Read Biak LUKAS 19 Bible Online

LUKAS 19 - Biak bible

LUKAS 19

¹Yesus syun ro mnu Yerikho ma imbran pdef fa dunuk mnu ani.

²Rodia snon oso isya snonsnon ḇyedi Zakheus, mananir ḇeyor som, ma snon ḇenana rirya.

³Ḇyesewar kaku insama dakmam snon sapḇe Yesus ani, ḇape snar snonkakusya sibor siyari isof ipok dakmamiḇa, snar ḇaken ḇyedi ikakiḇa.

⁴Inja ifrar ḇepon bur snonkaku ḇeḇor ansi, raimnai dek ro ara knam oso insa dakmam Yesus, nari ḇeyunuk rodia.

⁵Fafisu Yesus dunuk ro moḇ ani, myamḇe bo ma ikofen: “Zakheus, wasabu fasaw, snar ras ine yaḇeryar ro rum bedi.”

⁶Rarirya Zakheus isabu fasaw ma isrow Yesus kuker raryaḇ ḇefnakḇa.

⁷Ḇape snonkaku ḇemam roi ḇeḇesya ani sikam sisuremi ma sikofen: “Ḇyeryar ro snonkaku ḇesasarsya rum sena.”

⁸Ḇape Zakheus iyori ma ikofen faro Manseren: “Manseren, rarwas ro nana ayena, nari yaḇuk na faro snonkaku ḇesaḇararsya ma rofyor yun syadi roi ono ro snonkaku onoido nari yakaḇer na ḇe rarwan rifiak.”

⁹Yesus ikofen faroi: “Ras ine askiya isya kwar faro rum ine, snar snon ine kako romawa Abraham ḇyedirya.

¹⁰Snar Rumkun Snonkakuya ryama insa syewar ma ḇyuk koreri faro snonkaku ḇeborsya.”

¹¹Yesus dawos pdef wos ḇyena faro ḇemnafi ro diansya, kuker wos sarḇer oso, snar fyanam kwar ḇe Yerusalem ma kawasa ansi skara ḇo soḇo nari Allah Ḇaḇesasoser ḇyedi ifyafer fasaw.

¹²Inja ikofen: “Snonkaku ḇena mnu oso ryaḇe mnu ḇeḇinkwan insa sisiḇeri fa ḇye wairek ro diya, posa kyaḇer.

¹³Inja dor manfamyan ḇyesi snon samfur, ma ḇyuk pipi brawen samfur farosi ma ikofen: ‘Mkoḇuk pipi sine sfarḇaḇyan rawo isof yakaḇer.’

¹⁴Ḇape snonkaku er ḇyesi sayin i, inja siwan wawan ono fa siyawuseri ma sikofen: ‘Nkomewer snonkaku ine ḇye wairek faro nko.’

¹⁵Inja sisiḇeri ḇe wairek raposa kyaḇer ma ḇye wairek, iwan fa sor manfyan ḇyesi, ḇesma pipi kwar ansi, insa sikofen ḇayir barbor ro pipi sisma ro farḇyan sedi oser-oser fa dakfawi.

¹⁶Inja snon ḇeponya ikofen: ‘Tuan, pipi brawen oser yasma ro aw kwar ani, ḇyuk barbor pipi brawen samfur.’

¹⁷Ikofen faro snon ani: ‘Iḇye kaku ro fararur bedi, aw manfyan ḇeḇye; wanapes ro roi kasun, inja wasma nasan fa wuf sasoser ro mnu samfur.’

¹⁸Snon ḇeḇe suruya ryama ma ikofen: ‘Tuan, pipi brawen yasma ro aw kwar ani, ssḇuk barbor pipi brawen ririm.’

¹⁹Ikofen faro snon ani: ‘Ma aw kako, wuf nasan ro mnu ririm.’

²⁰Ma manfyan ḇeḇe kiorya ryama ikofen: ‘Tuan, pipi brawen banya isine, yakrami ro marḇunya.

²¹Snar yamkak tuan aw, snar yafawi tuan snonkaku ḇepakrek; inja wun roi ḇeḇor wapok rwirḇa ma tuan wuf rosai kwerḇa.’

²²Inja ikofen faro snon ani: ‘Aw manfyan ḇeḇarḇor, nari yaḇe mankara aw, raris mankundaw wos ḇena. Wafawi kaku aya ine snon ḇepakrek, ma ḇeyun roi ḇeḇor yapok yarirḇa, ma ḇeyuf rosai yakerḇa.

²³Rarirya ido, rosai ḇeḇewari rwir pipi ayedi ro snonkaku ḇefarḇyan pipi insa yakaḇer ido, yun pampen ḇyediḇa kukerya?’

²⁴Raimnai ikofen faro snonkaku ḇeyores ro diansya: ‘Mkun pipi brawen oser ani buri ma mkoḇuki faro snon ḇena pipi brawen samfur ani.’

²⁵Inja sikofen: ‘Tuan, nya pipi brawen samfur kwar.’

²⁶Ḇape kyarem: ‘Yakofen faro mko: Snonkaku mansei ḇesma ido, faroi nari ssḇuk wer, ḇape mansei ḇesmaḇa ido, nari sun rosai ismana buri.

²⁷Mboi faro ḇemsor aya ma ḇemewer yaḇe waireksya, mkunsi muma ma mkomunsi ro ḇarpon ayedi.’ ”

²⁸Yesus dawos raposa, pyonsi ro maran ḇyedi ḇe Yerusalem.

²⁹Fafisu fyanam ḇe Betfage ma Betania, ḇekain ro bon ḇenirḇe urek Zaitun, iwan manfamyan ḇyesi snon risuru.

³⁰Kuker ananun: “Muraḇe mnu ḇero ḇarpon muḇediwanya: ‘Ma rofyor musun ro diwa, nari musrow keledai kuḇ babo oso sfesi, ma snonkakuyo deki ḇayim. Muper keledai ani ma muyuni muma.’

³¹Ma rofyor snonkaku oso ifuken faro mu rosai ḇeḇewari muperiya? Nari mukarem radine: ‘Manseren ḇyefanduni.’ ”

³²Inja manfamyan ansuya sura ma susrow roi ḇeḇor anna raris moḇ Yesus ikofen raya.

³³Fafisu super keledai ani, snonkaku ḇena keledai ani ifuken: “Rosai ḇeḇewari muper keledai iya kukerya?”

³⁴Sukarem: “Manseren ḇyefanduni.”

³⁵Inja suyun keledai ani faro Yesus, raima sḇori kuker sansun sena ma sifnoḇek Yesus fa dek roi.

³⁶Ma fafisu Yesus dek ro keledai ani, sḇor sansun sena ro nyanya.

³⁷Fafisu fyanam Yerusalem, ro nyan ḇeyado ro urek Zaitun, manfamyan ḇyesi ma ḇeyakeri ansya kam simarisen ma sisandik Allah kuker mkaren ḇeba snar aḇyair kanandor smam kwar na.

³⁸Sibras ma sikofen: “Ḇaḇeḇok faroi ḇeramuma imnis Wairek kuker snonsnon Manseren, aski ro boiyaswa ma syom faro Allah ro moḇ ḇekaki syadi!”

³⁹Farisi ḇeyakso kuker snonkaku ḇeḇor ansya sikofen faro Yesus: “Guru, wasonek manfamyan besine.”

⁴⁰Yesus kyarem: “Yakofen faro mko: Rofyor sefasis ido, nari karui nane nabras.”

⁴¹Ma fafisu fyanam kwar ma myam mnu ani, kyanesi,

⁴²ḇo doḇo: “Sye iḇye syadi ro ras ine kako wafawi rosai ḇeyun aski faro aw. Ḇape insape roi ḇeḇesya ani iyokef ro mkomkamna.

⁴³Snar rasya ryama ido, nari mbroḇ besi siyar warek aw kuker ayar mamun ma soper aw ma sfasyar aw,

⁴⁴ma nari simkok aw fnoḇek kawasa besi ma arsen bedi karui oso kyon ro karui oso boriḇa, snar wafawiḇa fafisu rosai Allah ryakaki awya.”

⁴⁵Raimnai Yesus syun ḇe Allah Rum ḇyedi, ma iyaw kawasa ḇefarḇaḇyan ro diansya,

⁴⁶ma ikofen farosi: “Sfar kwar ḇo soḇo: Rum ayeja ma rum nadi rirya. Ḇape mkofruri raris narem ḇefasyar monda.”

⁴⁷Ro ras nakam, ḇyuk farkarkor ro rum ariya dori. Inja mananir-mananir Imam ma ḇefawinananem Refo Yahudi ma snonkaku ḇeḇe snonsnon ro er Israelsya sḇesewar fa smuni

⁴⁸ḇape sifawiḇa, nyan rosai ssḇuki myuni, snar kawasasya kam siryaḇi, ma simarisen simnafi.