Read Besoa Ruti 4 Bible Online

Ruti 4 - Besoa bible

Ruti 4

¹Boasi lao mehoda i poromu-romuá to hungkuꞌ i babaꞌá wánuá. Tiꞌara marue mehoda-hoda ionoꞌ, haweꞌ miꞌi halaluna Elimeleꞌ to hungkuꞌ mani. Nakióꞌ miꞌi Boasi, nauliꞌ, “Maikoꞌ mehoda i hindeꞌe.” Tauna iti lao mpuꞌu miꞌi mehoda.

²Hangko ionoꞌ, napileꞌimoheꞌ Boasi hampuloꞌ totosae, napembiáꞌ bona mehodaheꞌ hingkakani. Lao mpuꞌumoheꞌ mehoda.

³Roo onoꞌ, molaluita miꞌi Boasi i halaluna to nakióꞌ ininá, nauliꞌ, “Naomiꞌ mesuleꞌ miꞌi hangko i tampoꞌ Moabiꞌ. Ia ina mampobaluꞌ tampoꞌna, sosorana Elimeleꞌ halaluntaꞌ.

⁴Kupekiri hangaa-ngaa kupahaweꞌákoꞌ bona nuisá. Ane maukoꞌ mehóló, nupatongawaꞌ i lindoꞌraꞌ totosae hai tauna to handaꞌ deꞌe. Ane tiꞌarai, nupatongawaꞌ i katoꞌu-toꞌuána, láwiꞌ kitaꞌ perái rodua to peisá mohómpóki tampoꞌ iti, agáiáná io to hintotoꞌ mani haneꞌi kódóꞌ.”[11] Nahániki, “Mauntoaꞌ.”

⁵Hangko ionoꞌ, nauliꞌ wopiꞌi Boasi, “Maroꞌa ane noꞌonoꞌi. Agáiáná, ane nuhóló tampoꞌ iti hangko i Naomiꞌ, hangaa-ngaa nuala woꞌo Ruti, towawine toMoabiꞌ iti, bembaꞌna ánáꞌna Naomiꞌ, bona tampoꞌ iti bateꞌ-bateꞌna mewaliꞌ sosorana pemuleꞌána to mate miꞌi.”[12]

⁶I kanahádina noꞌonoꞌ, mehániꞌ tauna iti, “Ane noꞌonoꞌi, tiꞌara kubuku mohómpóki. Deꞌe-deꞌe kukábáhá miꞌi kakódóꞌna to hintotoꞌ ina mohómpóki tampoꞌ iti. Tiꞌara ara bunduꞌna kamohómpókingkuꞌ tampoꞌ iti láwiꞌ tiꞌara ina mepueꞌ i pemuleꞌángkuꞌ. Rángina miꞌi io to mohómpóki. Kódóꞌ, tiꞌaraꞌaꞌ mau.”

⁷Tempó iti, bona tongawaꞌ tampoꞌ ba párewá roo miꞌi rapobaluꞌ hai rapopasuláꞌ, ádáraꞌ toSáráeliꞌ node: hadua tauna moposu sandalena napeweꞌi i to haduána.

⁸Mewaliꞌ nauliꞌ tauna iti i Boasi, “Io miꞌi to mehóló.” Liliu naposu sandalena [haneꞌi napeweꞌi i Boasi].[13]

⁹Nauliꞌ Boasi i totosae hai tauna to handaꞌ, “Deꞌe-deꞌe, kómu mewaliꞌ sabiꞌ kakódóꞌna miꞌi to mohóló hangko i Naomiꞌ tampoꞌ hai párewá, sosorana Elimeleꞌ, Maloni hai Kilio.

¹⁰Hiolaꞌ hai onoꞌ, Ruti toMoabiꞌ iti bembaꞌna Maloni, kuala mewaliꞌ toinángkuꞌ, bona tampoꞌ iti mewaliꞌ mani sosorana pemuleꞌána Maloni to mate miꞌi. Noꞌonoꞌ woꞌo, hangaꞌna tiꞌara ina matántá hangko i oloꞌraꞌ tinána hai hangko i daritakáná wánuá Beteleme deꞌe. Alo deꞌe kómu mewaliꞌmokou sabiꞌkuꞌ.”

¹¹Totosae hai tauna to handaꞌ to ara i babaꞌá wánuá, molaluitaheꞌ, rauliꞌ, “Kaiꞌ deꞌe sabiꞌ. Hampóáꞌworia paꞌi PUEꞌ ina mowátiꞌ towawine iti to ina mewaliꞌ toinámu, bona handaꞌ pemuleꞌána nodo pemuleꞌáraꞌ Raheli hai Lea hangkoia. Hira to momuleꞌákaheꞌ toSáráeliꞌ. Kipembiáꞌ bona raitakoꞌ tauna i oloꞌraꞌ toEparata, bona tekahangaꞌiákoꞌ i Beteleme deꞌe.

¹²Moliu ánáꞌmuheꞌ to ina naweꞌikoꞌ PUEꞌ hangko i towawine to maleheꞌ mani iti, kipembiáꞌ bona pemuleꞌámu ina handaꞌ nodo pemuleꞌánaheꞌ toiorumu Peresi, ánáꞌna Tama hai Iudá.”[14]

¹³Mewaliꞌ Boasi moala miꞌi Ruti napotoina, haneꞌi káláꞌeá miꞌi woꞌo Ruti láwiꞌ nawátiꞌ PUEꞌ hai moánáka hadua ánángkóiꞌ tobaleilo.

¹⁴I karapoánákana, upu-upu towawine ionoꞌ molaluita i Naomiꞌ, rauliꞌ, “Kitóiá PUEꞌ, láwiꞌ alo deꞌe Ia mampoweꞌikoꞌ ueꞌmu tobaleilo to ina mokádipurákoꞌ. Tapembiáꞌ bona ánángkóiꞌ iti tekahangaꞌiá i humalele tampoꞌ Sáráeliꞌ.

¹⁵Mániámu to mampokaꞌahiꞌkoꞌ, mahile mani bunduꞌna haneꞌi pitu ánángkóiꞌ tobaleilo. Deꞌe-deꞌe ia moweꞌikoꞌ ueꞌmu tobaleilo to ina mopamaroꞌa pekirimu hai ina mokádipurákoꞌ duuꞌmu haweꞌ i kasae-saeámu.”

¹⁶Liliu narangaꞌ Naomiꞌ ánángkóiꞌ iti, naꞌawi, hai nakádipurá.

¹⁷Upu-upu towawine to toroꞌ i Beteleme mohangaꞌheꞌ ánángkóiꞌ iti Obeꞌ.[15] Rauliꞌ, “Naomiꞌ ara wopiꞌi ánáꞌna tobaleilo.” Obeꞌ miꞌi deꞌe to mewaliꞌ umána Isai, hai Isai ia miꞌi umána Datu Daudiꞌ.

¹⁸Deꞌe miꞌi toioruna Daudiꞌ, mantepuꞌu hangko i Peresi, haweꞌ-haweꞌ i Daudiꞌ. Peresi momuleáka Hesero. Hesero momuleáka Rama. Rama momuleáka Aminadaꞌ. Aminadaꞌ momuleáka Nahaso. Nahaso momuleáka Salomo. Salomo momuleáka Boasi. Boasi momuleáka Obeꞌ. Obeꞌ momuleáka Isai, hai Isai momuleáka Datu Daudiꞌ.