Read Biak MATIUS 25 Bible Online

MATIUS 25 - Biak bible

MATIUS 25

¹ “Rofyor ani Ḇaḇesasoser Boiyaswa imnis inkbor samfur, ḇeyun parambrom sena ma sra sisrow manfakawinya.

²Rim ro fandu si sifawi royoḇa mḇoi rim ḇese sya sifawi nananem.

³Inkbor ḇefawi royoḇa ssun parambrom sena, ḇape ssun mani ḇa,

⁴mḇoi inkbor ririm ḇefawinananem ansi ssun parambrom sena ma mani kako ro botol sena.

⁵Ḇape snon manfakawin ani ryama fasauḇa isof enef ya myun si inja senef kam.

⁶Rofyor romfawru simnaf mkaren ḇeyor: Manfakawin ryama! Mkosrow i!

⁷Inkbor ansi sikbok kam ma sfasasos parambrom sena.

⁸Inkbor ḇefawi royoḇa ansi sikofen faro inkbor ḇefawinananem ansi: Mkoḇuk mani mkoḇena ono ḇeinko, snar parambrom nkoḇena fanam nambrer.

⁹Ḇape inkbor ḇefawinananem ansi sikofen: Roḇa, nari namnis faro nkoḇa ma faro mkoḇa kako. Ipyum syadi mkora faro ḇeḇoḇ mani ma mkokoḇes ro diwa.

¹⁰Ḇape rofyor sramura fa skoḇes mani ya, manfakawin ani ryama ma ḇefasos kwar ansi siyaker i ma ssun kuker i ro sim munara fakawin ani, posa kedwai ya ḇyeḇesisen.

¹¹ Ḇarpur ya inkbor ḇese ansi srama ma sikofen: Tuano, tuano, bas kedwai ya ma ḇe inko!

¹²Ḇape kyarem: Yakofen faro mko, kaku ḇeri yamam ḇaḇir mkoḇa.

¹³Rarirya, mkowaren, snar mkofawiḇa ras ma fafisu ya.”

¹⁴“Snar Ḇaḇesasoser Boiyaswa imnis raris snon ḇemarisen ḇesasyar ḇe mnu ḇese, inja dor manfamyan ḇyesi ma ḇyuk nana ḇyena faro si, kuker kakyar insa sifararur kuker na.

¹⁵Rarirya ḇyuk faro oso talenta ririm, faro oso wer suru ma faro oso wer ḇyuk oser, sisma raris samambraḇ sena, raimnai rya.

¹⁶Manfamyan ḇena talenta ririm ani rya fasau. Ifararur kuker pipi ansi ma isma syadi talenta ririm wer.

¹⁷Manfamyan ḇesma talenta risuru ani kako dakfararur rarirya ma isma syadi talenta risuru wer.

¹⁸Ḇape manfamyan ḇena talenta oser ani kada rya ma ḇyai saprop ya ma derak tuan ḇyedi pipi ḇyani.

¹⁹Fyoro kwar manfamyan ansi tuan sedi iburma ma ifrur karkor kuker manfamyan ḇyansi.

²⁰Manfamyan ḇena talenta ririm ani ryama ma dun syadi talenta ririm, ma ikofen ḇo doḇo: Tuan, talenta ririm iso wakyar ḇe aya; mame yasma syadi talenta ririm wer.

²¹Inja tuan ḇyani ikofen faroi: Fararur bedi ipyum kaku, ne, manfamyan ḇeḇye ma ḇeḇesyowi yedi; fasnai kwar ḇesyowi roi kasun, nari yaḇuk fa mamwarek roi ḇeba. Swun ma wakun aski ro tuan bedi.

²²Raimnai manfamyan ḇesma talenta risuru ani dakrama, ma ikofen: Tuan, talenta risuru suiso wakyarma ḇe aya; mame yasma syadi talenta risuru wer.

²³Inja tuan ḇyani ikofen faroi: Fararur bedi ipyum kaku, ne, manfamyan ḇeḇye ma ḇeḇesyowi yedi; fasnai kwar ḇesyowi roi kasun, nari yaḇuk fa mamwarek roi ḇeba. Swun ma wakun aski ro tuan bedi.

²⁴Insape manfamyan ḇena talenta oser ani dakrama ma ikofen, ḇo doḇo: Tuan, yafawi au snonkaku ḇeḇarḇor ḇeyuf ro moḇ kwekef ro ḇa ma ḇesrai ro moḇ rosai kwer ro ḇa.

²⁵Rarirya yamkak ḇo yara yerak talenta ḇani ro saprop ya dori: Talenta bani isoine! Tuan wuni!

²⁶Inja tuan ani kyarem: Ne, au, manfamyan ḇeḇarḇor ma ḇemyarenḇa, wafawi, yuf ro moḇ yakekef roḇa ma yasrai ro moḇ rosai yaker ro ḇa?

²⁷Rarirya ipyum syadi pipi yesi buksi faro snonkaku ḇefarḇaḇyan sya, insa yasiḇer ido yun pipi yesi kuker pampen ḇyesi.

²⁸Rarirya mkun talenta ani buri ma mkobuki faro ḇesma samfur ani.

²⁹ Snar snonkaku mansei ḇena ya nari ssḇuk faroi wer fa nya nabor syadi wer. Ḇape mansei ḇenaḇa, nari rosai nya na nari neḇeyun bur i.

³⁰ Ma manfamyan ḇeḇefainda ḇa ani mkosawen i ḇe ḇondi, ḇe moḇ ḇepampan syadi. Ro diwa nari ismai kankanes ma arkfafais nakor.”

³¹ “Rofyor Rumkun Snonkaku ryama kuker payamyum Ḇyedi ma malaikatsya kam siyaker I, ma nari kyain ro karapasa nasan Ḇyadi.

³²Raimnai er sya kam nari seḇefanjur ro ḇarpon Ḇyedi ma nari kyinfir si oser ḇe oser, raris ḇefarandosya kyinfir domba sya bur kambing sya,

³³ma nari domba sya ḇyesi fa snara ḇar raku ḇyedi ma kambing sya snara ḇar rasar ḇyedi.

³⁴Ma nari ikofen faro ḇenara ḇar raku ḇyedi: Mkorama, ne, besma ḇok ro Kma Yedi, mkakna Ḇaḇesasoser ḇefasos kwar faro mko ro fafisu supswan ine ḇyeḇefrur ya.

³⁵Snar rofyor yabiser mkofan Aya; rofyor yambrow mkoḇe war fa yinem; rofyor yaḇe snon dakam mkoḇe moḇ fa yaḇeryar ro;

³⁶rofyor yaḇaḇer mkoḇuk ḇe Aya mar fa yafmar; rofyor yaduf, mkofaduru Aya; rofyor yasma ro bui, mkora kaki Aya.

³⁷Rarirya snonkaku ḇenapes ansi nari skarem faro I, ḇo sikofen: Manseren, fyor rosaiso nkomam wabiser ma nkofan Au, roḇa wambrow ma nkoḇuk war fa winem?

³⁸Fyor rosaiso nkomam Au ḇe snon dakam, ma nkoḇuk moḇ ryar faro Au, roḇa baḇer ḇo nkoḇuk mar faro Au?

³⁹Fyor saiso nkomam waduf roḇa wasmai ro bui ma nkora kaki Au?

⁴⁰Ma Wairek ani nari kyarem faro si: Yakofen faro mko, kaku ḇeri roi ḇeḇor kam mkofrur faro oser ro fandu naek Ayesi ḇeḇenyawa ḇa sine, irya mkofrur kwar maḇe Aya.

⁴¹Ma nari ikofen kako faro ḇeyores ro ḇar rasar Ḇyedi: Ne, mkobur ḇarpon Ayedi, ne, snonkaku ḇesma fras, mkosun ro for ḇembrer ḇa ḇefasos kwar faro Ibiris kuker malaikat-malaikat ḇyesi.

⁴²Snar fyor Yabiser, mkofan Aya ḇa; fyor Yambrow mkoḇuk war fa Yinemba;

⁴³fyor yaḇe snon dakam, mkoḇuk moḇ fa Yaḇe ryar ro ḇa; rofyor Yaḇaḇer, mkoḇuk mar faro Aya ḇa; rofyor Yaduf ma Yasmai ro bui, mkora kaki Aya ḇa.

⁴⁴Ma nari sikaem skarem faro I, ma sikofen: Manseren, fyor saiso nkomam wabiser, roḇa wambrow, roḇa besnon dakam, roḇa baḇer roḇa waduf, roḇa wer wasmai ro bui ḇape nkuf farmyan Au ḇa?

⁴⁵Ma nari kyarem faro si: Yakofen faro mko, kaku ḇeri roi ḇeḇor rosai mkofrur ḇa faro naek Ayesi ḇeḇenyawa ḇa sine, rarirya kako mkakfrur na faro Aya ḇa.

⁴⁶ Ma snonkaku sine nari ssun ḇe moḇ wayam ḇekain fyoro, ḇape snonkaku ḇenapes sya ssun ro kankenem ḇemnaiḇa ya.”