Read Biak LUKAS 12 Bible Online

LUKAS 12 - Biak bible

LUKAS 12

¹ Rofafisu ani snonkaku syaran-syaran spanjuḇer kwar, isof sifyosapepen. Rarirya Yesus ikofen ḇepon faro manfamyan ḇyesi: “Mkoḇesasor mko ro ragi isoine ḇaḇeankarkar ro kawasa Farisisya.

² Rosai ḇesisenya nari ḇyeḇeḇas ma rosai ḇeyokef nari ḇyeḇefawi.

³Inja rosai mkokofen ro pampan nari neḇemnaf ro isnaya, ma rosai mkofarararum ro simna nari neḇefadwaren.”

⁴Ne, batiyena mko, mkokmkak awer faro ḇemun bakenya, ḇape ḇepok ḇefrur royo ro ḇarpurya werḇa.

⁵Iḇye yafasna faro mko mansei nari mkomkakya. Mkomkak faro Allah, ḇemun raposa, ḇena papoik fa ḇesawen rofor ḇembrerḇaya. Mkokyare, iso mkomkak faroya!

⁶Manesu ririm seḇeḇoḇ kuker maeja pipi risuru. Rariryano Allah ḇyefanander osero ḇaḇeri,

⁷rarirya kako snonburyam ro ḇukor bedi neḇekor kwar. Eḇedari mkomkak awer, snar mkoḇe maeja syadi ro manesusya.

⁸Mkoswarepen naḇye: Mansei ḇekarem aya roḇarpon snonkaku, Rumkun Snonkakuya nari dakkaremi roḇarpon Allah malaikat ḇyesi kako.

⁹Ḇape mansei ḇefamyun aya roḇarpon snonkaku, nari Rumkun Snonkaku dakfamyuni roḇarpon Allah malaikat ḇyesi kako.

¹⁰ Rofyor snonkakuyo isampum Rumkun Snonkakuya, nari isma payasyosro sasar; ḇape mansei ḇeyonef Rur Ḇesrenya, nari isma payasyos ro sasar ḇyenaḇaḇeri.

¹¹ Rofyor sun mko faro kankain karkara jemaat roḇa faro ḇesasoser ma ḇena papoiksya, mkomkak awer rosai nari mkokofen fa mkoḇesano warek mko.

¹²Snar rofafisu ani beri Rur Ḇesren fyarkor mko ro rosai nari mkawosna.

¹³Snon oso ro snonkaku ḇeḇor ansi ikofen faro Yesus, ḇo doḇo: “Guru, wakofen faro naek ayedi insa irwas pusaka mami imarbur na fa namamnis.”

¹⁴Ḇape Yesus ikofen faroi: “Naeko, mansei ḇekanow aya fa yaḇe mankara roḇa manfandu faromu?”

¹⁵Ikofen wer farosi: “Mkowaren ma mkosasor mko ro mnuk rmomenya, snar snonkaku oso nana ḇyena nabor rariso wer kankenem ḇyedi ḇyeknam ro nana ḇyenaḇa.”

¹⁶Posa kwar ikofen farosi sarḇer oso: “Snon ḇenana oso isya saprop ḇyena nbuk an ḇeḇor kaku.

¹⁷Inja kyara ro sneḇyedi, ḇo doḇo: ‘Rosai nari yafrurya, snar yasma moḇ fa yabuki ikram an ḇeḇor ayenaneḇa.’

¹⁸Raimnai kyara romankundi, ḇo doḇo: ‘Iḇye yafrur radine; nari yakakok sayar ayena ma yaḇawes ḇeba syadi wer fa yaḇuki ikram an ma roi ḇeḇor ayena.’

¹⁹Raimnai nari yakofen faro rur ayedi: ‘Rur yedi au, roi ḇeḇor nakam namawes kwar ma nari naḇroḇa ḇewampasi wambarek nabor; wamnaisu au, wan winem ma wamarisen!’

²⁰Ḇape Allah ikofen faroi: Ne, snonkaku ḇefawi royoḇa, ro roḇ ineḇeri rur bedi nari ḇyeḇeyun bur aw, ma rosai fasos kwar na, mansei nkain faroya?

²¹Rarirya kuker snonkaku ḇeryur nana faro mankundi, mboi syewar fa dakna nana ro Allah mamam byenaba.”

²²Yesus ikofen faro manfamyan ḇyesi: “Eḇedari yakofen faro mko, ‘Mkoḇeḇirḇar awer snar kankenem mkoḇena, rosai nari mkanya, ma ro baken mkoḇena, rosai nari mkofmarya.’

²³Snar kankenemya ḇyemaeja syadi ro roḇean ma bakenya ḇyemaeja syadi ro famamarya.

²⁴Mkomamepen ro manwawa ḇeyakkakerḇa ma ḇerabarḇa ma sakna kron roḇa sayarḇa, rariryano Allah fyansi kuker roḇean. Rosai wer kuker mko snonkaku ḇesyadibur man ansi!

²⁵Mansei rofandu mko snar ḇirḇar ḇyena, inja pyam pinkyur oser ro kankenem ḇyedi?

²⁶Inja, rofyor mkosambraḇ fa mkofrur roi kasun osoḇa, rosai ḇeḇewar mkoḇeḇirḇar ro roi ḇeḇor ḇese?

²⁷ Mkomamepen ro mampyoper ḇefawi ḇerorenḇa ma ḇeyanyanemḇa, ḇape yakofen faro mko: Wairek Salomo kuker kamayai ḇeḇor ḇyenakam, ḇape syansun sansun ḇepyum rariso wer namnis kuker payamyum pampen mampyoper aniḇa.

²⁸Inja, aḇris ḇesur ro ras ine raimnai meser sisawen ro forya Allah fyamankorsi, rosai wer kuker mko snonkaku ḇekyar mnisḇa!

²⁹Inja, mkowos awer rosai nari mkan roḇa rosai nari mkinem, ma mkoḇeḇirḇar awer.

³⁰Snar nanekam er-er ro supswan ine ḇeyakfawi Allah ḇasya siso ḇesewar na. Ḇape kma mkoḇedi ifawi fandun mkoḇenakam.

³¹Ḇape mkosewar ḇaḇesasoser ḇyedi resari insape nari ḇyukna faro mko kako.

³²Ne, naek ḇeborḇa mko, mkomkak awer! Snar Kma mkoḇedi imarisen ḇyuk faro mko ḇaḇesasoser ani.

³³Mkobob nana mkoḇenakam fa mkobuk farsarser! Mko sip faro mko mansrip ḇedauḇa, isoine nana oso ro boiyaswa nari ḇeḇroba, ma ḇekarawsya nari skarawḇa ma as sya nari san naḇa.

³⁴Snar romoḇ nana bena naisya, rodia kako snebedi isya.”

³⁵ “Iḇyekada mkofasos mkoḇoḇek sifer mkoḇena ḇesya kwar ma paramrom mkoḇena kako nasnai ḇesya kwar.

³⁶ Ma iḇyekada mkomnis snonkaku ḇewaf tuan sedi ḇeburker ḇaḇefakawawin, insa ryama nyuk kedwaya fasaw kedwaya ḇyeḇeseḇen faroi.

³⁷Aski faro manfamyan ḇewaren isof tuan ḇyedi ryama. Yakofen faro mko: Kaku ḇeri nari ḇyoḇek sifer ḇyedi ma nari dor si fa skain sanan ma mankundi ryama duffarmyansi.

³⁸Ma rofyor ryama ro roḇya faduri roḇa ikamadui meser ma isrow sifrur rarirya aski farosi.

³⁹ Ḇape insa mkofawi: Rofyor tuan ḇena rumya ifawi oras rosai ḇekarawya ryama nari myam monda rum ḇyediḇo skakokiḇa.

⁴⁰Iḇye mkokako mkepen mkokada ma mkofasos snar Rumkun Snonkakuya nari ryama rofafisu mkofawiḇa.”

⁴¹Petrus ikofen ḇo doḇo: “Manseren inkoiso swarḇer ḇaryar inkoyake roḇaḇo wakofen faro snonkakusya kamke?”

⁴²Manseren kyarem: “Inja, manfamyan mansei ḇeḇeaunos ma ḇefawinananem nari tuan ḇyedi ikanowi fa ḇyemananir faro manfamyan ḇyesikam fa ḇeḇuk roḇean farosi ro fafisuya?

⁴³Aski faro manfamyan ani rofyor tuan ḇyedi ryama ma isrow isya ro fararur ḇyena.

⁴⁴Yakofen faro mko: Kaku ḇeri nari tuan ḇyedi ikanowi fa myamwarek nana ḇyenakam.

⁴⁵Ḇape rofyor manfamyan ani iḇarḇor ma ikofen: Tuan ayedi nari isamberen mumaḇa, inja iprer manfamyan snon ma bin, ma dan dinem isof imser.

⁴⁶Ḇape manfamyan ani tuan ḇyedi nari ryama ro ras manfamyan ani ifawiḇa ma nari myuni ma ifrur faroi imnis raris snonkaku ḇeḇeawnosḇasya.

⁴⁷Mboi manfamyan ḇefawi tuan ḇyedi marisen ḇyedi ḇape ḇefasosḇa roḇa ḇeḇeuser tuan ḇyedi marisen ḇyediḇa, nari isma aprer nabor.

⁴⁸Ḇape mansei ḇefawi marisen tuan ḇyediḇa ma ifrur roi ḇesasar ḇefnai ayos, nari isma ayos ḇemanan. Snonkaku mansei, ssḇuk nabor faroya nari sor nabor syadi roi, ma faro mansei sikyar nabor faroya, nari sor nabor syadi wer roi.”

⁴⁹“Yarama insa yaso for ḇe supswan ine ma yakyar kako for ani isak kwar!

⁵⁰ Nari yasma kandera ḇefnakḇa ma sne yedi ḇyefesfyas, rofyor roi ḇeḇesya ani ryama ḇaim!

⁵¹Mkokara ḇo mkoḇo, mboi yarama yun aski faro supswan ine? Roḇa, yakofen kaku ḇeri faro mko yun askiḇa mboi famfaḇri.

⁵²Snar randak ro ras ine famfaḇri naisya fandu snonkaku ririm ro rum oso, kyor skosampum kuker suru ma suru susampum kuker kior.

⁵³ Kmaya isampum romawaya ma romawaya isampum sinan ḇyedi, snaya isampum inai ḇyedi, ma inai isampum snari, imbanyoya isampum imbikin ḇyedi ma imbikin ḇyedi isampum imbanyoya.”

⁵⁴ Yesus ikofen faro kawasa ḇeḇor ansi wer: “Rofyor mkomam mandepna nker ro ḇar wambarek ido mkokofen, ḇo mkoḇo: Nari mekemya imyun ma imyun rarirya.

⁵⁵Ma rofyor wambrawya iso, mkokofen ḇo mkoḇo: Rasya nari isam, ma isam kaku rarirya.

⁵⁶Ne, snonkaku ḇeḇarḇor, rosai mkomam ro supswan ine ma nankiya mkofawi mkokara ḇaḇir na, rosai eḇedari mkokara ḇaḇir awar ineba?

⁵⁷ Ma snaro mko kako mkawos namuk ro mankun mko ro rosai ḇenapes naḇa?

⁵⁸Snar, rofyor mko kuker mbroḇ mko ḇesi mkora ḇeḇarpon ḇesasosersya ḇaim mkoḇesewar fa mkoḇedasi kuker si rofafisu mkoisya ro nyandibo, insa dun awer aw ḇeḇarpon mankaraya ma mankaraya dakḇuk aw faro ḇefnoḇeki ma ḇefnoḇekisya sisawen au ro bui.

⁵⁹Yakofen faro mko: Mkopok mkosasyar ro diwaḇa, isof mkoḇak pres njaki mkoḇena resari.”