Read Biak LUKAS 11 Bible Online

LUKAS 11 - Biak bible

LUKAS 11

¹Rofyor Yesus isya ḇyenadi ro moḇ oso. Fafisu ḇyenadi raimnai, manfamyan ḇyesi oso ikofen faroi: “Manseren, farkor nko ro ḇaḇenadi, imnis raris Yohanes fyarkor manfamyan ḇyesi.”

²Yesus kyarem faro si: “Rofyor mkobenadi ido, mkokofen radine: Mami, nko fasren snonsnon bedi kada; Ḇaḇesasoser bedi ryama kada.

³Buk maḇe inko fandun ḇeḇor ḇemnis ro ras-ras

⁴ma wapyos sasar nkoḇena, snar nko kako nko ḇuk maf faro snonkaku ḇefrur sasar maro nko; ma wun nkoḇe fafrowes na awer.”

⁵Raimnai ikofen faro si: “Rofyor snon oso rofandu mko ryaḇe bati ḇyedi rum ḇyedi ro romfawru ma ikofen faroi: Naeko, yorfa bukma ḇeaya mamami rikior,

⁶snar bati ayesi oso ro marandan ḇyedi ḇyeryar ro rum ayedi, ḇape yasma roḇeyan kernofa yafasos faroi ḇa;

⁷yakara ḇoi ḇero rumya nari kyarem faroi: Wakyaren awer aya, kedwaya kyanken kwar ma aya kuker romawa ayesi nkenef kwar; inja nari yakḇok ma yaḇuk roi wor anna faro naek auḇa.

⁸Yakofen faro mko: Snar bati ḇyedirya inja imewer kaku ikḇok fa ḇyuk faroi roi dor ani, ḇape snar ifawi imaiḇa ḇo dor yayayu ḇesya kwar eḇedari ikḇok ma ḇyuk faroi roi ḇye fandun ani.

⁹Eḇedari yakofen faro mko: Mkore, nari neḇeḇuk faro mko; mko sewar, snar nari mkosma; mkonuk snar nari kedwaya syeḇen fabe mko.

¹⁰Snar mansei ḇeyorya, nari ssḇuk faroi ma mansei ḇesewarya, nari isma ma mansei ḇenuk kedwaya, nari kedwaya syeḇen faroi.

¹¹Kma mansei rofandu mko, rofyor romawa ḇyedi dor in roi ḇesyaḇo, ḇyuk ikak faro romawa ḇyedi fa fyadwer inya?

¹²Roḇaido, rofyor dor man pnor, nari ḇyuk faroi manora ḇeyarek sayaryurya?

¹³Inja rofyor ḇeḇarḇor mkoya mkofawi mkoḇuk roi ḇeḇye faro romawa mkoḇesi, rosai wer kuker Kma mkoḇedi ro boiyaswa! Nari ḇyuk Rur Ḇesrenya faro mansei ḇeyor faroiya.”

¹⁴Ro rarwan oso Yesus iyaw rurḇemak ḇefrur awer ro snon oso. Rofyor rurḇemaḇak ani isasyarbur snon awer ani, dawawos wer. Inja snonkaku ḇeḇor ansi sikandor.

¹⁵ Ḇape rofandu si ono sikofen: “Iyaw rurḇemaḇaksya kuker papoik ro Beelzebul, mananir ro Ibirisya.”

¹⁶ Ono kako sor aḇyair oso ro boiyaswa faro Yesus, fa sifrowespan i.

¹⁷Ḇape Yesus ifawi swaruser sena inja ikofen: “Ḇaḇesasoser ḇefarmafmef nari imkok, ma kina ḇefarmafmef, nari imkok.

¹⁸Rofyor Ibirisya kako irarwas ma isampum mankundi, rariso ḇaḇesasoser ḇyedi nari dores nadworen? Snar mkoḇo, yayaw Ibirisya kuker papoik ro Beelzebul.

¹⁹Inja rofyor yayaw Ibirisya kuker papoik Beelzebul, kuker papoik rosaiso ḇesoi mkonsya ssḇuki iyawiya? Snar rarirya siso nari ḇeḇemankara faro mko.

²⁰Ḇape rofyor yayaw Ibirisya kuker papoik Allah, inja kaku ḇeri Ḇaḇesasoser Allah ryama faro mko kwar.

²¹Rofyor snonkaku ḇesambraḇ oso fyasos fa ḇyuk ḇri warek rum ḇyedi, inja roi ḇeḇor ḇyena kam neḇekadiren.

²²Ḇape rofyor snon ḇesambraḇ syadi snon ani, oso ryama doper ma ifrur kafyoi kwar, nari snon ani dun romamun ḇyena buri kwar insape irarwas fasyar ḇyena.

²³ Mansei ḇefnoḇek ayaḇa, isampum aya ma mansei ḇeryur fnoḇek ayaḇa, snonkaku ani fyasasye.”

²⁴“Rofyor rur ḇemaḇakya isasyarbur snonkaku oso, ikada imbran ḇyediwai ro moḇ ḇeḇemarires fa syewar mananai, ḇape snar isma moḇoḇa, inja ikofen: Nari yakaḇer ḇerum yabur kwar ani.

²⁵Inja ryama isma rum ani ḇye ḇeyariref sren ma ḇye ḇefasos naḇye kaku.

²⁶Inja isasyar ma ḇyeḇuk rurḇemaḇak rifik ḇese ḇesawo syadi wer roi, ma ssun fa sikenem ro dia. Rarirya ro ḇarpurya snon ani kankenem ḇyedi iḇyeḇa syadi wer ro kankenem ḇepon ḇyani.”

²⁷Fafisu Yesus dawawos kaker, bin oso rofandu kawasa ḇeḇor ansi dor ma ikofen faroi: “Aski faro bin ḇeyores au ma ḇesus au.”

²⁸Ḇape Yesus ikofen: “Ḇeḇe askiya siso ḇemnaf Allah wos ḇyena ma ḇeḇeuserna.”

²⁹ Fafisu kawasa ḇeḇor ansi spanjuḇer Yesus, inja ikofen: “Syos ine syos ḇeḇarḇor. Simarisen aḇyair oso, ḇape faro si nari yaḇuk aḇyair osoḇa derer aḇyair nabi Yunus.

³⁰ Snar imnis Yunus ḇeḇe aḇyair faro kawasa Niniwe, rarirya kako Rumkun Snonkaku nari ḇyeaḇyair faro syos babo ine.

³¹ Rofyor ḇaḇemankaraya, wairek ḇeraker ḇar wambraw ani nari ikḇawes fnoḇek syos ine ma nari ḇyuk samamyai faro si. Snar wairek ani ryamaker sup pember insa dakrower mamkarkir Salomo, mboi kaku ḇeri oso isya ro dine isyadi ro Salomo.

³² Rofyor ḇaḇemankaraya, kawasa Niniwesya nari siḇersi fnoḇek syos ine ma nari ssḇuk samamyai farosi. Snar kawasa Niniwesya simbror rofyor simnaf Yunus ḇaryas ḇyena, mboi kaku ḇeri oso isya ro dine isyadi ro Yunus!”

³³ “Snonkaku oso ḇaḇeri ḇepam paramrom raimnai ryiri ro rumbaḇ roḇaido ikawefi kuker badei, mboi ryiri ro adaduya, insa snonkaku ḇesun syakam, smam sananai ḇyedi.

³⁴ Mkamor besuya suḇe paramrom faro baken ḇesiper bedi. Rofyor mkamor besuya suḇye, baken ḇesiper bedi isnai, ḇape rofyor mkamor besuya suyas baken bedi pyampan.

³⁵Eḇedari mamepen naḇye insa sasnai ḇero auya pyampan awer.

³⁶Rofyor baken ḇesiper bedi isnai ma moḇo pyampan ḇa, nari baken ḇesiper bedi isnai imnis raris paramromya ḇyeisna au kuker sananai ḇyedi.”

³⁷Fafisu Yesus ḇyuk farkarkor raposa, snon Farisi oso dor fa dakanan ro rum ḇyedi. Inja syun ro rum ani ma kyain danan.

³⁸Snon Farisi ani myam rarirya ikandor snar Yesus danan ḇoi ḇyan ḇramin ḇyesuya baim.

³⁹Inja Yesus ikofen faroi: “Snon Farisi mkoya mko fasren sek aninem ma bensya ḇandisi, mboi mkosnemna nafo kuker fasyar ma ḇarḇor.

⁴⁰Ne, snonkaku ḇefawi royoḇa, mkofawi ḇake ḇefrur ḇar ḇandiya, iḇefrur kako ḇar ḇeradoya?

⁴¹Ḇape roḇean sek aninem ma bensya siser na buknaḇe farsarser ido kaku ḇeri ḇese nakam nari nasren faro au.

⁴² Ḇape nari mkoroë, ne snon Farisi, snar mkoḇak ḇar ḇeḇesamfurya ro konsop, kandefun ma rofaran ḇese na kam, ḇape mko fandun Allah napnapes ma saswar ḇyediḇa. Mkofrur oser ḇoi ḇesena neḇemamkyof awer.

⁴³Farisi mkoyane, mkoroë, snar mko marisen mko kon ro ḇarpon kaku ro rum ari ma mko marisen mko sma syom ro buḇes.

⁴⁴Mkoroë, snar mkomnis rus ḇeḇe aḇyairḇa; snonkaku simbran ro bo na ḇoi, sifawi naḇa.”

⁴⁵Rofandu ḇefawinananem Refo Yahudi ansi oso kyarem ma ikofen faro Yesus: “Guru, wakofen radianya, kworyae inko kako.”

⁴⁶Ḇape kyarem: “Ne, snon ḇefawinananem Refo Yahudi, mko kako mkoroë, snar mkorir kamnam ḇemarḇak faro snonkaku ḇesambraḇ fa ḇeḇar naḇasya, ḇape mankun mko kada mko ḇyunek ro kamnam ani kuker ḇrampin osero ḇaḇeri.

⁴⁷Mkoroë, snar nabi-nabi mkoḇawes rus ro ansya, kpu mkoḇesi aipyokem smun sirya.

⁴⁸Kuker fararur ḇerarirya, mkoḇuk kaku, ro fararur ḇeḇyeḇa up mkoḇesi sifrur kwar na, snar smun nabi-nabi ansi kwar ma mkoḇawes rus sena.

⁴⁹Eḇedari mamkarkir Allahya ikofen: Nari yawan faro si nabi-nabi ma manwawan ayesi ma ono ro nabi-nabi ma manwawan ansi nari sḇeḇemun ma sewayam si.

⁵⁰Inja ro supswan ine ḇyeḇefrurya rik ḇesbawer ro nabi-nabi ansya kam nari nek ro syos ine mko.

⁵¹ Randak ro Habil rik ḇyena isof ro Zakharia rik ḇyena smun kwar ro farswaf rokef farsarser ma Allah Rum ḇyedi. Mboi, yakofen faro mko: Sikam nari sḇuksi sisof syos ine mko.

⁵²Mkoroë, ne ḇefawinananem Refo Yahudi, snar mkun kwar asyopder ro fawawiya, ma mankun mko kada mkaksunḇa ma snonkaku ḇeḇesewar fa ḇesunsya mkodwarek si.”

⁵³Ma rofyor Yesus ibur moḇ ani, ḇefawinananem Refo Yahudi ma Farisisya sḇair pdef ma sifuken ḇesya kwar kuker roi nabor.

⁵⁴Kuker nyan berarirya sḇesewar insa sisma wos ḇesasar oso roi ḇeḇe knam fa sḇukfori.