞌ hai tunggáiána Pueꞌ Ala, láwiꞌ Pueꞌ Ala to mampopokale laluraꞌ datu iti bona mampopolumaoheꞌ tunggáiáNa. Onoꞌ miꞌi haneꞌi upu-upu datu iti ina hampepekiriheꞌ mampeweꞌi kuasaꞌ popárentáraꞌ i binataꞌ to kadake, bona tebukeki mpuꞌu apa to napahaweꞌ Pueꞌ Ala.

¹⁸Mewaliꞌ, towawine to nuita iti, lempóna kótá mahile to napárentái hadua datu to mokuasaꞌi upu-upu datu i duniáꞌ.”