Read Biak LUKAS 16 Bible Online

LUKAS 16 - Biak bible

LUKAS 16

¹Yesus ikofen kako faro manfamyan ḇyesi: “Snon ḇenana oso isya nya snon ḇekram kumpan oso. Snon ḇenana ani imnaf manwarwaren ḇyani ḇyoḇ afafer nana ḇyena.

²Inja dor manwarwaren ani ma ifuken: Kaku ro roi yamnaf ro aw na? Buk kankarem ḇenapes ro fararur bedi, snar nari wafararur ro fararur ani werḇa.

³Manwarwaren ani kyara fasis ḇo doḇo: Rosai nari yafrurya? Tuan ayedi ḇyuk fa yamnai ro fararur manwarwarenya. Fama nari yaḇekir fa yuf adafyaḇa, ma yafararyor yan nari yamai.

⁴Yafawi rosai nari yafrurya, insa rofyor yamnai ro fararur manwarwarenya, yasma snonkaku ono fa yaḇeryarus ro rum sena.

⁵Raimnai dor snonkaku ḇeḇe nyaki kwar faro tuan ḇyedi, oser ḇe oser, ma ikofen faro ḇeponya: Nyaki ḇena faro tuan ayedi ḇeso irya.”

⁶Snon ani kyarem ḇo doḇo: “Mani fyom utin oser. Raimnai ikofen faro snon ani: Syap nyaki bedi isoine, kwain ma wafrur syap nyaki oso ḇese, ro knikine beri: Fas fyom samfur ririm.

⁷Posa ikofen faro ḇeḇesuruya: Awkako, wasma nyaki riḇeso? Snon ani kyarem: Gandum kadu utin oser. Ikofen faro snon ani: Syap nyaki ḇedi isoine, wafrur syap nyaki oso ḇese; fas ḇayir kadu samfur riwar.

⁸Inja tuan ani isandik manwarwaren ḇeḇye ba ani, snar ḇyerarirya kuker kakara ḇeḇye. Snar romawa supswan senaḇye faro min sesi, ro romawa isnasya.

⁹Ma yakofen faro mko: Mkoseref ḇaḇebati kuker arasai ḇeḇyeḇa na, insa rofyor arasai anna nafnoḇek mkoḇa kwar ido, mkoiso ḇesma mob ro rum ḇekain fyoroya.”

¹⁰“Mansei ḇenapes ro roi kasun na, nari inapes kako ro roi ḇeba na. Mboi mansei ḇenapesḇa ro roi kasun na, nari inapesḇa kako ro roi ḇeba na.

¹¹Inja, mkonapes faro arasai ḇeḇyeḇa na, mansei nari ḇekyar mko ro nana ḇekakuna?

¹²Ma mkonapes faro snon ono ḇese nana senaḇa, mansei nari ḇeḇuk nana mkoḇena faro mko?

¹³ Manfamyan oso duffarmyan faro tuan risuruḇa. Snar rofyor rarirya ido, nari dayin oso ma iswar ḇeseya, roḇa nari ḇyeuser faro oso ma fyandun ḇeseyaḇa. Mko fararur faro Allah ma faro arasai awer.”

¹⁴Farisisya simnaf wos anna kam ma simbrifi snar sikada sewomen faro pipiya.

¹⁵Raimnai Yesus ikofen farosi: “Mkoḇuk kaku ro mankun mko, ro ḇarpon snonkaku, ḇape Allah ifawi sne mkoḇena. Snar roi snonkaku semanmin na, Allah dayin na.

¹⁶ Sasoser ro Refo Yahudi ma syap nabi-nabi sena nambran isof fafisu Yohanes; ma rofyor ani Ankankinem Ḇeḇye Allah Ḇaḇesasoser ḇyedi ḇyeḇeḇaryas, ma snonkaku oser-oser sfamfaḇri fa siḇe saksun roi.

¹⁷ Snar nanki ma sup na nari napromes, ḇape kakop oso ro Refo Yahudi nari ryoḇa.

¹⁸ Snonkaku oso fyaspar swari, raimnai fyakawin oso ḇese, ifrur farbuk; ma mansei bebekawin bin ani ifrur farbuk kako.”

¹⁹“Snon ḇenana oso syansun mararesi kuker syatu ḇeyafuk kaku ma ras nakam ikenem kuker kamayai.

²⁰Ma snon ḇesaḇarar oso isya snonsnon ḇyedi Lazarus; baken ḇyedi ifo kuker armaker, ma ḇyarek ro kedwai snon ḇenana ani ḇyedi,

²¹ma imarisen iser snewar ḇyedi kuker roḇean mir-mir ḇesapi ro meja snon ḇenana ani. Isyadi wer naf ḇyesi srama sreḇ par ma armaker ḇyesi.

²²Fyoroḇa snon ḇesaḇarar ani ipsur, ma malaikatsya suni ma sriri ro Abraham wesop ḇyesuya.

²³Snon ḇenana anya kako dakpsur, ma seraki ma rofafisu isma kandera ro mun aibui myam ḇinkwan raryas ro Abraham ifran Lazarus.

²⁴Inja kyaru muryas ma ikofen: ‘Mami Abraham, waswar aya; wawan Lazarus, syowen ḇrampin ḇyesi ro war kenoma ipnunek ramar yedine, snar yaḇekandera mankenem ro for ine saksak ḇyedi.’

²⁵Ḇape Abraham ikofen: ‘Rumkun yedi, waswarepen, awma wasma ḇaḇye bena kwar rofyor wakenemya. Mboi Lazarus isma kandera ḇefnakḇa. Baboine isma sneprei ma waksma kandera ḇefnakḇa.

²⁶Oso wer ido, rofandu inko ma aw, ḇron ḇeba oso isya pyandwas ko, inja mansei ḇero dine ryaḇe ḇar iyafaḇa, ma mansei ḇero dia, dunuk mumaḇa.’

²⁷Ḇape snon ḇenana ani ikofen: ‘Rarirya ido yor faro aw, mami, insa wawan Lazarus ḇe rum kamam ḇyedi,

²⁸snar yana ḇedar ririm, insa ḇyuk swarepen kaku farosi, insa ssun awer beri ḇe moḇ ḇeḇekandera ine.’

²⁹Ḇape Abraham ikofen: ‘Syap Moses ma syap nabi-nabisya sisma na kwar. Iḇye simnaf ḇaḇesaksi anna.’

³⁰Ḇape snon ḇenana ani kyarem: ‘Roḇa, mami Abraham, snar oso rofandu ḇemarsya kyaḇer farosi, nari simbror.’

³¹Abraham ikofen faroi: ‘Rofyor simnaf Moses ma nabi-nabisya wos senaḇa, nari simnaf snonkaku ḇemar ma beyiber rofandu ḇemarsya wos senaba kako.’ ”