Read Biak MATIUS 27 Bible Online

MATIUS 27 - Biak bible

MATIUS 27

¹ Fafisu isnai kwar, mananir imamsya ma ḇeḇarara-ḇeḇarara er Yahudi siryur ma sna wosi fa smun Yesus.

²Sai wanka ro ḇrasi, raimnai ssuni ma ssḇuki faro Pilatus, gubernur Roma ro mnu ani.

³ Rofyor Yudas, ḇeḇoḇ Yesus ani, myam, Ismai samamyai mar-mar kwar, fyafko. Inja kyaḇer pipi sarak samfur rikior ansi faro mananir imam-imam ma ḇeḇarara sya, ḇo ikofen doḇo:

⁴“Aya ine yasasar kwar snar yaḇoḇ rik snonkaku ḇesasarḇa ine.” Ḇape skarem faroi: “Inko fandunrosai? Kwara ro mankundaw!”

⁵Rarirya syo pipi sarak ansi ḇe Rum Ḇesren ya dori, raimnai ibur moḇ ani fa rya fyes mankundi.

⁶Mananir Imam-Imam ssun pipi sarak ansi ma sikofen: “Pipi ansi kopok kosun siḇa ro ḇurua farsarser, snar pipi rik sirya.”

⁷Sawos yae faro si posa ssḇuk pipi ansi skoḇes saprop sapḇe Saprop Ḇefawi ḇefrur uren saprop, fa sifrur ḇe rus faro dakam sya.

⁸Iso eḇedari isof ras ine sor iḇe Saprop Rik.

⁹ Rarirya Nabi Yermia wos ikofen ya imnis: “Sna pipi sarak samfur rikior, isoine maeja sawos namuk kwar faro snon oser imnis karkara ro fandu er Yahudi,

¹⁰ma ssḇuk pipi ansi faro ḇaḇyak ḇefawi ḇefrur uren saprop ani, saprop ḇyedi, raris Manseren danun faro aya.”

¹¹Raimnai ssun Yesus ḇeḇarpon gubernur Pilatus. Ma gubernur ani ifuken I: “Au ryake wairek kawasa Yahudi?” Yesus kyarem: “Iso mankundaw wakofen ya.”

¹²Ḇape raris safsof mananir imam-imam ma ḇeḇarara-ḇeḇarara sya sḇuksof I, kyarem wos oso ḇaḇeri.

¹³Inja Pilatus ikofen faro I: “Inja wamnafḇake safsof ḇeḇor saksi-saksi sine sawos faro Au?”

¹⁴Ḇape kyarem royo ḇaḇeri, isof gubernur ani ikmom kaku.

¹⁵Biasa ro ras-ras munara ḇeba gubernur fyaspar snonkaku besmai oso imnis kankinfir ro kawasa ḇeḇor ansi.

¹⁶Ma rofyor ani snon ḇeḇarḇor kaku oso isya ismai ro bui snonsnon ḇyedi Barabas.

¹⁷Snar sfanjur kwar ro dia, inja Pilatus ikofen faro si: “Mansei mkomarisen yafaspar faro mko, Barabas roba Yesus, sapḇe Kristus?”

¹⁸Pilatus ifawi kwar, mḇoi ssun Yesus ma ssḇuki faroi snar sayin I.

¹⁹Ro fafisu Pilatus kyain ro karapesa karkara ḇenapes ya, swari fyarem anun faroi: “Wafrur roi osoḇa beri faro snon ḇenapes ani, snar snon ine ifnaiḇo roḇandi yasma wayam ro mafu.”

²⁰Ḇape snar dafdif mananir imam-imam ma ḇeḇarara sya, kawasa ḇeḇor ansi simarisen kam insa sor fa Barabas ḇyeḇefaspar ma Yesus kada isma samamyai marmar.

²¹Gubernur kyarem faro si ma ikofen: “Mansei ro fandu snon ansuine mkomarisen yafaspar faro mko?” Sikofen: “Barabas.”

²²Pilatus ikofen wer faro si: “Rarirya ido rosaiso nari yafrur kuker Yesus, sapḇe Kristus ani?” Sikam ssibras: “Ikada ḇyeḇepai epen ro aprop!”

²³Ikofen wer: “Ḇape sasar rosaiso ifrur kwar ya?” Ḇape ssibras naba syadi wer: “Ikada ḇyeḇepai ro aprop!”

²⁴ Fafisu Pilatus myam nyan ḇyena kam nefromo, isyadi wer siḇe sifrur mbrus inja dun war fa ḇyukḇan ḇramin ḇyesi ro ḇarpon kawasa ansi ma ikofen: “Aya, yaḇe sasarḇa faro rik snon ine; Irya mankun mkokarem!”

²⁵Ma kawasa ansi kam skarem: “Mḇoi rik ḇyena nek inko ma romawa nkoḇesi!”

²⁶Raimnai fyaspar Barabas faro si, ḇape Yesus kada siprer I raimnai ḇyeifa spai ro aprop.

²⁷Ḇarpur ya gubernur sordade ḇyesi ssun Yesus ḇe rum karkara ḇenapes, raimnai sor sordade ḇese sya kam fa sfanjur ḇo sores yar Yesus.

²⁸Sper sansun ḇyena ma ssansun I kuker syatu ḇefuk.

²⁹Siyanem wower ro kaḇrai borek ma sriri ro Yesus ḇruri, raimnai ssḇuk amboḇer ḇaken oso fa dufepen ro ḇrasi ḇar raku ya. Posa ssḇansuba ro ḇarpon ḇyedi ma skoryae I, ḇo soḇo: “Aroo, ne Wairek kawasa Yahudi!”

³⁰Saninef I ma ssun amboḇer ani fa ssḇuki dos ro ḇruri.

³¹Sonef I raposa sper sansun syatu ḇefuk ani buri ma ssansuni wer kuker sansun ḇyena. Raimnai ssuni ḇo sisasyar bur mnu ya, fa spai I ro aprop.

³²Fafisu sisasyar bur mnu ya, sisrow snon Kirene oso snori Simon. Snon ani sedafdifer i fa ḇyar pyan Yesus aprop ḇyedi.

³³Ma sra ro moḇ ḇenirḇe Golgota, isoine: Moḇ Ḇukor bei.

³⁴Raimnai ssḇuk anggur ḇefmnai kuker pus fa dinem. Ryepen anggur ansi kwar, imewer dinem sindi.

³⁵ Spai I kwar posa serarwas sansun ḇyena kuker kinsor mansei ḇena nanya.

³⁶Raimnai skain ma siwaren I ro dia.

³⁷Ro ḇruri bori ro aprop pum ya sfas ḇair knam rosai ḇefnai fa isma samamyai ya: “Ine Yesus Wairek Yahudi.”

³⁸Spai fnoḇek I snon mamun risuru, oso ro ḇar raku ma oso ro ḇar rasar ḇyedi.

³⁹ Snonkaku ḇeyunuk ro dia sonef I ma skakiker siḇrusna ḇo sikokofen, ḇo soḇo:

⁴⁰ “Ne, Au ḇeyoḇo ḇekakok Allah Rum Ḇesren ḇyedi ma ḇeḇawes i wer ro ras rikior, faspar mankundaw rofyor Allah Rumkun ḇyediso Au, wado bur aprop ya!”

⁴¹Rarirya kako mananir imam-imam sifnoḇek ḇefawinananem Refo Yahudi ma ḇeḇarara sya skoryae I ma sikofen, ḇo soḇo:

⁴²“Snonkaku ḇese fyaspar si, ḇape mankundi kada ipok fa fyaspar I ḇa! I kada Wairek Israel? Ipyum syadi wado bur aprop iyasi ma nari nkokyar Au.

⁴³ Ryir kakyar ḇyedi faro Allah: ipyum syadi Allah fyaspar I, rofyor Allah imarisen kuker I! Snar ikofen kwar: Aya ine Allah Rumkun ḇyedi.”

⁴⁴Rarirya snon mamun spai fnoḇek I suyakkoryae I kako.

⁴⁵Randak ro oras samfur seser risuru orkok isof ro oras kior mandira, pampan ya ikawef sup ya fyor ani.

⁴⁶ Indokada oras kior ya Yesus dor kuker mkaren ḇeba: “Eli, Eli, lama sabakhtani?” Isoine: Allah Yedi, Allah Yedi, snaro Wabur Aya?

⁴⁷Kawasa ḇeyores ro dia simnaf rarirya, sikofen: “Dor Elia.”

⁴⁸ Ma snonkaku oso ro si ryama fasaw; dun bunek, fa syowen i ro anggur ḇemnir, raimnai kyuki ro amboḇer oso ḇo isui fa Yesus dinem.

⁴⁹Ḇape snonkaku ḇese sya sikofen: “Mkoḇuk awer, insa komam pan imbude Elia ryama fa fyaspar Indi.”

⁵⁰Yesus dar naba wer raimnai ryir nyawa ḇyedi.

⁵¹ Ma mkomam, eruk kroben ro Rum Ḇesren ya imsap ra ḇyesuru ro ḇo isof ro sop ma ḇyerim ḇeba, ma urek karu na nakpef,

⁵²ma rus na nḇas, ḇo snonkaku ḇesren ḇemar kwar sya sibor siḇer si.

⁵³Ḇarpur ro Yesus aḇiḇer ḇyedi, sikam sisasyar ro rus, ma ssun ro mnu ḇesren ya fa sfasnai mankunsi faro kawasa ḇeḇor.

⁵⁴Mananir sarar ma sordade ḇyesi ḇewaren Yesus ansi simkak fafayaḇa ro fafisu smam rim ma roi ḇeḇesya anna, inja sikofen: “Kaku ḇeri, ine Allah Rumkun ḇyedi.”

⁵⁵ Ma ro dia bin ono sibor sores ḇinkwan ḇo smam, isoine bin-bin ḇeso Yesus ker Galilea fa ḇeyuf farmyan I.

⁵⁶Ro fandu si kosmai Maria Magdalena, ma Maria Yakobus ma Yusuf sna suḇedi, ma Zebedeus mandaḇen ḇyesi sna sedi.

⁵⁷Mandira kwar snon ḇenana oso snori Yusuf ḇyeknam ro Arimatea, ikako dakḇe manfamyan faro Yesus kwar.

⁵⁸Rya faro Pilatus ma dor Yesus ḇaken ḇyedi. Pilatus ḇyuk sasoser insa ssḇuki faroi.

⁵⁹Inja Yusuf dun ḇaken ani, ma pyarek i kuker kruḇen ḇepyoper,

⁶⁰raimnai ikrir I ro rus ḇebabo ḇyedi, pyaikir ro urk karui, ma ikris kwar karui ḇeba oso ḇe kedwai rus ani, raimnai ibur.

⁶¹Ma Maria Magdalena kuker Maria ḇese ani sukain ro dia ro ḇarpon rus ani.

⁶²Meserdi, isoine ras fasasos ya isyonde, mananir imam-imam ma snon Farisi sikam srama ro ḇarpon Pilatus,

⁶³ ma sikofen: “Tuan, inko swarepen, snon ḇefarkor ninyan ani fafisu ikenem ya ikofen: Ras rikior nasyof kwar nari Yiḇer Aya.

⁶⁴Inja buk sasoser insa siwaren rusya isof ras ḇeḇekior ya; imbude manfamyan ḇyesi kofawiḇa ḇo srama skaraw indi, raimnai sikofen faro kawasa sya, ḇo soḇo: Diḇri kwar ro fandu ḇemar sya, isof farkarkor ninyan ḇepur ya ipyum ḇa syadi ro ḇepon ya.”

⁶⁵Pilatus ikofen faro si: “Sine manwadwaren faro mko, mkora ma mkowaren rus ani pyum kaku.”

⁶⁶Rarirya srama kuker fafnoḇek ro manwadwaren ansi sematerai rus ani ma siwareni.