Read Besoa Pampetudeꞌá 18 Bible Online

Pampetudeꞌá 18 - Besoa bible

Pampetudeꞌá 18

¹Karoona malaꞌeka iti molaluita, kuita wopiꞌi malaꞌeka to ntániꞌna mendáulu mai hangko i surugáꞌ. Mahile kuasaꞌna, hai ánti pewangkaꞌna, humalele duniáꞌ mewaliꞌ mabaa.

²Ia monganga-nganga napasimbuku, nauliꞌ, “Magero miꞌi! Magero miꞌi Bábeli, kótá to mahile![120] Mantepuꞌu deꞌe-deꞌe, kótá deꞌe ina rakatoroꞌi setáꞌ, tokadake, hai hinángkáꞌ tádáhi to rapáliá hai rapokatidiꞌ.[121]

³Magero miꞌi kótá Bábeli, láwiꞌ toBábeli mampoioruámoheꞌ tauna i humalele duniáꞌ bona mainuheꞌ to melángui. Lempóna: mowáwáháheꞌ tauna mampeuláꞌi peundeꞌána laluraꞌ to kadake. Upu-upu datu i duniáꞌ mampeuláꞌiheꞌ bábehiáraꞌ to metitidiꞌi iti. Hai topobaluꞌ-baluꞌ i duniáꞌ mewaliꞌmoheꞌ woꞌo tauna to pebuku hangko i mampopengaa peundeꞌáraꞌ toBábeli.”

⁴Roo onoꞌ, kuhádi wopiꞌi wambaꞌ ntániꞌna hangko i surugáꞌ, Nauliꞌ, “Pohuꞌmokou taunáNgkuꞌ! Nipálehi miꞌi kótá iti, bona tiꞌarakou maꞌala rapamadósá, hai bona tiꞌarakou tekalalu i pepopeahiahiꞌ to ina mewaliꞌ ionoꞌ.

⁵Láwiꞌ handaꞌ ntepuꞌu dósáraꞌ, mombetitiwongkohangi miꞌi haweꞌ i langiꞌ, hai Pueꞌ Ala ina moháwángi upu-upu dósáraꞌ iti.

⁶Kótá iti, rumihi kakadakena i tauna ntániꞌna. Niháwángi bábehiána to kadake rongkani kahandaꞌna hangko i upu-upu bábehiána. Nipaꞌara i kótá iti pepopeahiahiꞌ to rongkani karumihina hangko i pepopeahiahiꞌ to nabábehi kótá iti i tauna ntániꞌna.

⁷Nipopeahiahiꞌheꞌ hai nipamapáriheꞌ, láwiꞌ mampepemahileheꞌ, rauliꞌ: ‘Kaiꞌ deꞌe datu towawine. Tiꞌaraꞌangkaiꞌ tobembaꞌ. Tiꞌaraꞌangkaiꞌ ina molámbiꞌ kapári.’[122]

⁸Ánti kanoꞌonoꞌna pekiriraꞌ, i lalu hangalo peá tauna to toroꞌ i kótá Bábeli ina narampeheꞌ pepopeahiahiꞌ deꞌe: kapate, kawiora hai rimi. Hai kótá iti ina rahunu, láwiꞌ to ina mohuku kótá iti, Ia miꞌi Pueꞌ Ala to makuasaꞌ.”

⁹Datu-datu i duniáꞌ mampeuláꞌiheꞌ bábehiáraꞌ toBábeli to metitidiꞌi, hai nodoheꞌ woꞌo toBábeli, mampeliꞌ peheꞌ porasiꞌáraꞌ haduduáraꞌ. Mewaliꞌ ane datu-datu iti moitaheꞌ rámbu peandeꞌna api i kótá Bábeli, ina rateriahi ánti kapumpuna miꞌi.

¹⁰Ina rapeita ngkaraoꞌ láwiꞌ malááꞌheꞌ ina tekalalu i pepopeahiahiꞌ to mewaliꞌ i kótá iti. Hai ina rauliꞌ: “Adee! Meahiahiꞌ kótá Bábeli to mahile hai maróhó! Hampaiꞌ peá[123] upu miꞌi rapatuna ánti pehukuna Pueꞌ Ala!”

¹¹Topobaluꞌ-baluꞌ i duniáꞌ ina masusa laluraꞌ hai ina teriaꞌheꞌ ánti kapumpuna miꞌi kótá Bábeli, láwiꞌ tiꞌarapoheꞌ ara to mohóló baluꞌ-baluꞌraꞌ

¹²to handaꞌ pákáꞌna. Ara buláwá, peráꞌ, watu akeꞌ, hai mutiara. Ara waruꞌ to meálu to rabábehi hangko i báná to masuliꞌ hai báná to malei ba makámumu. Ara párewá to rabábehi hangko i kau to mawongi, hangko i toꞌae gajaꞌ, hai hangko i kau to masuliꞌ, ba hangko i tembaga, besiꞌ ba watu mpárágiá.

¹³Ara koliꞌ kaninoꞌ hai rampaꞌ-rampaꞌ ntániꞌna. Ara párewá to mawongi, dupaꞌ hai mire. Ara anggoroꞌ, lana saitu, tinámpu, hai bailoꞌ.[124] Ara woꞌo gapiꞌ, dimbá, dárá, kereta dárá, hai tauna to rapohawiꞌ. Upu-upu baluꞌ-baluꞌraꞌ tepasuaꞌ woꞌo tauna, rapobaluꞌ i toBábeli iti. Agáiáná ánti kamagerona kótá Bábeli, tiꞌarapoheꞌ ara to ina mehóló.

¹⁴Onoꞌ miꞌi haneꞌi topobaluꞌ-baluꞌ ina moteriahiheꞌ pueꞌ wánuá Bábeli, ina rauliꞌ, “Upu-upu to niundeꞌ tiꞌara piꞌi ara. Upu-upu pandeꞌ to niundeꞌ hai párewá to masuliꞌ matántá miꞌi, tiꞌara piꞌi ina nilámbiꞌ.”

¹⁵Topobaluꞌ-baluꞌ iti mewaliꞌmoheꞌ tauna to pebuku láwiꞌ mampobaluꞌheꞌ hinángkáꞌ párewá i toBábeli. Agáiáná i tempóraꞌ toBábeli rapatuna, hira ina meángkáꞌheꞌ ngkaraoꞌ mampeita kamagerona kótá iti, láwiꞌ malááꞌheꞌ tekalalu i pepopeahiahiꞌ i kótá iti. Ina teriaꞌheꞌ hai metatangi,

¹⁶ina rauliꞌ: “Adee! Meahiahiꞌ kótá to mahile! Hangkoia toBábeli mopakeꞌ waruꞌ to meálu, to malei hai makámumu. Baduraꞌ rabungaꞌ-bungaꞌi buláwá, watu akeꞌ hai mutiara.

¹⁷Agáiáná kapebukuraꞌ iti hampaiꞌ peá tuna miꞌi!” Upu-upu tauna to mampeliꞌ katueꞌáraꞌ i tahiꞌ, maroꞌa topoánti kapalaꞌ tahiꞌ, maroꞌa topobágóꞌ i kapalaꞌ hai upu-upu tauna to ara i lalu kapalaꞌ, ina meángkáꞌ peheꞌ ngkaraoꞌ

¹⁸mampeita rámbu api to mentumbuꞌ hangko i kótá iti. Ánti kawioraraꞌ, ina rauliꞌ, “Marugiꞌ mpuꞌu kótá to mahile! Tiꞌara ara paháwángina!”

¹⁹Mewaliꞌ ina moawuiheꞌ tutuꞌ wuáꞌraꞌ tandaꞌ kamasusana laluraꞌ. Ina metatangiheꞌ rapasimbuku, rauliꞌ: “Adee! Meahiahiꞌ ntepuꞌu kótá to mahile iti! Ánti peawaꞌna, onoꞌ miꞌi haneꞌi kitaꞌ upu-upu to mobágóꞌ i kapalaꞌ tahiꞌ mewaliꞌkeꞌ tauna to pebuku. Agáiáná peita: hampaiꞌ peá, kótá iti tuna miꞌi!”

²⁰“Góeꞌmokou, góeꞌmokou to toroꞌ i surugáꞌ. Nipokagóeꞌ miꞌi kamagerona kótá Bábeli! Góeꞌmokou, góeꞌmokou, taunána Pueꞌ Ala, suro-suroNa hai nábiꞌ-nábiꞌNa! Láwiꞌ Pueꞌ Ala mohukumoheꞌ toBábeli, moháwángi bábehiáraꞌ to kadake i kómu.”

²¹Roo onoꞌ, kuita hadua malaꞌeka to maróhó moángkáꞌ hambuaꞌ watu to mahile, hai kamahilena nodo watu pogiliá. Natelánga i tahiꞌ, nauliꞌ, “Noꞌonoꞌ woꞌo kótá Bábeli to mahile ina magero miꞌi, hai tiꞌara piꞌi ina raꞌaró huleꞌ.[125]

²²Ina matántá mpuꞌu upu-upu kapebukuna hai kamababena. Topokasapi, toponani, topotulali hai topotawueꞌ tamburuꞌ, tiꞌarapoheꞌ ina rahádi i kótá iti. Topoaró támbi hai topokáráhi tiꞌarapoheꞌ ina ara, pokániꞌna watu pogiliá tiꞌara piꞌi ina rahádi.

²³Tiꞌara piꞌi ina ara wangkaꞌ huluꞌ. Tiꞌara piꞌi ina ara posusa petauna. Ina mondii miꞌi kótá iti. Upu-upu iti ina mewaliꞌ láwiꞌ hangkoia topobaluꞌ-baluꞌ i Bábeli, mahile hangaꞌraꞌ i duniáꞌ, hai moliu pedotiraꞌ mopakanawoꞌheꞌ upu-upu tauna i duniáꞌ.

²⁴Hai hira mopapateheꞌ handaꞌ tauna i duniáꞌ tepasuaꞌ nabiꞌ-nabiꞌ hai taunána Pueꞌ Ala.”