Read Besoa Pampetudeꞌá 6 Bible Online

Pampetudeꞌá 6 - Besoa bible

Pampetudeꞌá 6

¹Roo onoꞌ, kuita Iesu to rapándiriꞌ nodo Ánáꞌ Dimbá mobungkáhi petándái to kaꞌisáꞌ hangko i pitu wuaꞌna petándái iti. Kuhádi hambaꞌa hangko i pinatueꞌ to iba iti mekióꞌ napasimbuku nodo pokániꞌ gumpataꞌ, nauliꞌ, “Maimokoꞌ!”

²Hangkaꞌ-hangkaꞌ perái, kuita hambaꞌa dárá to bulá. To mesaweꞌ i dárá iti motibaaꞌ panaꞌ, hai raweꞌi hambuaꞌ tatali, tandaꞌ penangina. Ia lao mombeala bona monangi ewálina.

³Roo onoꞌ, Ánáꞌ Dimbá mobungkáhi wopiꞌi petándái to kaduá, hai kuhádi pinatueꞌ to karombáꞌána manguliꞌ, “Maimokoꞌ!”

⁴Haweꞌ wopiꞌi hambaꞌa dárá. Dárá iti malei ntepuꞌu, hai to mesaweꞌ i dárá iti raweꞌi kuasaꞌ mogero pohintuwuꞌraꞌ tauna i duniáꞌ duuꞌraꞌ mombepapateheꞌ. Hai raweꞌi woꞌo hamata pihoꞌ to mahile.[46]

⁵Ánáꞌ Dimbá mobungkáhi wopiꞌi petándái to katálu, hai kuhádi pinatueꞌ to katáluna manguliꞌ, “Maimokoꞌ!” Kuita wopiꞌi hambaꞌa dárá. Dárá iti maiti hai to mesaweꞌ i dárá iti motibaaꞌ hambuaꞌ popetimbá.[47]

⁶I kapesupaꞌna dárá to maiti iti, kuhádi to nodo wambaꞌ to molaluita hangko i tangaꞌraꞌ pinatueꞌ to iba, nauliꞌ, “Saroraꞌ hangalo[48] gáná rapopehóló bahiꞌ hakiló peá, ba bailoꞌ tálu kiló, láwiꞌ tiꞌara gáná pandeꞌ. Agáiáná ineeꞌ nupakarugiꞌ kau saitu ba hinoe anggoroꞌ, {láwiꞌ raparaluu i katueꞌraꞌ}.”

⁷Roo iti, Ánáꞌ Dimbá mobungkáhi wopiꞌi petándái to kaꞌiba, hai kuhádi pinatueꞌ to kaꞌibána manguliꞌ, “Maimokoꞌ!”

⁸Kuita wopiꞌi hambaꞌa dárá to bugaꞌ. Hangaꞌna to mesaweꞌ i dárá iti ia miꞌi “Kapate,” hai to meuláꞌ i hia rahangaꞌ “Katoroꞌá Tomate.” To rodua iti raweꞌiheꞌ kuasaꞌ mopapate hanggáláꞌ iba hangko i upu-upu tauna. Araheꞌ to rapapate i lalu pombeala, araheꞌ to mate marimi, araheꞌ to mate narampe hakiꞌ to humalele, hai araheꞌ woꞌo to rapapate binataꞌ to pehakaꞌ.

⁹Roo onoꞌ, kuita wopiꞌi Ánáꞌ Dimbá mobungkáhi petándái to kalima. Kuita i wóiꞌ paintuá popenómbá,[49] araheꞌ tánuánáꞌraꞌ tauna to rapapate ánti kamampoináláiraꞌ ngkóráꞌna Pueꞌ Ala hai kamopahaweꞌraꞌ bámbári kana i Iesu Pueꞌraꞌ.

¹⁰Mekióꞌheꞌ rapasimbuku, rauliꞌ, “Ó Pueꞌ to makuasaꞌ, magasaꞌ hai manótó! Hangapa mani kamaruena hangko Nupakanótó riꞌi hukuraꞌ tauna i duniáꞌ to mopapateangkaiꞌ, hai Nuháwángi bábehiáraꞌ iti.”[50]

¹¹Tánuánáꞌ to kuita iti, upu-upuheꞌ raweꞌi kumbá to bulá hantau-hantau, hai Pueꞌ Ala mohángáꞌáꞌáheꞌ, “Nipegiá sieruꞌ, láwiꞌ ara mani rángámi to hampopobágóꞌmi hai halalu hampepepoináláimi to ina rapapate nodo woꞌo kómu. Ane magáná miꞌi imbaꞌna tauna to mepoinálái to rapapate, hangko Kuháwángiraheꞌ ewálimi.”

¹²Roo onoꞌ, kuita wopiꞌi Ánáꞌ Dimbá mobungkáhi petándái to kaꞌini. Hangkaꞌ-hangkaꞌ perái melinu to rumihi, alo mewaliꞌ makáindi nodo buri, hai wulá mewaliꞌ malei nodo waheꞌ.

¹³Betue iumbá-umbá peá manawoꞌ hangko i langiꞌ tóá i duniáꞌ, nodo kamanawoꞌna wuaꞌngkau to tiꞌara mani mangka ane narumpai wui to rumihi.

¹⁴Hangkaꞌ-hangkaꞌ perái, langiꞌ tepilóló nodo aleꞌ,[51] upu-upu buluꞌ hai upu-upu puló i tahiꞌ tegesuꞌ hangko i kaꞌaraꞌána.[52]

¹⁵I tempó iti, datu-datu i duniáꞌ, tuꞌáná, tadulako pombeala, topebuku, tauna to makuasaꞌ hai upu-upu tauna ntániꞌna to tiꞌara mepoinálái, haweꞌ-haweꞌ i tauna biásá hai hawiꞌ, mebuniheꞌ i lalu balamba ba i hiliꞌ-hiliꞌ watu to mahile,

¹⁶hai monganga-ngangaheꞌ rapasimbuku, rahángáꞌá buluꞌ hai watu, “Nutámbungiangkaiꞌ hai nuháláꞌangkaiꞌ hangko i peitána Hadua to mehoda i pehodaꞌá kadatuá, bona tiꞌaraꞌangkaiꞌ narampe pehuku hangko i Ánáꞌ Dimbá to ina haweꞌ!”

¹⁷Láwiꞌ haweꞌ miꞌi alo to meriringkuꞌi.[53] Mewaliꞌ i tempó iti, Pueꞌ Ala hai Ánáꞌ Dimbá ina mohukuheꞌ,[54] hai tiꞌara ara hadua tauna to nabuku mengkatueꞌ.