Read Besoa Pampetudeꞌá 3 Bible Online

Pampetudeꞌá 3 - Besoa bible

Pampetudeꞌá 3

¹[27] Nauliꞌ wopiꞌi Pueꞌ Iesu i kódóꞌ, “Nuꞌukiꞌ miꞌi laluita deꞌe haweꞌ i tadulako to mokádipurá jemaꞌa i kótá Saridi: Deꞌe miꞌi laluitana Pueꞌ Iesu to motibaaꞌ Inaona Pueꞌ Ala to mampopolumao pitu pákáꞌna bágóꞌ,[28] hai betue to pitu wuaꞌna. Nauliꞌ: Kuisá apa to nibábehi. Tebámbári kómu tauna to mepoináláikou, mole katongawaꞌána, mate riꞌi pepoináláimi!

²Onoꞌ miꞌi haneꞌi hangaa-ngaa maingáꞌ-ingáꞌkou! Nipakaróhó pepoináláimi to ara mani hangko tiꞌara mani mate, láwiꞌ upu-upuna to nibábehi Kuita miꞌi, hai tiꞌara mani magáná i peitána Pueꞌ Ala UmáNgkuꞌ.

³Mewaliꞌ Kuhángáꞌáꞌákou: hangaa-ngaa nibuhinao paturoꞌ to nihádi hai to nitarima miꞌi hangkoia. Hangaa-ngaa nipeuláꞌi apa to rapaturoꞌákou, hai menosoꞌkou hangko i dósámi. Maingáꞌ-ingáꞌkou, láwiꞌ ane tiꞌarakou pempaa, tiꞌara ina niꞌisá kaimpirána kahaweꞌKuꞌ. Kódóꞌ ina maiAꞌ mampohidupaꞌákou i tempó to tiꞌara niꞌisá, nodo kahaweꞌna topanako.

⁴Agáiáná ara mani bahangapa tauna i oloꞌmi i Saridi to mokádipurá katueꞌraꞌ bona tiꞌara napakedái dósá. Hira ina molumaoheꞌ hingkakani hai Kódóꞌ, hai ina mopakeꞌheꞌ waruꞌ to bulá tandaꞌ kamagasaꞌraꞌ, láwiꞌ hintotoꞌheꞌ noꞌonoꞌ.

⁵Heáná to menangi, ina rabaduiheꞌ woꞌo waruꞌ to bulá, hai hangaꞌraꞌ tiꞌara ina Kuwoe hangko i Sura Ngkatueꞌ.[29] Ina Kupangákuꞌ ntepuꞌu i lindoꞌna UmáNgkuꞌ hai malaꞌekaNa, kahirana miꞌi taunáNgkuꞌ.[30]

⁶Hangaa-ngaa nipailalu apa to nauliꞌ Inao to Magasaꞌ i jemaꞌa-jemaꞌa.”

⁷[31] Roo onoꞌ, nauliꞌ wopiꞌi Pueꞌ Iesu i kódóꞌ, “Nuꞌukiꞌ miꞌi laluita deꞌe haweꞌ i tadulako to mokádipurá jemaꞌa i kótá Piladepia: Deꞌe miꞌi laluitana Pueꞌ Iesu to magasaꞌ hai toꞌu. Ia miꞌi to motibaaꞌ pegili, tandaꞌ kaꞌIana miꞌi to motibaaꞌ kuasaꞌ mopakanótó heáná to ina mesuaꞌ i kadatuána Daudiꞌ.[32] Ia peá to peisá mobungkáhi babaꞌ, hai ane Nabungkáhiꞌi, tiꞌara ara to peisá motuko. Ia peá to motuko babaꞌ, hai ane Natuko, tiꞌara ara to peisá mobungkáhi.

⁸Nauliꞌ: Kuisá apa to nibábehi. Peita, Kubungkáhiákou babaꞌ to tiꞌara ara ntaniꞌ to peisá motuko, láwiꞌ Kuisá woꞌo kamaróhóna pepoináláimi tiꞌara piꞌi hanoumbá. Agáiáná nipeuláꞌi mani laluitaNgkuꞌ, hai tiꞌara woꞌo nisápuáka kanipoináláiNgkuꞌ.

⁹Araheꞌ tauna i oloꞌmi to manguliꞌ kahiraraꞌ toIahudiꞌ, agáiáná modongkoꞌheꞌ, láwiꞌ i laluraꞌ, tiꞌaraheꞌ toIahudiꞌ, topegurunaraheꞌ Datu Tokadake. Tauna iti, ina Kuánti mai i kómu, bona molingkuduheꞌ i lindoꞌmi, hai ina raisá kaKódóꞌna to mampokaꞌahiꞌkou.

¹⁰Ánti kanipeuláꞌina hawaꞌKuꞌ to manguliꞌ hangaa-ngaa mantahakou, onoꞌ miꞌi haneꞌi ina Kukámpái ntepuꞌukou hangko i tempó kapári to ina morampe humalele duniáꞌ.[33] Upu-upu tauna to tiꞌara mepoinálái to toroꞌ i duniáꞌ i tempó kapári iti, ina molámbiꞌheꞌ kapári.

¹¹Tiꞌara piꞌi marue ina haweꞌAꞌ i karongkánina, mewaliꞌ hangaa-ngaa nitibaaꞌ oaꞌ pepoináláimi, bona ineeꞌkou maꞌala rapakanawoꞌ, álána tatali datu to napatimamamokou Pueꞌ Ala ánti penangimi, raꞌala tauna ntániꞌna.

¹²Heáná to menangi, ina toroꞌheꞌ i surugáꞌ duuꞌna i rue-ruena. Ina Kupopewaliꞌheꞌ nodo áriꞌi to mopakaróhó Támbina Pueꞌ Ala to indoreá. I wátáraꞌ ina Kuꞌukiꞌ hangaꞌna Pueꞌ Ala UmáNgkuꞌ hai hangaꞌna kótána Pueꞌ Ala. Kótá iti ia miꞌi Ierusale to Woꞌu[34] to ina mendáulu mai hangko i Pueꞌ Ala UmáNgkuꞌ i surugáꞌ. Noꞌonoꞌ woꞌo ina Kuꞌukiꞌ i wátáraꞌ hangaꞌKuꞌ to woꞌu, tandaꞌ kahirana taunáNgkuꞌ.

¹³Hangaa-ngaa nipailalu apa to nauliꞌ Inao to Magasaꞌ i jemaꞌa-jemaꞌa.”

¹⁴[35] Roo onoꞌ, nauliꞌ wopiꞌi Pueꞌ Iesu i kódóꞌ, “Nuꞌukiꞌ miꞌi laluita deꞌe haweꞌ i tadulako to mokádipurá jemaꞌa i kótá Laodikia: Deꞌe miꞌi laluitana Pueꞌ Iesu, to rauliꞌ ‘Ami’.[36] Ia miꞌi Sabiꞌ to tetidaꞌ hai mopahaweꞌ oaꞌ apa to toꞌu. Ia miꞌi Pentóáꞌána upu-upu to napopewaliꞌ Pueꞌ Ala.[37]

¹⁵Nauliꞌ: Kuisá apa to nibábehi. Tiꞌara mate pepoináláimi, tiꞌara woꞌo bukeꞌ-bukeꞌ. Nodokou uwai to tiꞌara malaheꞌ, tiꞌara woꞌo maꞌámuꞌ. Rángimi malaheꞌ ba maꞌámuꞌ.

¹⁶Láwiꞌ tiꞌarakou maꞌámuꞌ hai tiꞌarakou woꞌo malaheꞌ, nodo pekou uwai to peamuꞌalo, onoꞌ miꞌi haneꞌi ina Kuhupáránga pekou.

¹⁷Niuliꞌ pebukumokou, maroꞌa miꞌi katueꞌmi, tiꞌara piꞌi ara kamakuraꞌmi. Agáiáná tiꞌara niꞌisá kanoumbáꞌámi! Katoꞌuána i pepoináláimi, meahiahiꞌkou, bilokou, hai menggelákou.

¹⁸Onoꞌ miꞌi haneꞌi Kuweꞌikou laluita deꞌe: Mohólókou i Kódóꞌ buláwá to rapamagasaꞌ miꞌi i api,[38] waruꞌ to bulá nipopoháláꞌ wátámi bona tiꞌarakou mahili, hai mohólókou pákupu mata bona peisákou meita. Ane iti to nibábehi, ina pebukukou i pepoináláimi.

¹⁹Upu-upu tauna to Kupokaꞌahiꞌ, Kukámbáróá hai Kupaturoꞌ. Onoꞌ miꞌi haneꞌi Kuhángáꞌákou, hangaa-ngaa nipakaróhó lalumi, hai menosoꞌmokou!

²⁰Kódóꞌ deꞌe, meángkáꞌAꞌ i babaꞌ, hai Kukadoꞌ babaꞌ iti. Ane ara to mohádi wambaꞌKuꞌ hai mobungkáhi babaꞌ iti, ina mesuaꞌAꞌ hai toroꞌ hingkakani hai ia, hai ina mandeꞌangkaiꞌ hingkakani ánti pohintuwuꞌkiꞌ.

²¹Heáná to menangi, ina Kupopehoda hingkakani hai Kódóꞌ i pehodaꞌá kadatuáNgkuꞌ, nodo woꞌo Kódóꞌ menangiAꞌ, hai mehodaꞌAꞌ mepárentá hingkakani hai UmáNgkuꞌ i pehodaꞌá kadatuáNa.

²²Hangaa-ngaa nipailalu apa to nauliꞌ Inao to Magasaꞌ i jemaꞌa-jemaꞌa.”