Read Biak LUKAS 18 Bible Online

LUKAS 18 - Biak bible

LUKAS 18

¹Posa kwar, Yesus ḇyuk sarḇer oso fa ḇyefarkarkor faro manfamyan ḇyesi, insa simyaren senadi ḇesya kwar ma sfafayaf awer.

²Yesus ikofen: “Ro mnu oso, Mankara oso imkak Allah ḇa, ma ipok ḇyefandun snonkaku syaḇa.

³Ma ro mnu ani, bin kabom oso isya ryama ḇesya kwar faro mankara ani ma ikofen: Wafnoḇek aya fa wasrow kuker mbroḇ ayedi.

⁴Fafisu riḇeso kwar mankara ani imewer. Ḇape rofafisu oso, ikofen ro sne ḇyedi: Aya ine yamkak Allah ḇa ma yaḇesyowi snonkaku ḇesesyaḇa.

⁵Ḇape bin kabom ine ḇyeyayayu aya ḇesya kwar, inja iḇye kada yaḇuk kaku roi, insa ryamuma kaker awer, snar ifrur marmor aya mankenem.”

⁶Posa Manseren ikofen: “Mkokara rosai mankara ḇeḇarḇor ani ikofenya!

⁷Nari Allah ḇyuk nanapes faro snonkaku kyinfir kwarsya, ma ḇeyori, ro roḇ meser syaḇake? Ma nari ḇyeuryar fafisu naḇo ifnoḇeksi ḇake?

⁸Yakofen faro mko: Nari isamberen fa ḇyuk kaku farosi. Ḇape, rofyor Rumkun Snonkakuya ryama ido, nari isma kakyaro ro supswan ine kakerke?”

⁹Yesus fyawar kako sarḇer ḇekur snonkaku ḇerun min sesya ma soḇo semir sinapes, Yesus ikofen sarḇer ine:

¹⁰“Snonkaku risuru suraḇe Allah Rum ḇyedi fa suḇenadi; snon ansuya oso snon Farisi rirya, ma suminya snon ḇeyor som rirya.

¹¹Snon farisi ani dores ma ḇyenadi ro sne ḇyedi radine: O, Allah, yakofen kasumasa faro au, snar yamnis kuker snonkaku ḇese siyafa ḇa, snonkaku ḇefasyarḇa, ḇeḇarḇor ḇa, ḇefrur farbuk ḇa ma yamnis snonkaku ḇeyor som ine ḇa;

¹²Yafyorḇe suru ro ari swaf oser, ma yaḇuk rarwas ḇar ḇeḇe samfur ro roi ḇeḇor ayena kam.

¹³Ḇape snon ḇeyor som ani dores ḇinkwan ma kyankunem, posa pyanepen ander ḇyedi ma ikofen: O, Allah, waswar snonkaku ḇesasar aya ine.

¹⁴ Yakofen faro mko: Snon anine iburḇe rum ḇyedi kuker napnapes isma ro Allah, ḇape snon Farisi anyama roḇa. Snar mansei ḇeyow mankundi ido, nari ḇyeḇerun ma mansei ḇerun mankundi ido, nari ḇyeḇekanow.”

¹⁵Sinan ono sun romawa kapirare sesya faro Yesus, insa ḇyeḇoksi. Ḇape manfamyan ḇyesi smam mura ido, sisonek snonkaku ansi.

¹⁶Fama Yesus dorsi ma ikofen: “Mkorir romawa ansi insa srama ḇe aya, mkodwarek awersi, snar snonkaku ḇera dinesya siso ḇena Allah Ḇaḇesasoser ḇyedisya.

¹⁷Yakofen faro mko: Kuker kaku ḇeri mansei ḇeseref Allah Ḇaḇesasoser ḇyedi imnis romawa kapirareḇa ido, nari ipok fa daksun roiḇa.”

¹⁸Snon manfarkin oso ifuken faro Yesus, ḇo doḇo: “Guru ḇeḇye, rosai nari yafrur insa yaksma kankenem fyoro-fyoroya?”

¹⁹Yesus kyarem: “Rosai ḇeḇewar wor ayaḇe ḇeḇyeya? Snonkako osero fa iḇye ḇaḇeri, demir monda Allah.

²⁰Wafawi Allah sasoser ḇyena kam kwar: ‘Wafrur farbuk awer, wasararer awer, mamun awer, besyowi snami ma kmam su.’ ”

²¹Snon ani ikofen: “Nane kam yaḇeuser na kwar, rofyor yababoya isof ras ine.”

²²Yesus imnaf rarirya ikofen faroi: “Ḇape roi oser isya kaker fa nari wafrurya: boḇ pres nana benakada ma warwas na faro ḇesaḇararsya, rarirya nari wakna nana ḇero boiyaswa, posa rwama waso aya.”

²³Rofyor snon ani imnaf wos ani, iwarai snar snon ḇenana rirya.

²⁴Raimnai Yesus myami ma ikofen: “Syamswen fafayaḇa, faro snon ḇenanasya saksun ro Allah Ḇaḇesasoser ḇyedi.

²⁵Snar ipyan syadi faro onta oso syun ro mbraifun mkir ḇebaḇa, ro snon ḇenana ḇesewar fa ḇesun ro Allah Ḇaḇesasoser ḇyedi.”

²⁶Ma ḇemnaf ansi sikofen: “Rarirya ido, mansei nari ḇesma koreriya?”

²⁷Yesus ikofen: “Rosai snonkaku sipok ḇaḇeri fa sifrur na, Allah kada ifrur na.”

²⁸Petrus ikofen: “Nkoine nkobur roi ḇeḇor inkoḇena kam ma nkoso au.”

²⁹Ḇape Yesus ikofen farosi: “Kaku ḇeri, yakofen faro mko, snonkaku mansei ḇebur rum ḇyedi, swari, roḇa naek srar ḇyesi, sinan ḇyesi roḇa romawa ḇyesi, snar Allah Ḇaḇesasoser ḇyedi,

³⁰nari isma kaḇer sasuref pararyur, rofafisu ine beri kako ma ro awar ḇeramumaya nari isma kankenem fyoroya.”

³¹Yesus dor manfamyan samfur seser risuru ḇyesya, ma ikofen farosi: “Insape koraḇe Yerusalem ma roi ḇeḇor nabisya sfas fa ḇekur Rumkun Snonkaku ani nari namnis.

³²Snar nari sḇoḇi faro er-er ḇeyakfawi Allah ḇa, ma skoryaye i, sonef i ma saninef i,

³³ma siprer i ma smun i, ma ro ras ḇeḇe kiorya nari diḇeri wer.”

³⁴Ḇape roi ikofen anna, sifawi osero ḇaḇeri, snar kankunes ro wos anna nayokef farosi ma sifawi roi kyara ḇesyan naḇa.

³⁵Rofyor Yesus fyanam fa syuḇer ro Yerikho, snon ḇepraf oso kyain ro sampak andirya ma fyararyor.

³⁶Rofyor snon ani imnaf kawasa ḇeḇor ansi sunuk, inja ifuken: “Rosai sifrurya?”

³⁷Snonkaku sikofen faroi: “Yesus snon Nazaret ani ḇeyunukya.”

³⁸Inja dor: “Yesus, Rumkun Daud, waswar aya!”

³⁹Inja ḇembran ro ḇarponsya sewefi, insa ḇyefasis. Ḇape dor naba syadi wer: “Rumkun Daud, waswar aya!”

⁴⁰Inja Yesus imnai ma iwan fa sun snon ani faroi. Ma rofafisu fyanam faroi kwar, Yesus ifuken i:

⁴¹“Rosai wamarisen insa yafrur faro aw?” Snon ani kyarem: “Manseren, yamarisen kaku yamam wer!”

⁴²Raimnai Yesus ikofen faroi: “Rarirya ido mame, snar kakyar bedi ḇyuk aski faro aw kwar!”

⁴³Ma rofafisu ani beri myame, inja iso Yesus ḇo isandik Allah. Kawasa ḇemam roi ḇeḇesya ani kako sisandik Allah.