Read Biak MARKUS 6 Bible Online

MARKUS 6 - Biak bible

MARKUS 6

¹Ḇarpur Yesus kuker manfamyan ḇyesya ssraḇe mnu marin ḇyedi.

²Ro ras Mananai Yahudi, Yesus ḇyuk farkarkor ro rum Ari ḇero Nazaret ma kawasa Jemaat ḇeba anya sikandor snar simnaf farkarkor ḇyena, inja sikofen ḇo soḇe: “Moḇ saiso isma roi ḇeradine ro ya? Fawawi sanaiso ssḇuk faroi? Isof ifrur aḇyair ḇefrur kanandor ḇera dine kuker ḇramin ḇye suine?

³Ko kam kofawi i ḇe sukan ai, Maria romawa ḇyedi, naek ḇyesi so Yakobus, Yoses, Yudas ma Simon? Ma kofawi kako srar ḇyesya sisya ro fadu ko?” Ro diya snar siwarki i mura siyaw i.

⁴ Inja Yesus ikofen faro si ḇo doḇe: “Nabi oso se mafi ro moḇ na kam, ḇoi ro mnu ḇyedi ma fandu kawasa ḇyesi ma rum ḇyedi, sefandun mankuni ḇa.”

⁵Yesus Imewer ifrur aḇyair kanandor oso ro diya ri, imboi ḇyuk pararei faro ḇeduf ri ḇeso monda kuker pyan ro si.

⁶Yesus Kyara si ma ikandor snar kakyar ḇa sena. Raimnai Yesus Imbran yar mnu ḇe mnu fa ḇyuk farkarkor.

⁷Yesus dor manfamyan samfur seser risuru ansya ma iwan si fa se suru-suru. Ḇyuk samambraḇ faro si fa ssḇuki yau rur ḇemaḇak sya,

⁸ ma danun faro si insa ssun awer roino ro marandan sedi, ankyon na manda, mboi ssun awer mamami, ssun awer roi ḇeḇaryam, ssun awer kako pipi ma ḇeḇoḇek sena.

⁹Mkowemna kada mkosower na mboi mkun sansun risuru ḇa.

¹⁰Yesus dawos pdef faro si ḇo doḇe: “Mkorafa ro moḇ oso ra simarisen fa mkosun ro rum oso ido mkokain ro dia isof mkosasyar bur wer ro moḇ ani.

¹¹ Imboi ro moḇ oso simarisen mko ḇa ma simewer srower mko ido ro moḇ anya mkokokef fafen ḇero mkowemna fa ne aḇyair faro si.”

¹²Inja sra ma ssḇaḇdas faro kawasa sya fa simbror,

¹³ ma siyaw rur ḇemaḇak sibor ma ssrem ḇeduf sibor kuker mani ma ssḇuk pararei faro si.

¹⁴ Wairek Herodes i kako dakmnaf Yesus snar Ḇye snonsnon ma kawasa sikofen ḇo soḇe: “Yohanes Ḇemasi diḇri ro fandu ḇemar sya ḇefnai samambraḇ-samambraḇ na nafararur roi.”

¹⁵Ono soḇe: “Elia i ri!” Ḇese sya wer soḇe: “Nabi sya oso irya ke imnis raris nabi ro ḇepon iwara.”

¹⁶Rofyor Herodes imnaf rarirya ikofen ḇo doḇe: “Roḇa, Yohanes yaperem uk sasukor anya irya, i so ḇeyiḇer wer i.”

¹⁷ Snar kaku Herodes i ḇewan fa sfor Yohanes fa se wanka i ḇo ismai ro bui snar dun Herodias ḇedar ḇyeja Filipus swar i, fa fyakawini.

¹⁸Snar fafisu oso Yohanes fyarkor Herodes ḇo doḇe: “Swasar snar wun ḇedar beja swa ḇyedi!”

¹⁹Knam ḇeḇedar fa Herodias imsor famyun Yohanes ro sneri ḇo syewar nyan fa iḇe myun i fama jadi ḇa,

²⁰snar Herodes ḇyemaf Yohanes i snar ifawi Yohanes snonkaku ḇenapes ma ḇesren inja fyadiren i. Ḇape rofyor imnaf sap Yohanes sneri ḇyefisfyas, rarirya no imarisen imnaf i.

²¹Herodias insape isma fafisu ḇepyum ya rofyor Herodes ifrur munara ya warek ras ḇyeja faro ḇebarara ḇyesi, mambri sya ma snonkaku ḇeḇe snonsnon ro sup Galilea sya.

²²Ro munara anya Herodias inai dojaru ḇyedi Salome ryarpon ifyer ro ḇebarara ansya ḇarpon sedi. Wairek ikofen faro inai anya ḇo doḇe: “Wor rosai wamarisen ya ro aya imba na yaḇuk na ḇe au!”

²³Ma ḇye syasi faro inai ḇyanya ḇo doḇe: “Rosai waḇe wor kaker ro aya, nari yaḇuk i faro au, ḇaḇesasoser ayeja ḇar ya iryano yaḇuk i kako!”

²⁴Inja inai anya rya ifuken snari ḇo doḇe: “Rosai nari yor ḇesyani?” Snari doḇe: “Wor Yohanes Ḇemasi ḇruri!”

²⁵Rarirya fasau kaku inai anya rya faro wairek ma dor ḇo doḇe: “Yamarisen insa ro knikine beri buk Yohanes Ḇemasi ḇruri ro ben oso ḇe aya!”

²⁶Fafisu anya wairek sneri ḇye susa namsin ḇa, ḇape snar syasi ḇyedi, ma snar ḇebarara sya fyadwer fararyor anya ḇa.

²⁷Wairek iwan fasau snon-mamun ya ḇe bui, kuker sasoser insa rya pyerem uk Yohanes ḇruri. Snon anya rya pyerem uk Yohanes ḇruri ro bui.

²⁸Snon anya dun Yohanes ḇruri ro ben ya ma ḇyuk i faro inai ani, ma inai anya dakun i faro snar i.

²⁹Rofyor Yohanes manfamyan ḇyesya simnaf marmar ḇyeja srama ssun baken ḇyeja fa serak i ro kubir.

³⁰Fyoro ḇa manfamyan Yesus ḇyansya sisiḇer ma siryur kuker Yesus wer ma sfarfyar faro i roi ḇeḇor sifrur ma sfarkor na.

³¹Inja ikofen faro si ḇo doḇe: “Mkorama kosewar moḇ ḇeḇeursḇa insa kemir ma komnaisu ko resari!” Snar snonkaku ḇeramuma ma ḇeramura sibor kaku isof skosma fafisu ḇa kako fa skonan.

³²Inja skek wai ya ḇo skora ḇe moḇ ḇeḇeursḇa oso.

³³Ḇape ro fyor skek wai ya kawasa sibor smam sko, ma sifawi moḇ skora yoḇ ya. Inja simbran ro nyan bera ḇande ya ma fasaw monda kawasa ḇera ker mnu ḇeba sibor spon sko raro moḇ skoḇe skora yoḇ ani.

³⁴ Ro fyor Yesus isabu ro wai ya munde, myam kawasa dandonek ḇefnak ḇa ansya inja iswar si, ḇyuk simnis domba ḇena manfakwak ḇa. Inja fyarkor si ro roi nabor.

³⁵Snar fanam roḇ kwar manfamyan ḇyansya sra faro i ma sifuken ḇo soḇe: “Moḇ ine ḇyeursḇa ma fanam roḇ kwar.

³⁶Inja wawan si fa sibur insa sskoḇes roḇeyan ḇesi ro mnu-mnu ḇefanam-nam nane.”

³⁷Ḇape Kyarem faro si ḇo doḇe: “Mkoiso nari ḇeḇuk nanan faro si!” Sikofen faro i ḇo soḇe: “Donek ḇeḇa ḇera dine koḇoḇ dinar utin risuru wer kako fa kofan si nari imnis ḇa kako.”

³⁸Ḇape ikofen faro si ḇo doḇe: “Mamami rifisi mkun ya? Indo mkomam pan!” Rofyor smam kwar sikofen ḇo soḇe: “Mamami ririm ma in risuru.”

³⁹Rarirya Yesus iwan fa kawasa ansya skain fa se uk-ukem ro aḇris sya bonsi.

⁴⁰Ma uk-ukem anna ono ne utin oser ono wer ne samfur ririm.

⁴¹Ma Yesus dun mamami ririm ma in risuru kwar, iwakwaker ḇe nanki ma isawar dofen roḇean anna posa, pyanasnis na ma ḇyuk na faro manfamyan ḇyansi, insa sirarwas na faro kawasa ansya kam; rarirya kako in risuru ansui.

⁴²Kawasa ansya sanan kam isof sarbor.

⁴³Raimnai siryur roḇeyan ḇedawer na ma sisma inawen samfur seser risuru nafo, in sya ḇeso.

⁴⁴Kawasa snon ḇeyan mamami ro ras anya sya si kam se syaran ririm.

⁴⁵Posa kwar Yesus iwan fasaw manfamyan Ḇyesya fa sek ro wai ḇo spon i ḇe danosen ya ḇar iwara ḇe Betsaida, ma iwan kawasa ḇeḇor ansya fa sibur.

⁴⁶Rofyor sibur ḇesisye kwar, Yesus dek urek ya fa ḇye nadi.

⁴⁷Roḇ kwar wa anya isya ro danosen ya faduri, ḇoi Yesus demir ro ḇande.

⁴⁸Rofyor ya myam doḇer ya myun manfamyan ḇyansi, simbrar ḇe moḇo ḇa snar wam ya iso ro wai rawer, ma indokada oras kior, imbran ro war ya bori fa rya warek si.

⁴⁹Snar imbran ro war ya bori, soḇeda faknik riri, inja simkak ḇo sar naba kam.

⁵⁰Snar smam kami eḇedari sikandor. Ḇape Yesus ikofen faro si ḇo doḇe: “Mkoknon! Ayairya, mkomkak awer!”

⁵¹Rarirya dek ro wai ya fa isrow si ma wam anya iḇrin bos beri. Sisnesna ne fesfyas ma sikmom.

⁵²Snar nanan mamami ḇefrur kanandor anya isya ḇye karkara kaker faro si ma siwarki ro sisnesna.

⁵³Skofyafer kwar Yesus ma manfamyan Ḇyesya skorande skopyar ro Genesaret.

⁵⁴Fafisu ya skado bur wai ya, kawasa ansya smam bir Yesus I.

⁵⁵Inja sifrar sikofen ḇair faro kawasa sya kam ro sup ani, ma sun ḇeduf sesya ro waryar faro Yesus ro moḇ simnaf Yesus isya ryo ya.

⁵⁶Moḇ rya yoḇ na kam ḇe mnu-mnu ma mnuḇeba-mnuḇeba kawasa srir ḇeduf sesya ro nyan andir ma sor samsom faroi, insa imarisen fa span monda ro syatu Ḇyeja pusyom na. Ma kawasa kam ḇepan roi siprei.