Read Biak LUKAS 10 Bible Online

LUKAS 10 - Biak bible

LUKAS 10

¹Raimnai Yesus kyinfir manfamyan samfur rifik wer, ma iwansi fasḇe suru-suru ḇo sponi ḇe mnu ma moḇ iḇe ryayoḇ na.

² Ikofen farosi: “Yafna nadufen kwar, ḇape ḇefararursya siborḇa. Eḇedari nkor faro amber ḇena yafya, insa fyarem ḇefararur ono fa srabar roḇean anna.

³ Mkora, yawan mko imnis domba mkun ro fandu naf supsya.

⁴ Mkun awer kamon roḇa roi ḇeḇaryam, roḇa roi ḇesower wemin, ma mkoḇe aroo awer faro manseiryawer, rofyor mkoisya kaker ro mararanya.

⁵Ma mkosun ro rum oso, mkofen ḇepon farosi: Aski faro mko ro rum ine.

⁶Ma rum ani ono sisya sefandun faro aroo mkoḇena, nari askiya kyainso si. Ḇape ono sḇefandun aroo mkoḇenaḇa ido, nasiḇer faro mko.

⁷ Mkokain ro rum oso ido, mkonan ma mkinem rosai sḇukna, snar mansei ḇefararurya, nari isma sasuref; inja mkobur awer rum ani ḇe rum-rum ḇese.

⁸Ma rofyor mkosun ro mnu oso rawo simarisen mko ido, mkan rosai sfasos faro mko.

⁹Ma mkoḇuk pararei faro snonkaku ḇeduf ro mnu ani, ma mkokofen farosi: Ḇaḇesasoser Allah fyanam kwar faro mko!

¹⁰ Ḇape rofyor mkosun ro mnu ani ma simarisen mko ro mnu aniḇa ido, mkoraḇe sampak ḇero mnu ani ma mkor farma:

¹¹Rarirya kako oref ro mnu ani ḇekrof ro mkowemna, mkokokefna ro ḇarpon mkoḇedi, insa mkofawi roi ine: Ḇaḇesasoser Allah fyanam kwar.

¹² Ḇape yakofen faro mko, nari ro ras mankaraya, Sodom myanan syadi ro kamnam mnu ani.”

¹³ “Au Khorazim, rwoë! Au Betsaida, rwoë! Snar kanandor mkomam nane neḇefasna ro Tirus ma Sidon rarirya kada, nari smandak ma simbror fyoro kwar.

¹⁴Rarirya rofyor ras mankaraya, kamnam Tirus ma Sidon nari nasrawen syadi kamnam mkoḇena.

¹⁵ Ma au Kapernaum, woḇo nari be ḇekanow raryas ro nankike? Oroḇa! mboi nari skekef au ḇemun aiḇui.

¹⁶ Mansei ḇemnaf mko ido, ikada imnaf aya. Ma mansei ḇesampum mko ido, imnis isampum aya, ma mansei ḇesampum aya ido, imnis raris isampum ḇewan ayanya.”

¹⁷Ḇarpurya manfamyan samfur rifik ansi skaḇer kuker raryaḇ ma sikofen: “Manseren, rur ḇemaḇaksya kako skunem faro nko, snar snonsnon bedi.”

¹⁸Raimnai Yesus ikofen: “Yamam Ibiris isapi imnis arḇeḇer ro nanki.

¹⁹ Kaku ḇeri yaḇuk kwar faro mko papoik, insa mkaref epen ikakya ma manora ḇeyarek, ma papoik fa mkobuki pyankar samambraḇ ro mbroḇ mkoḇesya, isof nari royo myun mkoḇa beri.

²⁰Rarirya ido, mkoryaḇ awer snar rur ḇemaḇak ansi skunem faro mko, mboi mkoryaḇ snar snonsnon mkoḇena neḇefas epen ro syap ḇero boiyaswaya.”

²¹Rofyor ani kako Yesus iryaḇ rodo Rur Ḇesrenya ma ikofen: “Yakofen kasumasa faro au Mami, Manseren nanki ma supswan, snar wayokef roi nanebur snonkaku ḇefawi ma beswaruser nananem sya, ḇape fasna na faro snon ḇefawi royo ḇaimsya. Mami, roi ḇeradine naiso ḇefrur fa wamarisen na.

²² Nakam Mami ḇyuk na kwar faro aya. Snon oseroḇa beri fa ifawi manseiso Rumkunya, demir monda Kmaya. Ma manseiso ḇemambir Kmaya, demir monda Rumkunya. Ma faro snonkaku mansei Rumkunya imarisen fyasna Kmaya farosya.”

²³Raimnai Yesus iknenef faro manfamyan ḇyesi serer ḇardi ma ikofen: “Aski faro mkamor ḇemam rosai mkomam nane.

²⁴Snar yakofen faro mko: Nabi ma wairek sibor simarisen fa sakmam ma sakmnaf roi mkomam ma mkomnaf nane, ḇape sakmnaf naḇa.”

²⁵ Rofafisu oso snon ḇefawinananem Refo Yahudi oso iyori fa ikofen faro Yesus ḇo doḇo: “Guru, rosai nari yafrur insa yaksma kankenem ḇemna ḇaya?”

²⁶Yesus kyarem faroi: “Rosai sfas ro Refo sasoser Yahudi? Rosai wawasya ro dia?”

²⁷ Snon ani kyarem: “Waswar Manseren Allah bedi kuker snembri ḇesiper ma kuker rur bedi ḇesiper ma samambraḇ ma kakara bena kam ḇesiper ma waswar min besi imnis waswar mankundaw.” Yesus ikofen faroi:

²⁸ “Kankarem bedi kyaku, wafrur rarirya ido, nari wasma kankenemya.”

²⁹Ḇape snon ani iḇe ḇyuk kaku ḇe mankundi, inja ikofen faro Yesus: “Rarirya ido min ayesya siso?”

³⁰Yesus kyarem: “Snon oso isya dado ro Yerusalem ḇe Yerikho: Ro nyanya bori, isapi ro manfasyar ono siḇrasna ma sfasyar pres roi ḇeḇor ḇyena, nererḇa ḇoi smuni kako isof iḇe imar, raimnai siburi.

³¹Rofafisu ani, imam oso imbranuk ro nyan ani; myam snon ani, ḇape iburi.

³²Rarirya kuker snon Lewi oso dakbur aryari ro moḇ ani, rofyor myam snon ani.

³³Raimnai snon Samaria oso dakmbranuk ro moḇ ani; rofafisu myam snon ani, saswarya dek ro sne ḇyedi.

³⁴Inja isnefer snon ani ma isbawer mani ma anggur ro par ḇyena ma pyarek apepen na. Posa dun snon ani ma ryiri ro keledai mankundi ḇyedi, ma duni ḇe rum seryar roya ma fyadurui.

³⁵Meser ḇyuk dinar risuru faro ḇena rum seryar ro ani ḇo doḇo: ‘Fadurui ma mamwarek naḇye i. Kwoḇes rawo nasyadi ro pipi sine ido nari yafadwer si, rofyor yarer wermaya.’ ”

³⁶Rariso kakara bedi, rofandu snon rikior anskoine manseiso snon sfasyar ani dorḇe min ḇyedi?

³⁷Snon ani kyarem: “Snon ḇefasna saswar faroi.” Yesus ikofen faroi: “Wabur ma wafrur rarirya kako.”

³⁸ Fafisu Yesus ma manfamyan ḇyesi ro marandan sedi, ssuḇer ro mnu oso. Bin ḇenirḇe Marta dorfa Yesus syun ro rum ḇyedi.

³⁹Bin ani ḇeknik ḇyedi snonsnon ḇyedi Maria. Maria kyain fanam Yesus wemin ḇyesuya ma imnaf naḇye farkarkor ḇyena.

⁴⁰Mboi Marta syombirek kaku kuker afuffarmyanya. Inja fyanam Yesus ma ikofen: “Manseren, ḇefandun ḇake, mboi ḇeknik ayedi myam monda ayaḇo yemir yuffarmyanya? Wawan ima ifnoḇek aya.”

⁴¹Ḇape Manseren ikofen faroi: “Marta, Marta, wamkak warek ma wafrur kandera ḇinkundaw kuker roi nabor,

⁴²ḇape oser monda iso ḇeḇefandunya: Maria kyinfir kwar rarwas ḇeḇye syadi, isoine roi oso ipok duni buriḇa.”