Read Biak MATIUS 16 Bible Online

MATIUS 16 - Biak bible

MATIUS 16

¹ Ḇarpur ya snon Farisi ma Saduki ono srama simarisen sifuken sye Yesus. Sor insa Yesus fyasnai faro si aḇyair oso ro boiyaswa.

² Ḇape Yesus kyarem faro si: “Ro mandira snar rep na narik, inja mkoḇo: Ras ya nari iḇrin,

³ma ro arwo babo snar rep na narik ma nkadum, inja mkoḇo nari rasya ipyum ba. Sananai nanki mkofawi mkomambir na ḇape aḇyair awar mkofawi na ḇa.

⁴ Syos ḇeḇarḇor ma ḇeso mnisḇa sine senamu sor aḇyair oso. Ḇape faro si nari koḇuk aḇyair oso ḇa derer aḇyair Nabi Yunus.” Raimnai Yesus ibur si.

⁵Rofyor Yesus manfamyan ḇyesi skaḇoruk danosen, sfanander sun mamami.

⁶ Yesus ikofen faro si: “Mkepen ma mkoḇesasor mko ro mur Farisi ma Saduki.”

⁷Ma skara ro mankunsi ma sikofenyae faro si: “Ikofen rarirya snar kun mamami ḇa.”

⁸Ma ro fafisu Yesus ifawi rosai ḇefnai fa sawosyae si, inja ikofen: “Snaro mkawawos ro mkun mamami ḇa?

⁹ Ne, snonkaku ḇekyar mnis ḇa! Mkofawi ḇaimke? Mkoswarepen ḇake mamami ririm faro snonkaku syaran ririm ma mkoryur bedawer na noken ri ḇeso?

¹⁰ Roḇaido mamami rifik faro snon syaran rifiak ma bedawer na mkoryur na ro inoken ri ḇeso?

¹¹Rariso mkofawiḇa ḇo mkoḇo yawos ro mamami, mamami naiso yakofen na ḇa. Yakofen faro mko: Mkoḇesasor ma mkepen mko ro mur kawasa Farisi ma Saduki.”

¹²Ro fafisu ya insape sifawi Yesus dawos insa sepen si ro mur mamami ḇa, ḇoi ro farkarkor snon Farisi ma Saduki.

¹³Yesus ryama kwar ro Kaisarea Filipi, ifuken faro manfamyan ḇyesi: “Kawasa sya soḇo, manseiso Rumkun Snonkaku ya?”

¹⁴ Skarem, ḇo soḇo: “Ono sikofen: Yohanes Ḇemasi, ono wer sikofen: Elia ma ono kako sikofen: Yermia roḇaido oso ro fandu nabisya.”

¹⁵Raimnai Yesus ifuken faro si: “Ḇape mko kada rosai mkakkofen, manseiso aya?”

¹⁶ Inja Simon Petrus kyarem, ḇo doḇo: “Au kada Wairek Rumkun Allah ḇekenem!”

¹⁷Yesus ikofen faro i: “Aski faro au Simon Yunus mandaḇen ḇyedi snar snonkaku riso ḇekofen ḇadir faro au ya ḇa, ḇoi Kma yedi ro boiyaswa.

¹⁸Ma aya kako yakofen faro au: Au irya Petrus ma ro karui orḇom ine nari yaḇawes jemaat ayedi ma mun aibui ipok i ḇa.

¹⁹ Faro au nari yaḇuk asyopder ḇaḇesasoser Boiyaswa. Rosai fes ro supswan ine nari neḇefes ro boiyas ma rosai per ro supswan ine nari neḇeper ro boiyaswa.”

²⁰Raimnai Yesus myunwark manfamyan ḇyesi insa sikofen ḇayir awer faro manseirya wer mḇoi irya Wairek.

²¹Rofyor ani Yesus ikofen ḇayir randak faro manfamyan ḇyesi nari ryaḇe Yerusalem ma ro diwa isma kandera nabor ro ḇeḇarara, mananir imam ma ḇefawi nananem Refo Yahudisya, isof smun i ḇape nari ḇyeḇeḇawes ro ras ḇeḇekior ya.

²²Ḇape Petrus pyaw Yesus fa isoi ma isonek i, ḇo doḇo: “Manseren, Allah myam monda awer roi ḇera dine! Roi ḇeḇesya ani ipok kyur awer au.”

²³Inja Yesus iknenef ma ikofen faro Petrus: “Biris wabur. Au karui ḇekarkar aya, snar kwara karkara Allah ḇyena ḇa, ḇoi karkara snonkaku.”

²⁴ Raimnai Yesus ikofen faro manfamyan ḇyesi: “Mansei ḇemarisen ḇeso aya, fyamyun mankundi, ḇoi ḇyar aprop ḇyedi ma iso aya.

²⁵ Snar mansei ḇeḇekuker kankenem ḇyedi, ikada nari kankenem ḇyedi ryo bur i; ḇape mansei kankenem ḇyedi ryobur i snar aya, ikada nari ismai kankenem ḇyedi.

²⁶Fandun rosai snonkaku oso isma supswan ine ḇesiper ḇape kankenem ḇyedi ryobur i? Inja rosai nari koḇuki syadweri ya?

²⁷ Snar Rumkun Snonkaku nari ryama kuker payamyum Kmari ma malaikat-malaikat ḇyesi siyaker i; rofyor ani nari myunsu faro snonkaku oser-oser raris rosai ifrur kwar.

²⁸Yakofen faro mko: Kaku ḇeri ro fandu snonkaku ḇeryur sine ono nari simar ḇa isof sakmam Rumkun Snonkaku ryama raris wairek ro Ḇaḇesasoser ḇyedi.”