Read Besoa Ruti 1 Bible Online

Ruti 1 - Besoa bible

Ruti 1

¹Hangkoia, hangko tiꞌara maniheꞌ podatu i tampoꞌ Sáráeliꞌ,[1] tampoꞌ iti narampe rimi. I tempó iti, ara hadua tobaleilo to rahangaꞌ Elimeleꞌ. Ia toEparata. Ia toroꞌ i Beteleme i tampoꞌ Iudá. Ánti kamarimi iti, ia melimbá lao i tampoꞌ Moabiꞌ[2] hingkakani hai toinána to rahangaꞌ Naomiꞌ hai roduaheꞌ ánáꞌna tobaleilo, Maloni hai Kilio. Toroꞌheꞌ ionoꞌ bahangapa parena kamaruena.

³Tempóraꞌ mani ionoꞌ, Elimeleꞌ mate miꞌi, mewaliꞌ mentárá perái Naomiꞌ hai ánáꞌna rodua.

⁴Ánáꞌna to rodua iti mehambokoheꞌ i ánáꞌntawine toMoabiꞌ to rahangaꞌ Oupa hai Ruti. Maloni mohamboko hai Ruti,[3] Kilio mohamboko hai Oupa.

⁵Liu miꞌi hampuloꞌ parena, matemoheꞌ woꞌo ánáꞌna to rodua, mewaliꞌ Naomiꞌ napálehi miꞌi toámána hai ánáꞌna to rodua.

⁶Bahangapa kamaruena hangko ionoꞌ, Naomiꞌ mohádi bámbári powiáꞌraꞌ toSáráeliꞌ nawátiꞌ PUEꞌ. Hangko ionoꞌ, ia hai mániánaheꞌ mangkádipurámoheꞌ ina mopálehi tampoꞌ Moabiꞌ.

⁷Pohuꞌ mpuꞌumoheꞌ Naomiꞌ ina mesuleꞌ lao i tampoꞌ Iudá, hingkakani hai mániánaheꞌ to rodua.

⁸Tangaꞌraꞌ molumao, molaluita miꞌi Naomiꞌ i mániánaheꞌ to rodua, nauliꞌ node: “Mesuleꞌmokou, lao i támbina inámi hadua-hadua. Kupembiáꞌ bona PUEꞌ mopatongawaꞌ ahiꞌNa i kómu nodo kamaꞌahiꞌmi i kódóꞌ hai i toámámi to matemoheꞌ.

⁹Hampóáꞌworia paꞌi PUEꞌ moweꞌi wopakou toámámi bona maroꞌa katueꞌmi.” Kaupuraꞌ peá napolaluitaꞌá, Naomiꞌ mesabiꞌ miꞌi i mániánaheꞌ, haneꞌiheꞌ naꞌángki. Agáiáná Oupa hai Ruti liliuheꞌ teriaꞌ rapasimbuku,

¹⁰hai molaluitaheꞌ i Naomiꞌ, rauliꞌ, “Tiꞌara Inaꞌ! Bateꞌ-bateꞌkiꞌ peá meuláꞌ i hio, lao toroꞌ hingkakani hai halalumu.”

¹¹Agáiáná nahániki Naomiꞌ, nauliꞌ, “Mesuleꞌmokou. Moapa riꞌi haneꞌi meuláꞌ manikou i kódóꞌ? Tiꞌara paꞌi niꞌisá, kódóꞌ deꞌe tiꞌarapoꞌ ina moánáꞌ to ina nipotoama?

¹²Mesuleꞌmokou, láwiꞌ kódóꞌ deꞌe matoinamoꞌ, tiꞌarapoꞌ ina motoama. Rápáꞌna ane peisá maniaꞌ motoama wengi deꞌe, hai moánáꞌaꞌ tobaleilo,

¹³sabaraꞌkou paꞌi mampegiá haweꞌ kamanginaoáraꞌ?[4] Ineeꞌnto onoꞌ mopatuhukou ina motoama. Ineeꞌkou noꞌonoꞌ. Tiꞌara paꞌi niꞌisá, mapári mani i kódóꞌ haneꞌi i kómu, láwiꞌ PUEꞌ moewaꞌaꞌ.”

¹⁴Teriaꞌ wopaheꞌ mániána iti, haneꞌi Oupa moángki pengántiꞌina, mepálákáná, agáiáná Ruti tiꞌara mau megááki hangko i pengántiꞌina.

¹⁵Nauliꞌ Naomiꞌ, “Ruti. Peita. Lagoꞌmu pohuꞌ miꞌi ina mesuleꞌ lao i tinána hai i ánituna. Meuláꞌmokoꞌ i hia!”

¹⁶Agáiáná nauliꞌ Ruti, “Inaꞌ, ineeꞌaꞌ nupasimbuku meuláꞌ i hia hai mopálehikoꞌ. Kódóꞌ deꞌe-deꞌe, bateꞌ-bateꞌkuꞌ peá meuláꞌ i hio. Iumbá kalaoámu, ionoꞌ woꞌo kalaoángkuꞌ. Iumbá katoroꞌámu, ionoꞌ woꞌo katoroꞌángkuꞌ. Halalumu, onoꞌ woꞌo to kupohalalu. Pueꞌ Ala to nupenómbái, Ia woꞌo to kupenómbái.

¹⁷Iumbákoꞌ mate, ionoꞌaꞌ woꞌo mate hai ratawu. Mahile salaꞌkuꞌ i lindoꞌna PUEꞌ ane ara to mogááꞌkeꞌ i rawa hangko i kapate.”

¹⁸I kanaisána Naomiꞌ nasokaꞌ peá Ruti ina meuláꞌ, ia tiꞌara piꞌi molaluita.

¹⁹Hangko ionoꞌ, rapaliliu polumaoraꞌ lao i Beteleme. Kahaweꞌraꞌ ionoꞌ, upu-upu tauna to i wánuá iti tingkáráꞌheꞌ. Upu-upu towawine mombekuneꞌ-kuneꞌheꞌ, rauliꞌ, “Ee! Tiꞌara paꞌi Naomiꞌ doꞌo?”

²⁰Nauliꞌ Naomiꞌ, “Ineeꞌmoꞌ nikióꞌ Naomiꞌ {lempóna: góeꞌ}. Rángina nikióꞌmoꞌ Mara {lempóna: mapári kuhádi}, láwiꞌ handaꞌ kapári to kulámbiꞌ hangko i Pueꞌ Ala to Makuasaꞌ.

²¹I kapohuꞌkuꞌ hangko ieneꞌ, katueꞌkuꞌ bukeꞌ hai kamaroꞌa. Agáiáná deꞌe-deꞌe napopesuleꞌaꞌ ntooꞌ PUEꞌ. Onoꞌ miꞌi haneꞌi ineeꞌmoꞌ nikióꞌ Naomiꞌ, láwiꞌ PUEꞌ to Makuasaꞌ moewaꞌaꞌ haneꞌi handaꞌ kapári to kulámbiꞌ.”

²²Noꞌonoꞌ miꞌi daritakáná pesuleꞌna Naomiꞌ hangko i tampoꞌ Moabiꞌ hingkakani hai Ruti mániána, toMoabiꞌ. Kahaweꞌraꞌ i Beteleme tempóraꞌ mantepuꞌu mepare.