Read Biak LUKAS 22 Bible Online

LUKAS 22 - Biak bible

LUKAS 22

¹Ras ḇeba Mamami Ḇepisenḇa, snirḇe Paskah ani fyanam kwar.

²Mananir-mananir imam ma ḇefawinananem Refo Yahudi ssewar nyan rosai sisma fa smun Yesus, snar simkak kawasa ḇeḇor ansi.

³Ḇarpurya Ibirisya syun ro Yudas ḇenir kakoḇe Iskariot, snon oso ro Yesus manfamyan samfur seser risuru ḇyesi.

⁴Raimnai Yudas ryafa isrow mananir-mananir imam ma mananir-mananir ḇewaren Allah Rum ḇyedi fa sna awi, rariso nari ḇyoḇ Yesus farosi.

⁵Simarisen fafayaḇa ma sna sne oser fa ssḇuk pipi faroi.

⁶Yudas imarisen inja syewar fafisu ḇeḇye fa ḇyoḇ Yesus farosi insa kawasa ḇeḇor ansi sifawi awer.

⁷Ma ras ḇeba Mamami Ḇepisenḇa, (mamami ḇefawnai kuker murḇa) isoine ras rosai snonkakusya skaruk domba faro munara Paskahya.

⁸Raimnai Yesus iwan Petrus ma Yohanes, ḇo ikofen: “Mura mufasos nanan Paskah faro ko.”

⁹Sufuken faroi: “Moḇ rosaiso wamarisen nkofasos roya?”

¹⁰Kyarem, doḇo: “Rofyor musun ro mnuya nari musrow snonkaku ḇeyun war ro fyom oso musoi ḇerum syun roya,

¹¹ma mufuken faro ḇena rumya: Guru ifuken aw: sim rosaiso nari yan Paskah kuker manfamyan ayesi roya?

¹²Raimnai snon ani nari fyasnai faro mu sim ḇeba oso ro syos ḇero bo ḇefasos kwar, inja mufasos roi ḇeḇor kam ro dia.”

¹³Inja sura kwar ma susma roi Yesus ikofen faro su anna kam. Raimnai sufasos Paskahya.

¹⁴Fafisuya ryama kwar, ma Yesus danan kuker manwawan ḇyesi.

¹⁵Ikofen farosi: “Yaswar kuf kaku yan Paskah fnoḇek mko, rofyor yasun ḇaim ro ḇaḇewayamya.

¹⁶Snar yakofen faro mko: mko kyare, nari yakani werḇa isof fafisu Allah Ḇaḇesasoser ḇyedi ifyafer.”

¹⁷Ḇarpurya dun sek aninem ma ikofen kasumasa posa, ikofen: “Mkuni ma mkorarwas fandu mko.

¹⁸Snar yakofen faro mko: randak ro knikine, nari yinem anggur werḇa isof Allah Ḇaḇesasoser ḇyedi ifyafer.”

¹⁹Raimnai dun mamami, ma ikofen kasumasa posa pyanasnis na ma ḇyukna farosi, ḇo ikofen: “Inekada kraf ayedi ḇyeḇeḇoḇ kwar faro mko; mkofrur radine fa mkoswarepen aya.”

²⁰Rarirya kako ifrur kuker sek aninem ani rofyor sanan kwar; raimnai ikofen: “Sek aninem inekada asas babo ro rik ayena ḇesbawer kwar snar mko.

²¹Ḇape mkomame, ḇramin ḇeḇoḇ ayanya isya kuker aya ro meja ine.

²²Snar Rumkun Snonkaku nari rya imnis raris asasya moḇ ryaya, mboi kandera ḇeba faro snonkaku ḇeḇoḇ ayanya.”

²³Raimnai sifuken yaesi mansei rofandusi nari ḇefrur rarirya.

²⁴Yesus manfamyan ḇyesi sfamfaḇri, mansei ro si ḇeba syadiya.

²⁵Rarirya Yesus ikofen farosi: “Wairek-wairek ro ersya ssḇuk sasoser faro kawasa sesi ma ḇebarara-ḇebarara sya ssḇuk papoik sena nsoser si sapsi ḇemanfadiren.

²⁶Ḇape mkoma rariryaḇa, mboi ḇeba syadi ro mko ryun mankundi fa ibaḇa syadi ma manfarkinya imnis ḇeyuffarmyan.

²⁷Snar mansei ḇeba syadiya: ḇekain ḇeyananke, roḇaido ḇeyuffarmyanyake? Mboi ḇekain ḇeyananya? Ḇape ayaisya fandu mko imnis ḇeyuffarmyan.

²⁸Mkoiso ḇekain fnoḇek aya ḇesya kwar ro fafrowes ḇeḇor yasma kwar.

²⁹Ma yafasna Papoik Ḇaḇesasoser Allah faro mko, imnis Mami fyasna Papoik ani faro aya,

³⁰mboi nari mkanan ma mkinem ro meja oser kuker aya ro Ḇaḇesasoser ayedi, ma nari mko kain ro karapesa nasan fa mkokara keret samfur seser risuru ro er Israel.

³¹Simon, Simon, mame, Ibirisya imarisen ryas mko imnis fasibu,

³²ḇape yaḇenadi kuker aw kwar, insa kakyar bedi isapi awer. Ma aw, rofyor mambir kwarido, swambraḇser naek besi.”

³³Petrus kyarem: “Manseren, yafasos fa yasun bui ma yamar fnoḇek au!”

³⁴Ḇape Yesus ikofen: “Yakofen faro aw, Petrus, ras ine mankokosya sor ḇaim, famyun ayaḇe kior kwar.”

³⁵Raimnai ikofen farosi: “Fafisu yawan mko ani, mkun mansripḇa, roi ḇeḇaryamḇa ma roiḇesower weminḇa, rofafisu ani mkananjar royoke?”

³⁶Skarem: “Nkananjar royoḇa.” Yesus ikofen farosi: “Ḇape baboine mansei ḇesma mansripo duni, rarirya kako kuker ḇesma roi ḇeḇaryam; ma mansei ḇesma sumberḇa ḇyoḇ syatu ḇyedi fa ḇyuki kyoḇes sumber.

³⁷Snar yakofen faro mko, mboi mnuk ro Refo ine imnis fa kyur aya: Nari ḇyeḇekor fnoḇek snonkaku ḇeḇarḇorsya. Snar rosai ḇefas kwar fa ḇekur aya nabe namnis.”

³⁸Sikofen: “Manseren, sumber risuru suisne.” Kyarem: “Imnis kwar.”

³⁹Raimnai isasyar ro Yerusalem ma ryaḇe urek Zaitun. Manfamyan ḇyesi sisoi kako.

⁴⁰Skora kwar ro moḇ ani ikofen farosi: “Mko ḇenadi insa mkosapi awer ro fafrowes.”

⁴¹Raimnai imbran swaf bursi, posa kyain wepur ma ḇyenadi, doḇo:

⁴²“O Mami, rofyor wamarisen ido, kandera ḇekur aya ine wuni bur aya, ḇape Mami waso marisen ayedi awer, mboi marisen bedi ryarirya mura.”

⁴³Ma malaikat oso ro nanki fyasnai faro Yesus ma ḇyuk samambraḇ faroi.

⁴⁴Imkak mankenem inja ḇyenadi kuker sneri ḇesiper. Sayan ḇyena namnis rik paporem ma nadaf ḇesaprop.

⁴⁵Ḇyenadi posa kwar iyori ma kyaḇer faro manfamyan ḇyesi, ḇape isrow sisya senef snar siswar mankenem Yesus.

⁴⁶Ikofen farosi: “Mkenef snaro? Mkokḇoke ma mkoḇenadi, insa mkosapi awer ro fafrowesya.”

⁴⁷Rofyor Yesus dawawos kaker rak oso ryama, ma manfamyan ḇyesi ḇenir ḇe Yudas, oso rofandu manfamyan samfur seser risuru ḇyansi pyon rak ani. Yudas isnefer Yesus fa isyumi.

⁴⁸Ma Yesus ikofen faroi: “Yudas, boḇ Rumkun Snonkakuya kuker syumke?”

⁴⁹Rofyor ḇeso Yesus insya, smam rosai nari ḇeḇesyanya ma sikofen: “Manseren, iḇye komunsi kuker sumberke?”

⁵⁰Ma oso rosi doper ma pyapekbas Imam Ḇeba manfyan ḇyesi oso knaram ḇar raku kuker sumber.

⁵¹Ḇape Yesus ikofen: “Iḇye kwar mura.” Raimnai duf snon ani knaram ḇyani ma pyom iwer.

⁵²Ma Yesus ikofen faro mananir-mananir imam ma mananir ḇewaren Allah Rum ḇyedi ma ḇebarara-ḇebarara Yahudi ḇerama ḇeforisya, doḇo: “Kakara mkoḇena aya ine yaḇarḇorke, indiriso mkorama kuker sumber ma karbere fa mkofor aya?

⁵³Mboi mkofawi ras-ras nakam ayaisya rofandu mkoḇena ro Allah Rum ḇyedi, mboi mkofor ayaḇa. Ḇape ine fafisu mkoḇeirya, ma ineido papoik ro pampanya.”

⁵⁴Raimnai Yesus ḇyeḇefor ma suni ro moḇ ani ma siyakeri ḇe Imam Ḇebaya rum ḇyedi. Ma Petrus iyomuser ro ḇarpur.

⁵⁵Ro buḇes ro rum ani snonkaku sikaḇen for ma skain yar-yari. Petrus ikako kyain fandusi.

⁵⁶Infyan oso myam Petrus kyain fanam forya; iknoweri raimnai ikofen: “Snon ine kako dakfnoḇeki.”

⁵⁷Ḇape Petrus fyamyun ḇo ikofen: “Roḇa, aya ine yafawi snon ani ḇa!”

⁵⁸Fyoro werḇa snonkaku oso ḇese myami ma ikofen: “Au kako oso rosi!” Ḇape Petrus ikofen: “Roḇa, ayama roḇa!”

⁵⁹Ma indokada oras ḇesiper oser posa, snon oso ḇese ikofenbos faroi: “Kaku ḇeri, snon ine kako dakfnoḇeki, snar ikako snon Galilea.”

⁶⁰Ḇape Petrus ikofen: “Roḇa, aya ine yafawi roi wakofenya ḇa.” Rofafisu ani kako, rofyor isya dawos kaker, mankoko rawersya sore.

⁶¹Raimnai Yesus iknenef ma myam Petrus. Inja Petrus iswarepen snar Manseren ikofen faroi: “Rofyor mankoko rawersya sor ḇaim ro ras ine famyun epen aya ḇekior kwar.”

⁶²Raimnai syaye randi ma kyanes fafayaḇa.

⁶³Ma snonkaku ḇefor Yesus ansi, skoryayei ma sipreri.

⁶⁴Sisisen warek mka ḇyesya ma sifuken: “Indo wakofen mansei ḇeprer awya?”

⁶⁵Ma wos anonef sikofen faroi nabor.

⁶⁶Ma rofyor meser kwar ḇebarara-ḇebarara er Yahudi ma mananir-mananir imamsya ma ḇefawinananem Refo Yahudi skara posa kwar, sun Yesus ḇeḇarpon mankukeḇ Agama sedi,

⁶⁷ma sikofen: “Rofyor aw Wairek, wakofen maro nko.” Yesus kyarem: “Yakofen kako ḇe mko wero, nari mkokyarḇa;

⁶⁸ma rofyor yafuken roi oso faro mko, nari mkopok fa mkokaremi ḇa.

⁶⁹Randak ro knikine Rumkun Snonkaku kyain kwar ro ḇar raku Allah ḇepok syadiya.”

⁷⁰Sikofen kam: “Rarirya ido, awne Rumkun Allahke?” Yesus kyarem: “Iso mankun mkokofenya, mboi aya ine Rumkun Allah.”

⁷¹Raimnai sikofen: “Fainda rosai kosewar ḇaḇesaksi wer? Koine komnaf kwar ro mankundi sḇadon ḇyedi.”