Read Biak LUKAS 24 Bible Online

LUKAS 24 - Biak bible

LUKAS 24

¹ḇape ro ras ari arwo prim kakuya bin ansi sun kefi-kefi sfasos kwar na ḇo sraḇe rus Yesus ḇyani.

²Ma sisma karui ḇesisen rus ani ikris kwar,

³ma ssun kwar ro ureren ani ḇape sisrow Yesus baken ḇyediḇa.

⁴Fafisu sores sikmom snar roi ḇeḇesya ani, kniko beri snon risuru susansun-sansun ḇesnaper ma suyores fandusi.

⁵Simkak kaku ma skankunem, ḇape snonkaku ansuya sukofen farosi, ḇo suyoḇo: “Snaro mkosewar ḇekenemya rofandu ḇemarsya?

⁶Isya ro dineḇa, diḇri kwar. Mkoswarepen rosai ikofen faro mko, rofafisu isya kaker ro Galilea,

⁷isoine Rumkun Snonkakuya nari sḇoḇi faro snonkaku ḇesasar ma spai ro aprop, ḇape nari diḇri ro ras ḇeḇekiorya.”

⁸Inja siswarepen Yesus wos ikofen ani.

⁹Ma skaḇer kwar ro rus, sfar nakam faro manfamyan sanfur seser oser ansi ma faro naek ḇesesya kam.

¹⁰Bin-bin ansi sisosine Maria, ḇerama ro Magdala, ma Yohana, ma Maria Yakobus snari. Ma bin-bin ḇese ono kako ḇeyaksosi, sḇaryas faro manwawan ansi.

¹¹Ḇape faro manwawan ansi soḇo bin ansi seḇindawsi ma sikyar wos senaḇa.

¹²Rarirya inja Petrus iyori ma ifrar fasaw ḇerus ani. Fafisu kyankunem ma ikiki mundum, myam kruḇen ḇepankun monda. Raimnai ibur ma iwasen ro sne ḇyedi rosai ḇeḇesya kwarya.

¹³Ro ras ani kako snon risuru ro Yesus manfamyan ḇyesi suraḇe mnu ḇenirḇe Emaus, swafya indokada mil rifik ro Yerusalem,

¹⁴ma sufarfyar ro roi ḇeḇor ḇeḇesya kwar anna.

¹⁵Fafisu suisya suyawawos ma sufuken yayesu, Yesus mankundi ryama isnefer su, ma imbran fnoḇek su.

¹⁶Ḇape roi oso isya idwarek sumkasna, isof supok sumamḇaḇir iba.

¹⁷Yesus ikofen farosu ḇo doḇo: “Rosai mumbran muyawosya?” Inja sumnai kuker sne ḇefafardun.

¹⁸Oso ro su snonsnon ḇyedi Kleopas, kyarem faroi, doḇo: “Awne werer snonkaku amber ḇeramuma babo ḇe Yerusalemke, indiri wakfawi rosai ḇeḇesya rodia ro ras ḇepupes naneḇa?”

¹⁹Ifuken su ḇo doḇo: “Rosai ḇeḇesyaya?” Sukarem: “Rosai ḇeḇesya kuker Yesus snon Nazaret. Ima nabi rirya, ḇepoik ro fararur ma wos ro Allah ḇarpon ḇyedi ma ro ḇarpon er nkoḇesi kam.

²⁰Ḇape mananir-mananir imam ma manfarkin-manfarkin nkoḇesi sḇoḇi fa smuni, isoine spai kwar ro aprop isof imar.

²¹Mboi ro randakya nkokyar iso nari ḇerama fa ḇefaspar er Israel. Ḇape ras rikior nawas kwar, fafisuya roi ḇeḇesya nane ndarirya.

²²Mboi bin ono rofandu nko sifrur kanandor nko: Isnai karkir sraḇe rus ma sisrow Yesus baken ḇyediḇa.

²³Raimnai skaḇer ma sikofen ḇo soḇo, mboi smam kwar malaikat ono sikofen farosi, mboi ikenem.

²⁴Ma min nkoḇesi ono sra kwar ḇerus ani, ma sisma kaku raris wos binsya sikofen na, ḇape sakmami ḇa.”

²⁵Raimnai Yesus ikofen faro su: “Ne, mko snonkaku ḇefawi royoḇa, rariso mkosnemna npakrek, isof mkokyar ḇaḇeri roi ḇeḇor kam nabisya sikofen kwar na!

²⁶Mboi Wairek nari ḇyekandera nabor resari insape syun ro payamyum ḇyedi?”

²⁷Raimnai ikofen fasna faro su rosai sfas kwar ro Refoya, randak ro syap Moses isof syap nabi-nabi syakam.

²⁸Skofanam mnu skorayoḇ ani ma iḇe imbran pdef mararan ḇyedi.

²⁹Ḇape suyembuki, ḇo suyoḇo: “Kwainus nu, snar mandira kwar ma ori fyanam syun.” Inja kyainus su.

³⁰Rofyor kyain dananus su, dun mamami ma ikofen kasumasa, raimnai pyefi ma ḇyukna faro su.

³¹Rofafisu ani sumkasna nbas ma sumam ḇaḇiri, ḇape ipromes bur su.

³²Sufuken yaye su: “Mboi kusnesna naryaḇ kaku rofafisu iwawos kuker ku ro nyanya faduri ma rofyor ikofen fasna Refoya maro ku?”

³³Inja suyor su ma sukaḇer beri ḇe Yerusalem. Ro diwa susrow manfamyan samfur seser oser ansi. Sisya siryur kam kuker minmin sesi.

³⁴Sikofen: “Kaku ḇeri Manseren diḇri kwar ma fyasna mankundi kwar faro Simon.”

³⁵Raimnai snon ansuya kako suyakfarfyar rosai ḇeḇesya kuker su ro nyanya faduri ma rariso sumam ḇaḇiri rofyor pyef mamamiya.

³⁶Ma rofyor sawawos roi ḇeḇesya ani, knikoḇama Yesus dores rofandu sedi ma ikofen farosi: “Aski faro mko!”

³⁷Sikandor ma simkak snar siwarki, soḇo smam rodur oso.

³⁸Ḇape ikofen farosi: “Snaro mkomkak ma rosai eḇedari mkokormararu ro mkosnemna?

³⁹Mkomam ro ḇramin ayesuine ma wemin ayesuine: Mankundayairi; mkopan ro aya insa mkofawi, imnis mkomam ro aya ine, snar rodurya ḇyekraf ma korḇa.”

⁴⁰Ikofen rarirya, ma fyasna ḇramin ḇyesuya ma wemin ḇyesuya farosi.

⁴¹Ma fafisu sikyar ḇakaker snar raryaḇ ma kanandor sedi, ikofen farosi: “Roḇean ono naisyake?”

⁴²Inja ssḇuk faroi in ḇesorep ker oser.

⁴³Duni ma dani ḇo smam kam.

⁴⁴Ikofen farosi: “Ine wos ayedi, yakofen kwar faro mko rofafisu ayaisya fnoḇek mko, isoine mboi roi ḇekur aya na nari namnis kam raris fasfas syap Moses ma syap nabi-nabi ma syap mazmur.”

⁴⁵Raimnai ḇyas swaruser sena, isof sifawi wos Refoya.

⁴⁶Ikofen farosi: “Fasfas isya radine: Wairek nari ḇyekandera ma nari diḇri fandu ḇemarsya ro ras ḇekiorya.

⁴⁷Ma kuker snonsnon ḇyedi ḇaryas ḇekur marmar ma ḇaḇepayasyos ro sasar nari sḇaryas na faro er-ersya kam, randak ro Yerusalem ine.

⁴⁸Mko ḇeḇesaksi roi ḇeḇor nane kam.

⁴⁹Ma nari yafarem faro mko rosai Mami ḇyeasas kwar faro aya. Ḇape nari mko kain waf ro mnu ine isof mkoḇe ḇefasos kuker papoik ro Allah.”

⁵⁰Raimnai Yesus dunsi ḇe mnuya ḇandiri isof sfanam Betania, rodia ḇyeḇoksi.

⁵¹Ma fafisu ḇyeḇoksi, ḇyeḇekanow ḇe boiyaswa ma ibursi.

⁵²Skankunem ma sḇansuba faroi, raimnai sibur ḇe Yerusalem kuker raryaḇ ḇeba kaku.

⁵³Sisya ḇesya kwar ro Allah Rum ḇyedi ma sisandiki.