Read Biak MARKUS 4 Bible Online

MARKUS 4 - Biak bible

MARKUS 4

¹ Rofyor oso Yesus ḇyuk farkarkor wer ro danosen andir ya. Ma kawasa donek ḇefnak ḇa siryur yar i, inja dek ro wai ḇepyar na iya fa kyain ro wai anya ḇoi kawasa ansya ssna ro ḇonde ro danosen andir ya.

²Ma ḇyuk farkarkor faro si roi nabor kuker sarḇer. Ro farkarkor ḇyena ikofen faro si ḇo Doḇe:

³“Ne mkorower! Snon ḇekekef mor oso isasyar fa kyekef mor.

⁴Rofyor daḇuḇer mor ono sisapi ro nyan andir, ma man sya san si ra siḇro.

⁵Mor ono sisapi ro moḇ ḇeḇe karui, ḇeḇe saprop ḇekpor ḇa, inja mor anna nasur fasau snar saprop ya isrepek.

⁶Fama rofyor oridek ma isam nakam nnmaryoi snar ne rares ḇa.

⁷Mor ono wer sisapi ro moḇ ḇeḇe kaḇraiborek, ma kaḇraiborek anna naduḇ epen si isof simar, inja ssḇuk bon ḇa.

⁸Mor ono kada sisapi ro saprop ḇepyum ma sisur pyum kaku ḇo simarem, bon nna ono ne samfur rikior ono ne samfur riwonem ma ono wer ne utin oser.”

⁹Ma ikofen ḇo doḇe: “Mansei ḇeḇe kna fa imnaf ido imnaf naḇye!”

¹⁰Fafisu Yesus derer ro mankundi, ḇeso i sya ma manfamyan snon samfur seser risuru ḇyansya sifuken i ro sarḇer ani.

¹¹Kyarem faro si ḇo doḇe: “Kankunes Ḇaḇesasoser Allah ḇyeḇeḇair kwar faro mko, ḇape faro snonkaku ḇese roi ḇeḇor anna neḇefarkor ḇe si kuker sarḇer,

¹² insa: Se mka fa smam ḇape skara na ḇa, se kna fa simnaf ḇape sifawi kankunes ḇyeja ḇa, imbude simbror ḇo sisma ampun di.”

¹³Raimnai ikofen faro si ḇo doḇe: “Inja mkofawi sarḇer ine kankunes ḇyeja ḇake? Rarirya ido nari mkofawi sarḇer ḇese na kankunes nena rariso?

¹⁴Ḇekekef mor anya kyekef wos ya.

¹⁵Snonkaku ro nyan andir ro moḇ wos ya ḇyeḇekekef ro nanya, isoine ḇemnaf wos ya, raimnai biris ya ryama pyoser wos insandi simnaf anna bur si.

¹⁶Rarirya kako mor ḇeḇeḇekekef ro moḇ ḇeḇe karui isoine, snonkaku ḇemnaf ma ḇeryaḇ fasau wos anna fa sna na.

¹⁷Fama wos anya ḇye rares ḇa inja kyain kawan ḇa. Rofyor kandera ma marindi nkur si snar siso wos refo ya inja sisusu beri.

¹⁸Ma mor ḇese ḇesapi ro mbron kaḇrai borek, isoine ḇemnaf wos ya,

¹⁹raimnai makakak faro supswan ma faraurowes nana ma raryaḇ faro roi ḇese nsun ma nposer wos anya isof ḇye bon ḇa.

²⁰Ḇarpur kaku mor ḇesapi ro saprop ḇepyum, isoine snonkaku ḇemnaf ma ḇekram wos anya isof wos anya ḇye bon, ono ne bon samfur rikior, ono ne bon samfur riwonem ma ono wer ne bon utin oser.”

²¹ Ma Yesus ikofen faro si ḇo doḇe: “Snonkaku spam padamara fa srir i ro bade ya baḇdi ḇa roḇaido kamboi anenef ro ya baḇdi ḇa, ḇoi sriri ro kadadu ḇyedi.

²² Snar roi oso ipok iyokef ḇa ḇoi na kam nnbair ro sananai ya, ma roi oso ḇye ḇefamyun ḇa snar na kaem nnfababa.

²³Mansei ḇeḇe kna fa imnaf ido imnaf naḇye!”

²⁴ Raimnai ikofen wer ḇo doḇe: “Mkokara roi mkomnaf na! Warnkyara mkoḇukkara naek mkoḇesi nari ssḇuki dakkara au kako ma nari isyadi wer faro au.

²⁵ Snar mansei ḇesma roi ono ido nari ssḇuk faroi wer, imboi mansei ḇesma roi ono ḇa, rosai wer isma na nari ssun na buri.”

²⁶Raimnai Yesus doḇe: “Ḇaḇesasoser Allah moḇ ryaya isoine: imnis raris snon beḇuḇer mor ro saprop,

²⁷posa roḇ-meser denef ma ikḇok, imboi mor ḇyuḇer ansya sikpireu, sisur ma sikaki, ḇeker anya fyaun warek si ḇa.

²⁸Sup ro saprop ya do i so ḇeḇuk bon, randak ya ne yof, ne yorem, ḇarpur ne bon posa nakraf.

²⁹ Rofyor bon anna nnmas kwar snon ḇeker anya kyaruk na snar fafisu afuf ya imnis kwar.”

³⁰Yesus ikofen wer ḇo doḇe: “Kuker rosai koḇuk karkara mura ro Ḇaḇesasoser Allah ya, oroḇaido kuker wos sarḇer rosai koḇuki ikofen fasnai ya?

³¹Ḇaḇesasoser anya imnis raris sasawi mor ssḇuḇer ro saprop ya ḇo. Sasawi mor ya iso ḇebaḇa syadi mor rokaker ḇese kam ḇero sup ya bori.

³²Ḇape rofyor ssḇuḇeri isur ma iba syadi rofaran ḇese na kam ma ḇye snau ḇeba, isof man ḇero farsyos sya ssmun narem ro kadaun ḇyena.”

³³Kuker wos sarḇer ḇeḇor ḇera dine Yesus fyarkor wos ya faro si imnis raris fawawi sena,

³⁴rarirya Yesus fyarkor kawasa ansya kuker sarḇer monda, ḇape faro manfamyan ḇyesi kada fyasna ḇair kankunes ro sarḇer anna kame.

³⁵Ro ras anya mun mandira ya Yesus ikofen ḇe si ḇo doḇe: “Mkorama kokaḇor ḇe ḇar iwara.”

³⁶Skobur kawasa ḇeḇor ansya ḇo skokaḇor ma wai ḇese kako nakso Yesus.

³⁷Fyoro ḇa wam doḇer ma bak na nek ro waiya ra fanam imsar.

³⁸Fafisu ya Yesus denef ḇo fyak noraya ro waiya urndi. Ma manfamyan ḇyansya ssḇani ḇo sikofen ḇo soḇe: “Mankorari yo, au ma ḇefandun ko ḇa ḇo na koro!”

³⁹Yesus ikḇok ma myunwarek wam ya ma ikofen faro danosen ya: “Wamnai! Wa-brin!” Ma wam anya imnai beri ḇo danosen anya iḇrin dam.

⁴⁰Raimnai ikofen faro si ḇo doḇe: “Snaro mko mkak mankenem rarirya?”

⁴¹Simkak kaku ḇo sawos yae ro mankun si: “Inja snon saisoine, isof wam ma danosen ya kako nakso wos ḇyena?”