Read Biak LUKAS 15 Bible Online

LUKAS 15 - Biak bible

LUKAS 15

¹ Ro ras oso, snon ḇeyor som ma snonkaku ḇesasar sibor kaku sra fa sakmnaf Yesus.

²Inja snon Farisi ma snon ḇefawinananem Refo Yahudi sikofen: “Inja snonkaku ḇesasarsya nyasi ma danan fnoḇeksi.”

³Rarirya Yesus ikofen sarḇer ine farosi:

⁴“Mansei rofandu mko, ḇesma domba utin oser, ma oso rofandu domba ansi iḇor ido, rosai nari ifrurya? Nari ryir domba samfur risiw seser risiw ansi ro sup ḇeḇeursḇa, ma rya fa syewar domba ḇeḇor ani isof isrowi?

⁵Ma rofyor isrowi kwar, dowi ma ikamari kuker raryaḇ;

⁶ma rofyor rya ro rum kwar, dor maniḇoḇ ḇyesi ma snonkaku ḇefanami sya, ma ikofen farosi, ‘Mko marisen fnoḇek aya, snar domba ḇeḇor ayedi yasrowi kwar!’

⁷Yakofen faro mko: Rarirya kako nari raryaḇ syadi ro boiyaswa, snar snonkaku ḇesasar oser imbror, isyadi wer ro raryaḇ snar snonkaku samfur risiw seser risiw ḇenapes, ḇeḇefandun marandor ḇa.”

⁸“Roḇa bin mansei ḇena kumpan sarak samfur, ma rofyor oso ryo, rosai nari ifrurya? Nari pyam padamara ma syewar kuker aunos isof isrowi.

⁹Ma rofyor isrowi kwar, dor bati ḇyesi ma snonkaku ḇefanam rum ḇyedi ma ikofen farosi, ‘Mkomarisen fnoḇek aya, snar kumpan ḇero ayani yasmai kwar.’

¹⁰Yakofen faro mko: Rarirya kako nari raryaḇ isyadi fandu Allah malaikat ḇyesi, snar snonkaku ḇesasar oso imbror.”

¹¹Yesus ikofen wer: “Snon oso nya romawa risuru.

¹²Ḇedarya ikofen faro kmari: ‘Mami, bukma ḇe aya rarwas ro nana koḇena ayena maḇe aya.’ Inja kmari irarwas nana anna rofandu sko.

¹³Ḇarpurya ro ras riḇeso romawa ḇedar ani ḇyoḇ rarwas ḇyan nakam, raimnai ryaḇe sup ḇeḇinkwan. Rodiwa ḇyoḇ farfnak nana ḇyena kuker kankenem ḇeḇe fromo monda.

¹⁴Rofyor nana ḇyena naḇro kwar, basbiser ḇebaya myun mnu ani ma ikako syaḇarar.

¹⁵Inja rya fa ifararur faro tuan oso ro mnu ani. Snon ani iwani ḇe yaf ḇyedi fa iwaren randip ḇyesi.

¹⁶Ma imarisen iser snewar ḇyedi kuker roḇean randip anna, ḇape snonkaku osero ḇaḇeri fa ḇyuk roi oso faroi.

¹⁷Insape iwasen ma ifawi kankenem ḇyedi, ma ikofen: ‘Snonkaku ḇefararur faro kamami san kamayai, ḇape aya rodine, yaḇe yamar kuker basbiser.

¹⁸Nari yayor aya ma yabur ḇe kamami ma yakofen faroi: Mami, yaḇesasar faro Allah ma faro mami,

¹⁹inja wor awer aya ḇe romawa bedi mboi wafrur aya imnis snonkaku ḇeyan sasuref faro mami.’

²⁰Rarirya iyori ma ibur faro kmari. Fafisu ḇyinkwan kaker, kmari myam ḇeponi kwar ma saswarya dek ro sne ḇyedi. Inja kmari ifrar ma dawer epeni ma isyumi.

²¹Ḇape romawa ani ikofen faro kmari: Mami yaḇesasar faro Allah ma faro mami. Inja yasyus fa wor aya ḇe romawa bediḇa.

²²Ḇape kmari ikofen faro manfamyan ḇyesi: ‘Mkun fasaw syatu ḇepyum kakuyo ma mkoḇe fa syansun ma mkopanai kawin oso ro ḇrampin ḇyedi, ma mkoḇuk roi ḇesower ro wemin ḇyesuya.

²³Ma mkun sapi kuḇ ḇeḇebaken ani, ma mkomuni raimnai mkorama kan komarisen.

²⁴Snar romawa ayedi imar ḇape ikenem kaḇer, iḇor kwar ḇape kosmai wer.’ Rarirya sirandak marisen ani kuker raryaḇ.

²⁵Ḇape romawa rakya isya ro yaf, ma rofyor ibur fa fyanam rumya, imnaf rakrok sonker, doya mas-mas ma fayaryer anna.

²⁶Inja dor manfyan oso ma ifuken faroi: ‘Rosai eḇesya ro rumya?’

²⁷Manfyan ani ikofen: ‘Ḇedar bani kyaḇer kwar ma kmami myun sapi kuḇ ḇeḇebaken ani, snar isma kaḇer romawa ḇyedi kuker ḇaḇye.’

²⁸Rarirya romawa rak ani imsor ma imewer daksunri. Inja kmari isasyar fa dakawos sneprei.

²⁹Ḇape kyarem faro kmari ma ikofen: Wampasi wambarek nabor kaku, yuffarmyan mami, ma yaḇeyuk sasoser bena oso ḇaim, ḇape wakḇuk nek-nek mkun oso fa yaḇuki dakmarisen kuker maniḇoḇ ayesiḇa.

³⁰Insape romawa ḇefnak mami nana bena faro bin ḇesasar ine ryama, kwaruk sapi kuḇ ḇeḇebaken ani faroi.

³¹Ḇape kmari ikofen faroi: Romawa yedi, awma ras nakam awsya kuker aya ḇesya kwar, ma roi ḇeḇor ayena, roi ḇeḇor ḇenairya.

³²Iḇyekada rwama komarisen ma koryaḇ, snar ḇedar bani imar kwar ḇape ikenem kaber, ibor kwar fama kosma kaḇeri wer.”