Read Besoa Pampetudeꞌá 5 Bible Online

Pampetudeꞌá 5 - Besoa bible

Pampetudeꞌá 5

¹Hangko ionoꞌ, kuita wopiꞌi, ara sura to tepilóló i tae kuánána Hadua to mehoda i pehodaꞌá kadatuá. Sura iti bukeꞌ hai ukiꞌ potimbali, rapilóló, haneꞌi rapetándái hai pitu wuaꞌna petándái.[42]

²Kuita ara hadua malaꞌeka to maróhó ntepuꞌu monganga napasimbuku, nauliꞌ, “Heáná to hintotoꞌ mobungkáhi sura deꞌe? Heáná to hintotoꞌ mobungkáhi petándáina?”

³Tiꞌara mpuꞌu ralámbiꞌ hadua to peisá mobungkáhi sura iti hai mampeita óntóꞌna. Mogalo i surugáꞌ ba i duniáꞌ ba i katoroꞌá tomate, tiꞌara ara hadua to nabuku.

⁴Teriaꞌaꞌ ánti kawiorangkuꞌ, láwiꞌ tiꞌara ara hadua to ralámbiꞌ to hintotoꞌ mobungkáhi sura iti hai mobásá óntóꞌna.

⁵Roo onoꞌ, hadua hangko i totosae to rompuloꞌ hai iba mohángáꞌáꞌáꞌaꞌ, “Ineeꞌmokoꞌ teriaꞌ. Peita! Ara Hadua to rahangaꞌ Singá Pemuleꞌána Iudá,[43] pemuleꞌána woꞌo Datu Daudiꞌ.[44] Ia to menangi miꞌi, onoꞌ miꞌi haneꞌi Ia peá to makuasaꞌ mobungkáhi petándáina hai mobungkáhi sura iti.”

⁶Roo onoꞌ, kuita Iesu to rapándiriꞌ nodo Ánáꞌ Dimbá[45] meángkáꞌ i hintáiꞌna pehodaꞌá kadatuá iti to rapaitangaꞌ pinatueꞌ to iba hai totosae. Ánáꞌ Dimbá iti ara to bálána nodo to rasambale. TánduꞌNa pitu wuaꞌna, hai pitu woꞌo wuaꞌna mátáNa. MátáNa to pitu iti, lempóna Inaona Pueꞌ Ala to mampopolumao pitu pákáꞌna bágóꞌ. Ia mohuoꞌ Inaona iti lao i humalele duniáꞌ.

⁷Ánáꞌ Dimbá iti lao moala sura iti hangko i tae kuánána Hadua to mehoda i pehodaꞌá kadatuá.

⁸I kaNaꞌalana sura iti, pinatueꞌ to iba hai totosae to rompuloꞌ hai iba mopalumbáheꞌ i bitina Ánáꞌ Dimbá. Upu-upuheꞌ motibaaꞌ kasapi hai pemboliá buláwá to bukeꞌ hai dupaꞌ. Dupaꞌ iti, lempóna pekakaeraꞌ taunána Pueꞌ Ala.

⁹Monani-naniheꞌ hampákáꞌ nani to woꞌu, rauliꞌ: “Io miꞌi to hintotoꞌ moala sura iti hai mobungkáhi petándáina láwiꞌ rapapatemoKoꞌ. Moliu waheꞌMu to moili i kamateMu, Nupopohómpókimoheꞌ tauna i humalele duniáꞌ, i upu-upu kadatuá, i upu-upu pemuleꞌá hai i upu-upu básá, haneꞌi Nuhuhuꞌheꞌ i Pueꞌ Ala.

¹⁰Nupopewaliꞌmoheꞌ nodo datu hai tadulako menómbá, hai ina mepárentáheꞌ nodo datu i wongko duniáꞌ.”

¹¹Roo onoꞌ, kuitaheꞌ malaꞌeka to handaꞌ ntepuꞌu to tiꞌara peisá raimbaꞌ, hai kuhádi wambaꞌraꞌ. Meángkáꞌheꞌ motolelingi pehodaꞌá kadatuá hai pinatueꞌ to iba hai totosae iti.

¹²Monaniheꞌ rapasimbuku, rauliꞌ: “Ánáꞌ Dimbá to rasambale, hintotoꞌ ntepuꞌu tabiláꞌ hai tatóiá. Tapomahile hangaꞌNa, tapahaweꞌ kamaróhóNa, tatóiá ntepuꞌu peawaꞌNa, tabuhinao kamapándeNa, hai tabámbári kamakuasaꞌNa!”

¹³Roo onoꞌ, kuhádi wopiꞌi upu-upu to tueꞌ i surugáꞌ, i duniáꞌ, i katoroꞌá tomate, hai i lalu tahiꞌ; upu-upu to tueꞌ monaniheꞌ node: “Tatóiá, tabiláꞌ, hai tapomahile hangaꞌNa Pueꞌ Ala to mehoda i pehodaꞌá kadatuá hai Ánáꞌ Dimbá. Tabámbári kamakuasaꞌNa duuꞌna i rue-ruena!”

¹⁴Rahániki pinatueꞌ to iba iti, “Ami!” hai totosae iti mopalumbámoheꞌ menómbá i Hia.