Read Besoa Ruti 3 Bible Online

Ruti 3 - Besoa bible

Ruti 3

¹Hangkani tempó, Naomiꞌ molaluita i Ruti, nauliꞌ, “Hangaa-ngaa kupopohambokokoꞌ, bona ara to mokádipurákoꞌ.

²Io mobágóꞌkoꞌ hingkakani hai towawine topobágóꞌna Boasi, hai Boasi iti halaluna toámángkuꞌ. Mewaliꞌ nupehádingi! Deiná kalumbaꞌ, ia ina lao mowiri pare i pobántiána.

³Mewaliꞌ medóimokoꞌ deꞌe-deꞌe, mopakeꞌkoꞌ wongi-wongi hai mewaruꞌkoꞌ to mababe,[9] haneꞌikoꞌ lao i kaꞌaraꞌána Boasi i pobántiá pare. Nupegiá ionoꞌ haweꞌ upu mandeꞌ hai mainu. Agáiáná ineeꞌ mpiiꞌkoꞌ naita.

⁴Tempóna maturu, nupailalu iumbá paturuána. Ane letaꞌ miꞌi, laomokoꞌ ionoꞌ, hai nuhungkáki kómóꞌna to i bitina haneꞌi maturukoꞌ hungkuꞌ ionoꞌ. Ina nahángáꞌáramokoꞌ apa to hangaa-ngaa nubábehi.”

⁵Nauliꞌ Ruti, “Maroꞌa, Inaꞌ. Ina kupeuláꞌi upu-upuna to nuꞌuliꞌ.”

⁶Mewaliꞌ lao mpuꞌu miꞌi Ruti i pobántiá pare. Ionoꞌ napeuláꞌi mpuꞌu miꞌi upu-upu to napatuntuá pengántiꞌina.

⁷Karoona Boasi mandeꞌ hai mainu, maroꞌa miꞌi pehádina, lao miꞌi maturu hungkuꞌ i potámbungáꞌá pare. Tiꞌara marue hangko ionoꞌ, haweꞌ miꞌi Ruti ngkániiꞌ-niiꞌ hai lao mohungkáki kómóꞌna Boasi to i bitina, haneꞌi maturu hungkuꞌ ionoꞌ.

⁸Laembengi, hangkaꞌ-hangkaꞌ pehádi miꞌi Boasi haneꞌi menggoli. Ia tingkáráꞌ manginta ara hadua towawine to maturu hungkuꞌ i bitina.

⁹Nakuneꞌ, “Heánákoꞌ?” Mehániꞌ Ruti, “Kódóꞌnto tuá, Ruti hawiꞌmu. Io halalungkiꞌ to hungkuꞌ mani, to hintotoꞌ mokádipurá katueꞌkuꞌ, mewaliꞌ ane nupokanai, kódóꞌ miꞌi mewaliꞌ toinámu.”[10]

¹⁰Nauliꞌ Boasi, “Hampóáꞌworia paꞌi PUEꞌ mowátiꞌkoꞌ, láwiꞌ apa to nubábehi deꞌe-deꞌe, melumbuꞌ mani kamaroꞌana hangko i apa to nubábehi miꞌi i pengántiꞌimu. Tiꞌarakoꞌ mampeliꞌ to maleheꞌ mani to ina mewaliꞌ toámámu i oloꞌraꞌ tauna to pebuku ba to peahiahiꞌ.

¹¹Mewaliꞌ ineeꞌ karaoꞌ inaomu, Ruti. Upu-upu to nupembiáꞌ ina kubukeki, láwiꞌ i wánuá deꞌe, raisá miꞌi kaꞌiona towawine to maroꞌa ntepuꞌu.

¹²Ambiꞌ toꞌu, hangaa-ngaa kuhómpóki katueꞌmu láwiꞌ halalumiaꞌ to hungkuꞌ. Agáiáná, ara mani tauna ntániꞌna to hangaa-ngaa mohómpóki katueꞌmu, hai ia woꞌo halalumi to hungkuꞌ mani i kómu haneꞌi kódóꞌ.

¹³Mewaliꞌ wengi deꞌe ieneꞌmokoꞌ. Kahalo mepulo ina laoaꞌ mekuneꞌ, ba maui halalumi iti mokádipurákoꞌ ba tiꞌara. Ane maui, maroꞌa. Agáiáná ane tiꞌarai mau, kudándi i lindoꞌna PUEꞌ, kódóꞌ miꞌi to ina mohómpóki katueꞌmu. Maturumokoꞌ deꞌe-deꞌe duuꞌna mebabaeaꞌ.”

¹⁴Mewaliꞌ maturu mpuꞌu miꞌi Ruti hungkuꞌ i bitina Boasi. Mebabaeaꞌ mani, mearó miꞌi Ruti hangko tiꞌara mani raisá tauna, láwiꞌ nauliꞌ Boasi, “Ineeꞌ raisá tauna ara towawine ieneꞌ i pobántiá pare.”

¹⁵Nauliꞌ Boasi i Ruti, “Ala mai iti kumbámu hai nuwálá i hindeꞌe.” Naꞌala miꞌi Ruti kumbána haneꞌi nawálá. Nabubuha Boasi pare rekeꞌ-rekeꞌna rompuloꞌ kilóna i kumbána, haneꞌi naꞌángkáꞌ nahumpádá i wángána Ruti. Roo onoꞌ, mesuleꞌ miꞌi Boasi lao i wánuá Beteleme.

¹⁶Kahaweꞌna Ruti i támbi, nakuneꞌ pengántiꞌina, “Mewaliꞌ, noumbá miꞌi?” Onoꞌ haneꞌi napodarita miꞌi Ruti upu-upu to nabábehiá Boasi,

¹⁷hai nauliꞌ, “Ia to mampoweꞌiaꞌ pare to handaꞌ deꞌe, láwiꞌ nauliꞌ, kódóꞌ tiꞌaraꞌaꞌ peisá mesuleꞌ ntooꞌ i hio.”

¹⁸Nauliꞌ Naomiꞌ, “Nupegiá peá. Ina nuita apa to pewaliꞌ. Boasi tiꞌara ina mengkaroo ane tiꞌara mani nabukeki dándina i hio i alo dehangaloá.”