Read Biak MATIUS 5 Bible Online

MATIUS 5 - Biak bible

MATIUS 5

¹Fafisu Yesus myam kawasa ḇeḇor ansi, dek ro urek oso ma kyain kwar, manfamyan ḇyesi siryur faro I.

²Raimnai Yesus irandak dawos ma fyarkor si ḇo Ikofen:

³“Aski faro snonkaku rur ḇesaḇarar sya ro Allah ḇarpon ḇyedi, snar siḇena Ḇaḇesasoser Boiyas.

⁴ Aski isya faro snonkaku ḇeḇarop sya, snar nari sisma sneprei.

⁵ Aski isya faro snonkaku sne ḇesḇunek sya, snar siso nari ḇena supswan ine, ḇeromowi imnis Allah ankankinem ḇyedi.

⁶ Aski isya faro snonkaku ḇebiser ma ḇembrow snar napnapes ya, snar nari sisyopen.

⁷Aski isya faro snonkaku ḇesaswar sya, snar nari sisma fakamaman.

⁸ Aski isya faro snonkaku sne ḇesren sya, snar nari smam Allah.

⁹Aski isya faro snonkaku ḇeyun aski, snar nari sap siḇe romawa-romawa Allah.

¹⁰ Aski isya faro snonkaku ḇeḇekandera snar napnapes, snar sikada nari sisma Ḇaḇesasoser Boiyas.

¹¹ Aski isya faro mko, rofyor skoryae mko ma sifrur kandera mko ma sonef mko kuker wos ḇeḇor ḇeḇyeḇa snar Aya.

¹² Mkoryaḇ ma mkomarisen, snar ḇaḇyak mkoḇena naba ro boiyas, snar rarirya kako sifrur kandera kwar faro nabi-nabi ḇepon mko sya.”

¹³ “Mko ine karumasen supswan. Rofyor karumasen ani ḇyuar, kuker rosaiso nari kofrur fa myasmasen wer? Ḇyuk fainda werḇa rarirya ḇyeḇesawen ma snonkakusya saref apapen i.

¹⁴ Mko ine isnai supswan. Mnu ḇekain ro Urek bori ipok fyanarḇa.

¹⁵ Oso wer snonkaku spam paramrom raimnai sikawefi kuker fyomba, mḇoi skafi ro adadu, isof ḇyeisnai snonkaku sya kaim ro rum ya.

¹⁶ Rarirya isnai ḇedi isak ma isnaiyar snonkaku sya insa smam fararur ḇepyum ḇena ma sisandik Kmami ro boiyaswa.”

¹⁷“Mkokara awer, Yarama ine fa Yaḇerer sasoser Refo Yahudi roḇaido syap nabi-nabi. Yarama fa Yaḇerer naba, mḇoi insa Yaḇeimnisna.

¹⁸ Inja Yakofen faro mko: Kaku beri rofyor nanki ma supswan ine ssupromes ḇaim, sasoser Refo Yahudi, mir roḇa pun oso nari ryoḇa beri isof nakam namnis.

¹⁹Rarirya mansei ḇeḇerer roi oso ro sasoser Refo Yahudi ḇebaḇa syadi, ma fyarkor i kuker nyan ḇemnisḇa faro snonkaku ḇese, ima nari kyain ro moḇ ḇekakiḇa syadi ro Ḇaḇesasoser Boiyaswa; ḇape mansei ḇeḇeuser ma ḇefarkor mnis sasoser Refo Yahudi, ikada nari kyain ro moḇ ḇekaki syadi ro Ḇaḇesasoser Boiyaswa.

²⁰Inja Yakofen faro mko: Rofyor kankenem ḇaḇeagama mkoḇena nanapes syadiḇa ro kankenem ḇaḇeagama ḇefawinananem Refo Yahudi ma snon Farisi syaḇa, kaku ḇeri nari mkaksun ro Ḇaḇesasoser Boiyaswaḇa.

²¹ Mkomnaf kwar wos Allah Ikofen faro kpu koḇesi: Mko mamun awer; mansei ḇemamun nari seifa ismai.

²²Ḇape Yakofen faro mko: Snonkaku mansei ḇemsorya faro naek ḇyedi nari seifa ismai; mansei ḇekofen faro naek ḇyedi: Ne, korwar! nari ssuni ḇeḇarpon Kankain Karkara Agama ma mansei ḇekofen: Famyun Allah! nari sisawen i ro for ḇembrerḇa.

²³Inja rofyor, wun farsarser ḇena ḇe rokef farsarser fa bukfarser, ḇape kwara smai naek ḇedi imsor au,

²⁴rwir farsarser ḇena ro ḇarpon rokef farsarserya ma rwa bedasi ḇepon kuker naek bedi resari, raimnai insape kwaḇer ma buk farsarser ḇena.

²⁵Fasau fa bedasi kuker mbroḇ bedi rofyor ausya kaker kuker i ro nyanya faduri, imbude mbroḇ bedi ḇyuk au faro mankaraya ma mankara dakḇuk au wer faro ḇefnoḇek i sya fa wasmai ro buindi.

²⁶Yakofen faro mko: Kaku ḇeri nari wasasyar ro diwaḇa, rofyor bak namuk nyaki ḇenaḇa.

²⁷ Mkomnaf kwar wos berok radine: Mkofrur farbuk awer.

²⁸Ḇape Yakofen faro mko: Mansei myam bin oso ma irmomen i ro sneri, ifrur farbuk kuker i kwar ro sneri dori.

²⁹ Inja rofyor mkamsu ḇar rakuya ḇyeninyan au, weri ḇo wasawen i, snar ipyum syadi faro au rofyor kina oso ro ḇaken bedi ryo, ro ḇaken bedi ḇesiper ḇyeḇesawen ro for ḇembrerḇa.

³⁰ Rofyor ḇramsu ḇar rakuya ḇyeninyan au, kwaruk i ma wasawen i, snar ipyum syadi faro au kina oso ro ḇaken bedi ryo ro ḇaken bedi ḇesiper ḇyeḇesawen ro for ḇembrerḇa.

³¹ Wosya ḇyeḇekofen kwar kako: Mansei ḇefaspar swari nari ḇyuk syap faspar faro i.

³² Ḇape Yakofen faro mko: Mansei ḇefaspar swari snar farbukḇa, i ḇefrur fa swari i frur farbuk; ma mansei ḇefakawin kuker bin fyaspar ani, ikako dakfrur farbuk.

³³ Mko mnaf kako kwar wos sikofen faro kpu koḇesi: Swowar ankar awer, mḇoi wufepen sowar bedi ro ḇarpon Manseren.

³⁴ Ḇape Yakofen faro mko: Mkopok mko sowar ḇa beri, iḇye kuker nanki, snar nanki irya Allah karapesa nasan ḇyedi,

³⁵ iḇye kako kuker supswan, snar supswan Allah araref ḇyedi rya, roḇa kuker Yerusalem, snar Yerusalem irya mnu Wairek Ḇeba,

³⁶swowar awer kako kuker ḇru ḇedi, snar wapokḇa fa wafrur snonburyam oser fa ipyoper roḇa pyaisem.

³⁷Rofyor mḇoi, iḇye mkokofen: mḇoi, rofyor roḇa, iḇye mkokofen: roḇa. Rosai ḇesyadi ro ine ḇyeknam ro ḇeḇarḇor ya.

³⁸ Mkomnaf kwar kako wos: Mkamor syadwer mkamor ma nakor syadwer nakor.

³⁹Ḇape Yakofen faro mko: Mkomunsu awer snonkaku ḇefrur ḇarḇor faro mko, mḇoi manseiryawer ḇyaser fofer raku bedi, buk kako faro i fofer rasar bedi.

⁴⁰Ma faro snonkaku ḇemarisen ḇeḇuksof au snar irmomen sansun bedi, buk kako syatubedi.

⁴¹Ma manseirya wer ḇeḇedafdifer au fa wambran fnoḇek i kawanwan mil oser, wambran fnoḇek i kawanwan mil risuru.

⁴²Buk faro snonkaku ḇeyor ari faro au, ma snonkaku ḇeyor ari rosai ro au wamewer awer.

⁴³ Mkomnaf kako kwar wos: Mkoswar min mkoḇesi ma mkain mbroḇ mkoḇesi.

⁴⁴Ḇape Yakofen faro mko: Mkoswar mbroḇ mkoḇesi ma mkoḇenadi wark ḇeḇewayam mko sya.

⁴⁵Snar kuker rarirya mkoḇe romawa-romawa faro Kma mkoḇedi ro boiyaswa, ḇeḇuk ori faro snonkaku ḇarḇor ma ḇeḇye sya ma ḇyuk mekemya dado faro snonkaku ḇenapes ma ḇenapesḇa.

⁴⁶Rofyor mko swar faro ḇeswar mko sya, rosai wasma ḇeḇaḇyak ya? Mkofawiḇake ḇeyor balasten sya kako sakfrur rarirya?

⁴⁷Ma rofyor mkoḇuk aroo munda faro naek mkoḇesi monda, rosai ḇesyadi ro fararur snonkaku ḇesesi sena? Mkofawiḇake snonkaku ḇefawi Allahḇa sya sakfrur rarirya?

⁴⁸ Inja mkonapes imnis raris Kma mkoḇedi ro boiyaswa moḇ inapes rai.”