Read Biak LUKAS 21 Bible Online

LUKAS 21 - Biak bible

LUKAS 21

¹Rofafisu Yesus isya ro Allah Rum ḇyedi myam snonkaku ḇenanasya srir farsarser sena ro burua farsarserya.

²Myam kako bin kabom ḇesaḇarar oso dakrir remis risuru ro burua farsaser ani dori.

³Inja ikofen: “Yakofen faro mko, kaku ḇeri bin ḇesaḇarar ine ḇyuk farsarser sibor syadi ro kawasa ansine kam.

⁴Snar sikam ssḇuk ro farsbawer sena, ḇape kabom ine syaḇarar rariso kako ḇyuk ro nana ḇyena kam, ḇeḇefandun ro kankenem ḇyedi.”

⁵Ro fafisu snonkaku ono sawawos ro roi ḇekur Allah Rum ḇyedi ma smander ḇaḇaus ḇeḇesya ani, ḇyeḇefrur kuker karui ḇepyum ma roi ḇeḇor ssḇuki fyarser faro Allah, inja Yesus ikofen farosi:

⁶“Rosai mkomam ḇesya ro dia — nari rasya isyama, karui oso ipok ḇyarek ro karuiyo boriḇa; nakam nari neḇekakok.”

⁷Ma manfamyan ḇyesi sifuken faroi, ḇo soḇo: “Guru, rofafisu saiso nari roi ḇeḇor nane nesyanya? Ma abyair saiso, ḇefasna rofafisu ndariryana?”

⁸Yesus kyarem: “Mkofasos insa seankar mko awer. Snar snonkaku sibor nari srama sap snonsnon ayedi ma sikofen: Ayai rya, ma fafisuya fyanam kwar. Mkoso awersi.

⁹Ma rofyor mkomnaf roi sawos ro mbroḇ ma mbriwer mko kandor awer. Snar nakam nari ndarirya ḇepon ḇape nfasna ras ḇepupesya nari ryama fasawya isya ḇaim.”

¹⁰Ikofen farosi: “Er oso nari ḇyembroḇ ma isampum er ḇese ma ḇaḇesasoser oso nari ḇyembroḇ ḇaḇesasoser ḇeseya,

¹¹ma rim ḇeba kaku nari myun ma ro moḇ nabor dafduf kapyowi ma basbiser isya, ma nari roi ḇefrur kanandor naisya kako ma aḇyair-aḇyair ḇeyun nyawa nari nfasna ro nanki.

¹²Ḇape roi ḇeḇor nane naisya ḇaim nari sfor mko ma sewayammko; nari skukeḇ mko ro rum nadina ma mkosun ro bui, ma nari sun mkoḇe ḇarpon kankain wairek-wairek ma ḇesma papoik sya snar snonsnon ayedi.

¹³Inja roi nane nefafisu faro mko fa mkoḇuk ḇaryas Ankankinem Ḇeḇye ro Allah.

¹⁴Inja mkoswarepen naḇye ro mkosnemna insa mkokara ḇepon awer sano faro mko.

¹⁵Snar mankundaya nari yaḇuk faro mko fawawi ro wos, isof mbroḇ mkoḇesi sipok sisampum mkoḇa.

¹⁶Ma sinan mkoḇesi, ma naek, kina, ma bati mkoḇesi sḇoḇ mko isof ono rofandu mko nari seḇemun,

¹⁷ma snonkakusya kam sayin mko snar snonsnon ayedi.

¹⁸Ḇape snonburyam osero ro mkoḇrumna ipok nari ryoḇa.

¹⁹Rofyor mkores nako, nari mkosma kankenem mkoḇena.”

²⁰“Rofyor mkomam sordade-sordadesya saiwarek Yerusalem ido, irya mkofawi beri, makakok ḇyedi fyanam kwar.

²¹Rofyor ani snonkaku ro Yudea sifrar sibur be bon, ma snonkaku ro Yerusalemsya kako iḇye sfaryane, ma snonkaku ro mnuya ḇandirisya ssun awer ḇe Yerusalem,

²²snar irya fafisu mamunsuya imnis kwar ro roi ḇeḇor kam sfas kwar ro Refo.

²³Ras ani ifrur kandera fafayaḇa faro bin ḇemoḇesḇa ma ḇesasus sya! Mnu ine nari isma kandera ḇeba kaku ma Manseren nari ḇyuk samamyai faro er ine,

²⁴ma nari seḇemun kuker sumber ma er ansi sunsi ḇe women faro er ḇeḇor kam ma er ḇefawi Allah ḇasya nari saref apepen Yerusalem, isof fafisu er ansi sedi imnis.”

²⁵“Ma nari aḇyair-aḇyair ono naisya ro ori, paiki ma maksya, ma er-er ḇero supswan inesya kam nari simkak ma sikmom rakrok maum ma raryoi ro sorenya.

²⁶Snonkakusya nari skarsosen rawo siḇe simar, snar makakakya ro roi ḇeḇor ḇemun supswan ine, snar samambraḇ ro nanki nari namarmer.

²⁷Rofafisu ani snonkakusya smam Rumkun Snonkakuya nari ryama ro mandep kuker papoik ma payamyum ḇyena.

²⁸Rofyor roi nanekam ndarirya, mkokanaw mkoḇrumna, snar kniko monda mkosma koreri.”

²⁹Raimnai Yesus ikofen sarḇer ine farosi: “Mkomam epen ara knam roḇa ai knam rosairyawer.

³⁰Rofyor mkomam ai knam anna nkakyei kwar, mkofawi ro mankun mko irya wampasi samsamya fyanam kwar.

³¹Rarirya kako, rofyor mkomam roi ḇeḇor anna ndarirya ido, irya mkofawi Allah Ḇaḇesasoser ḇyedi fyanam kwar.

³²Yakofen faro mko: Kaku ḇeri syos ine nari simar kam baim rofyor roi ḇeḇesya nane ndarirya.

³³Nanki ma supswan ine nari napromes, ḇape wos ayena nkain nako isof fyoro-fyoro.”

³⁴“Mkowaren mankun mko, insa mkosnemna nafo awer kuker swaruser munara ma masaser ma fandun-fandun ro kankenem mkoḇena, imbude Manseren ras ḇyedi ifyafer kanandor mko imnis denem oso.

³⁵Snar ras ani imnis denem ḇefor snonkaku ḇekain ro supswan ine.

³⁶Mkowaren ma mkoḇenadi ḇesya kwar, insa mkosma sambraḇ fa mkoḇukfaspar mko ro roi ḇeḇor ḇeḇesya anna, ma mkores nako ro ḇarpon Rumkun Snonkakuya.”

³⁷Ro meser na Yesus ḇyuk farkarkor ro Allah Rum ḇyedi ma ro roḇ na isasyar fa denef ro urek Zaitun.

³⁸Ma arwo na snonkaku ḇeḇor ansya kam sraḇe Allah Rum ḇyedi fa simnaf Yesus farkarkor ḇyena.