Read Besoa Pampetudeꞌá 8 Bible Online

Pampetudeꞌá 8 - Besoa bible

Pampetudeꞌá 8

¹Kanabungkáhina Iesu to rapándiriꞌ nodo Ánáꞌ Dimbá petándái to kapituna, kásáliu maniiꞌ rawa i surugáꞌ rekeꞌ-rekeꞌna hantangaꞌ jaa, mampegiáheꞌ apa to ina mewaliꞌ.

²Kuita pitu malaꞌeka to meángkáꞌ i lindoꞌna Pueꞌ Ala. Malaꞌeka to pitu iti raweꞌi pitu tamburuꞌ.

³Hangko ionoꞌ, haweꞌ miꞌi hadua malaꞌeka to ntániꞌna to meángkáꞌ i paintuá dupaꞌ.[59] Malaꞌeka iti moánti hambuaꞌ pemboliána dupaꞌ to rabábehi hangko i buláwá, hai dupaꞌ to handaꞌ raweꞌi bona nahunu tempóna upu-upu taunána Pueꞌ Ala mekakae.[60] Dupaꞌ iti nahunu i wongko paintuá dupaꞌ to rabábehi hangko i buláwá to ara i lindoꞌna pehodaꞌána Pueꞌ Ala.

⁴I kanahununa dupaꞌ iti, mengkaoreꞌ miꞌi rámbuna i lindoꞌna Pueꞌ Ala, hai pekakaeraꞌ taunána Pueꞌ Ala haweꞌ woꞌo i Hia.

⁵Roo onoꞌ, malaꞌeka iti moala miꞌi pemboliána dupaꞌ, naóntóki hai api to hangko i paintuá dupaꞌ duuꞌna bukeꞌ, haneꞌi natelánga i duniáꞌ. Hangko ionoꞌ, megumpataꞌ miꞌi, mekiláꞌ, hai melinu.

⁶Malaꞌeka to pitu iti ininá, hadua-hadua motibaaꞌ tamburuꞌ mampatimamamoheꞌ ina motawueꞌ.

⁷Malaꞌeka to kaꞌisáꞌ motawueꞌ tamburuꞌna. Kásáliu ara udá to mowuaꞌ, api hai waheꞌ hangko i langiꞌ tóá i duniáꞌ. Hanggáláꞌ tálu óntóꞌ duniáꞌ, haweꞌ-haweꞌ i hanggáláꞌ tálu kakau hai upu-upu rumpuꞌ to makodaraꞌ, naꞌandeꞌ api.

⁸Malaꞌeka to kaduá motawueꞌ woꞌo tamburuꞌna. Kuita to nodo hambuaꞌ buluꞌ to mahile roreꞌ nodo api. Buluꞌ iti ratelánga i lalu tahiꞌ álána hanggáláꞌ tálu tahiꞌ iti mambáliꞌ mewaliꞌ waheꞌ.

⁹Mate hanggáláꞌ tálu hangko i upu-upu to tueꞌ i lalu tahiꞌ, hai tiri hanggáláꞌ tálu hangko i upu-upu kapalaꞌ to ara i wongko tahiꞌ.

¹⁰Malaꞌeka to katálu motawueꞌ woꞌo tamburuꞌna. Kásáliu hambuaꞌ betue to mahile to roreꞌ nodo awaa manawoꞌ hangko i langiꞌ. Betue iti motámbungi hanggáláꞌ tálu hangko i upu-upu uluna uwai to poili hai uwai to tumbuꞌ.

¹¹Hangaꞌna betue iti, “Mapaiꞌ”, onoꞌ miꞌi haneꞌi hanggáláꞌ tálu hangko i upu-upu uwai mewaliꞌ mapaiꞌ, hai handaꞌ tauna mate láwiꞌ mainuheꞌ uwai to mapaiꞌ iti.

¹²Malaꞌeka to kaꞌiba motawueꞌ woꞌo tamburuꞌna. Kásáliu hanggáláꞌ tálu hangko i alo, wulá hai betue teháláꞌ, álána hanggáláꞌ tálu hangko i pewangkaꞌraꞌ tiꞌara piꞌi mewangkaꞌ. Mewaliꞌ, ane kalialo, hanggáláꞌ tálu hangko i pewangkaꞌna alo tiꞌara mewangkaꞌ nodo biásá. Noꞌonoꞌ woꞌo ane káindi, hanggáláꞌ tálu hangko i pewangkaꞌraꞌ wulá hai betue tiꞌara mewangkaꞌ nodo biásá.

¹³Roo onoꞌ, kuita ara hambaꞌa koꞌaaꞌ to membara i laerawa. Kuhádi tádáhi iti molaluita napasimbuku, nauliꞌ, “Hurewuꞌ! Hurewuꞌ! Ina hurewuꞌheꞌ tauna to toroꞌ i duniáꞌ, láwiꞌ tálu mani malaꞌeka to ina motawueꞌ tamburuꞌraꞌ.”