Read Besoa Pampetudeꞌá 2 Bible Online

Pampetudeꞌá 2 - Besoa bible

Pampetudeꞌá 2

¹[11] Nauliꞌ Iesu i kódóꞌ, “Nuꞌukiꞌ miꞌi laluita deꞌe haweꞌ i tadulako[12] to mokádipurá jemaꞌa i kótá Epesu: Deꞌe miꞌi laluitana Pueꞌ Iesu to motibaaꞌ betue to pitu wuaꞌna i tae kuánáNa, hai to molumao i oloꞌna pamboliá huluꞌ buláwá to pitu wuaꞌna.

²Nauliꞌ: Kuisá apa to nibábehi. Madotakou mampopolumao bágóꞌKuꞌ, hai mantahakou ane rapopeahiahiꞌkou ánti pepoináláimi i Kódóꞌ. Kuisá katiꞌárána niundeꞌ bábehiáraꞌ tauna to kadake. Araheꞌ to manguliꞌ kahirana suroNgkuꞌ, agáiáná tiꞌara toꞌu. Niꞌisá podongkoꞌraꞌ, láwiꞌ nipetándái miꞌi bábehiáraꞌ.

³Sabaraꞌkou hai mantahakou i lalu kapári ánti pepoináláimi i Kódóꞌ, hai tiꞌara maledeꞌ lalumi meuláꞌ i Kódóꞌ.

⁴Agáiáná ara mani to Kusalaꞌiákou: pepokaꞌahiꞌmi deꞌe tiꞌara piꞌi nodo to rungu-runguna.

⁵Onoꞌ miꞌi haneꞌi Kuhángáꞌáꞌákou: menosoꞌmokou, láwiꞌ deꞌe-deꞌe manawoꞌmokou i lalu dósá. Nibábehi miꞌi huleꞌ apa to nibábehi i rungu-rungumi mesuaꞌ i toSarani. Ane tiꞌarai nibábehi noꞌonoꞌ, ina haweꞌAꞌ mopatunakou upu-upu jemaꞌa to nukádipurá nodo to mowehángi pamboliá huluꞌ hangko i katoroꞌána.

⁶Agáiáná ara woꞌo bábehiámi to maroꞌa, ia miꞌi mokáhihiꞌkou bábehiáraꞌ tauna to mampeuláꞌi paturoꞌna Nikolau.[13] Kódóꞌ woꞌo mokáhihiꞌ bábehiáraꞌ iti.

⁷Hangaa-ngaa nipailalu apa to nauliꞌ Inao to Magasaꞌ i jemaꞌa-jemaꞌa. Heáná to menangi, Kupaliu mandeꞌ wuaꞌ hangko i Kau to Mopaꞌara Katueꞌ to Tiꞌara Mokahópóꞌá[14] i Hinoe Párádesiꞌ i surugáꞌ.”

⁸[15] Roo onoꞌ, nauliꞌ wopiꞌi Pueꞌ Iesu i kódóꞌ, “Nuꞌukiꞌ miꞌi laluita deꞌe haweꞌ i tadulako to mokádipurá jemaꞌa i kótá Simirina: Deꞌe miꞌi laluitana Pueꞌ Iesu, to Pantepuꞌuána hai to Kahópóꞌána, to mate miꞌi agáiáná tueꞌ huleꞌ.

⁹Nauliꞌ: Kuisá kapári to morampekou ánti karapopeahiahiꞌmi, hai Kuisá kameahiahiꞌmi, agáiáná katoꞌuána pebukukou i lalu pepoináláimi. Kuisá noumbá karasalaꞌimi tauna to manguliꞌ katoIahudiꞌraꞌ. Agáiáná katoꞌuána, i laluraꞌ tiꞌaraheꞌ toIahudiꞌ, mole topegurunaraheꞌ Datu Tokadake.

¹⁰Ineeꞌkou malááꞌ i kaꞌina rapopeahiahiꞌmi. Bona niꞌisá, Datu Tokadake ina motarungkuheꞌ hantángáꞌ hangko i kómu, hai ina nakeloꞌ-keloꞌkou bona mosuliꞌkou hangko i pepoináláimi. Ina rapopeahiahiꞌkou hampuloꞌ alona kamaruena.[16] Agáiáná ineeꞌ nipokalááꞌ kaꞌina rapopeahiahiꞌmi iti. Hangaa-ngaa mantahakou i pepoináláimi, kehapiꞌkou rapapate. Ane nibábehi noꞌonoꞌ, ina Kuweꞌikou katueꞌ to maroꞌa to tiꞌara mokahópóꞌá, háwángina penangimi.

¹¹Hangaa-ngaa nipailalu apa to nauliꞌ Inao to Magasaꞌ i jemaꞌa-jemaꞌa. Heáná to menangi, tiꞌara mpuꞌuheꞌ ina molámbiꞌ pehuku i lalu naraka to rauliꞌ kapate to karongkánina.”[17]

¹²[18] Roo onoꞌ, nauliꞌ wopiꞌi Pueꞌ Iesu i kódóꞌ, “Nuꞌukiꞌ miꞌi laluita deꞌe haweꞌ i tadulako to mokádipurá jemaꞌa i kótá Pegamu: Deꞌe miꞌi laluitana Pueꞌ Iesu to motibaaꞌ pihoꞌ to mataru hai momata potimbali.

¹³Nauliꞌ: Kuisá iumbá katoroꞌámi. Toroꞌkou i oloꞌraꞌ tauna to nakuasaꞌi Datu Tokadake. Agáiáná nipangákuꞌ oaꞌ pepoináláimi i Kódóꞌ. I karapapatena Antipa sabiꞌKuꞌ, tiꞌara nisápuáka kanipoináláiNgkuꞌ. Antipa iti ia miꞌi sabiꞌKuꞌ to tetidaꞌ oaꞌ duuꞌna rapapate i lindoꞌmi, i kótámi to nakuasaꞌi Datu Tokadake.

¹⁴Agáiáná ara mani bahangapa to Kusalaꞌiákou: ara hantángáꞌ hangko i kómu to mampeuláꞌi paturoꞌna nabiꞌ Bilea.[19] Hangkoia Bilea iti mopaturoꞌ Báláꞌ noumbá rárána mopakanawoꞌ toSáráeliꞌ bona madósáheꞌ. Nawáwáháheꞌ mandeꞌ pandeꞌ to rapopenómbá i ánitu, hai mobábehi bábehiá to metitidiꞌi.

¹⁵Noꞌonoꞌ woꞌo, ara hantángáꞌ hangko i kómu to mampeuláꞌi paturoꞌraꞌ topeguruna Nikolau.[20]

¹⁶Onoꞌ miꞌi haneꞌi Kuhángáꞌáꞌákou, menosoꞌmokou hangko i dósámi iti! Ane tiꞌara, ina hawiáꞌAꞌ mai mampombealaꞌáheꞌ tauna iti hai ngkóráꞌKuꞌ to nodo pihoꞌ to mesuwuꞌ hangko i ngángáNgkuꞌ.

¹⁷Hangaa-ngaa nipailalu apa to nauliꞌ Inao to Magasaꞌ i jemaꞌa-jemaꞌa. Heáná to menangi, ina Kuweꞌiheꞌ rótiꞌ manna[21] to tewuni miꞌi. Ina Kuweꞌiheꞌ woꞌo hambuaꞌ watu to bulá.[22] I watu iti teukiꞌ hangaꞌ to woꞌu,[23] to tiꞌara raisá tauna ntániꞌna. To moisá, bateꞌna peá to morangaꞌ watu iti.”

¹⁸[24] Roo onoꞌ, nauliꞌ wopiꞌi Pueꞌ Iesu i kódóꞌ, “Nuꞌukiꞌ miꞌi laluita deꞌe haweꞌ i tadulako to mokádipurá jemaꞌa i kótá Tiatira: Deꞌe miꞌi laluitana Ánáꞌna Pueꞌ Ala to mewangkaꞌ mátáNa nodo roreꞌ api, hai bitiNa mengkilaꞌ nodo tembaga to hangko rageseꞌ.

¹⁹Nauliꞌ: Kuisá apa to nibábehi, maroꞌa ahiꞌmi, maroꞌa pepoináláimi i Kódóꞌ. Maroꞌa pampopolumaomi bágóꞌKuꞌ, maroꞌa kasabaraꞌmi i lalu kapári. Madota manikou mampopolumao bágóꞌKuꞌ deꞌe-deꞌe haneꞌi hangkoia.

²⁰Agáiáná ara mani to Kusalaꞌiákou. Ara hadua towawine i oloꞌmi to kakadakena bábehiána nodo kakadakena bábehiána datu Isebe[25] to tueꞌ hangkoia. Ia manguliꞌ kaꞌiana hadua nabiꞌ, hai nipatodáhi peá mopaturoꞌ tauna to mepoinálái i Kódóꞌ. Mole towawine iti mopaturoꞌheꞌ bona mobábehiheꞌ bábehiá to metitidiꞌi, hai mandeꞌheꞌ pandeꞌ to rapopenómbá i ánitu. Handaꞌ huoꞌáNgkuꞌ to napakanawoꞌ moliu paturoꞌna iti.

²¹Kuweꞌi miꞌi tempó i hia bona menosoꞌ hangko i dósána, agáiáná tiꞌara mau mokábáhá bábehiána to metitidiꞌi iti.

²²Mewaliꞌ, ina Kupopohakiꞌ bona mantódihá i paturuána hingkakani hai rángána hampombebualosina. Ane tauna iti tiꞌaraheꞌ mokábáhá pouláꞌraꞌ bábehiána towawine iti, ina rumihi ntepuꞌu pantódiháraꞌ.

²³Ina Kupapate upu-upu tauna to mampeuláꞌi paturoꞌna. Hangko ionoꞌ, ina tongawaꞌ i upu-upu jemaꞌa kaKódóꞌna to mopáresáꞌ pekiri hai laluraꞌ tauna, hai ina Kuweꞌikou háwángina hintotoꞌ hai bábehiámi hadua-hadua.

²⁴Agáiáná arakou hantángáꞌ i Tiatira to tiꞌara mampeuláꞌi paturoꞌ to kadake iti, hai tiꞌara niundeꞌ mampegurui paturoꞌ to rauliꞌ pangisána Datu Tokadake to tewuniángi. Mewaliꞌ Kuhángáꞌáꞌákou, tiꞌara ina Kutámbái kilingami hai párentá ntániꞌna.

²⁵Agáiáná hangaa-ngaa nipeuláꞌi oaꞌ paturoꞌKuꞌ to niꞌisá miꞌi, duuꞌna i kahaweꞌáNgkuꞌ.

²⁶Heáná to menangi hai mampeuláꞌi peundeꞌáNgkuꞌ duuꞌna i kahópóꞌána, ina Kuweꞌiheꞌ kuasaꞌ hibali hai kuasaꞌ to Kutarima hangko i UmáNgkuꞌ. Ina Kuweꞌiheꞌ kuasaꞌ mopárentái tauna i humalele duniáꞌ. Kamaróhóna kuasaꞌKuꞌ to Kuweꞌiheꞌ iti nodo kamaróhóna laiꞌ besiꞌ. Kuasaꞌ iti ina rapakeꞌ moropuꞌ upu-upu ewáliraꞌ nodo kori tampoꞌ to rarupuꞌ.[26]

²⁸Hai ina Kuweꞌiheꞌ Betue to mesupaꞌ tándáꞌ i mata alo, tandaꞌ kamenangiraꞌ.

²⁹Hangaa-ngaa nipailalu apa to nauliꞌ Inao to Magasaꞌ i jemaꞌa-jemaꞌa.”