Read Biak LUKAS 6 Bible Online

LUKAS 6 - Biak bible

LUKAS 6

¹ Ro ras Mananai Yahudi oso, fafisu Yesus imbran ro yaf fasibu oso, manfamyan ḇyesi sinek fasibu yorem ono siswir diwer si kuker siḇrasna ma san si.

²Ḇape snon Farisi ono sikofen: “Snaro mkofrur roi kopok kofrurḇa ro ras Mananai Yahudi?”

³ Rarirya Yesus kyarem faro si: “Mkowasya ḇake ro rosai Daud ifrur, ro fafisu i ma ḇesoisya sibiser,

⁴ eḇedari syun ro Rum Allah ma dun mamami farsarser, fa dan ma ḇyuk kako faro ḇesoisya, mamami rosai snonkaku ḇese sipok sakanḇa derer monda imam-imamsya?”

⁵Yesus ikofen wer faro si: “Rumkun Snonkaku irya Manseren faro ras Mananai Yahudi.”

⁶Ro ras Mananai Yahudi ḇese wer, Yesus syunḇe Rum nadi, fa ḇyuk farkarkor. Ro dia snon ḇramin ḇar raku ḇemar oso isya.

⁷Ḇefawinananem Refo Yahudi ma snon Farisi sḇair Yesus, fa smampan imbude Yesus ḇyuk pararei faro snon ani ro ras Mananai Yahudi, insa sisma knam fa ssḇuk sasar faroi.

⁸Ḇape ifawi swaruser sena, inja ikofen faro snon ḇramin ḇar ḇemar ani: “Wayor au ma wores ro faduine!” Inja snon ani iyori fa dores.

⁹Raimnai Yesus ikofen faro si: “Yafuken faro mko: Rosaiso sefakofrur ro ras Mananai Yahudi, kofrur roi ḇeḇyeke roḇaido kofrur ḇarḇor, kofnoḇek nyawa snonkaku roḇaido komun si?”

¹⁰Raimnai myam yar-yar sikam, ma ikofen faro snon ḇeduf ani: “Fos ḇramin bedi!” Snon ani ifrur rarirya ma ḇramin ḇyedi iprei beri.

¹¹Inja masasor sena nasber, inja sawos yae faro si, rosaiso nari sifrur faro Yesus.

¹²Ro fafisu ani Yesus ryaḇe urek fa ḇyenadi ma ro roḇ ḇesiper ani ḇyenadi faro Allah.

¹³Fafisu meser kwar, ma dor manfamyan ḇyesi fa srama faroi ma kyinfir ro fandu si snon samfur seser risuru, siso dapḇe manwawan:

¹⁴Snonsnon sena naiso nane, Simon nyiriḇe Petrus, ma Andreas Simon ḇedar ḇyedi, Yakobus ma Yohanes, Filipus ma Bartolomeus,

¹⁵Matius ma Tomas, Yakobus Alfeus mandaḇendi, ma Simon sapḇe snon Zelot,

¹⁶Yudas Yakobus mandaḇendi, ma Yudas Iskariot iso ḇarpurya ḇeḇoḇ Yesus.

¹⁷Raimnai isabu kuker si ma simnai ro moḇ ḇepyom oso: ro dia manfamyan ḇyesi sibor kaku siryur ma snonkaku ḇese kako ḇerama ker Yudea ḇesiper ma ro Yerusalem ma ḇerama ker supya mnuk swanandir Tirus ma Sidon.

¹⁸Srama insa simnaf farkarkor ḇyena ma insa ḇyuk pararei ro dafduf sena; ma kako rur ḇemaḇak siswoḇer sya.

¹⁹Ma kawasa ḇeḇor ansi kam sesewar fa span roi, snar papoik ḇesasyar roi ma kawasa ansi kam ḇyuk pararei faro si.

²⁰Raimnai Yesus myam faro manfamyan ḇyesi ma ikofen: “Askifaro, ne, ḇesaḇararmkoya, snar mkokada nari mko na Ḇaḇesasoser Allah,

²¹Aski faro, ne, knikine ḇeḇisermkoya, snar mkokada nari mkosyopen. Aski faro, ne, ḇekanes mkoya, snar mkokada nari mkombrif.

²² Aski faro, mko rofyor snonkaku sya sayin mko ma simewer mko, skoryae mko ma rofyor spampum snonsnon mkoḇena imnis roi ḇeḇarḇor oso, snar Rumkun Snonkaku.

²³ Mkoryaḇ ma mko marisen ro fafisu ani, snar kaku ḇeri, ḇaḇyak mkoḇedi iba ro boiyas; snar kpu sesi sifrur rarirya kako faro nabi sya.

²⁴Ḇape nari mkoroë, ne, ḇenana mkoya, snar ro nana mkoḇena mkosma kwar sneprei mkoḇena.

²⁵Nari mkoroë, snonkaku ḇeyarbor ro knikine mkoya, snar nari mkobiser. Nari mkoroë, snonkaku knike ḇembrif mkoya, snar nari mkoḇe kandera ma mko kanes.

²⁶Nari mkoroë, rofyor snonkaku sya sisandik mko; snar kpu mkoḇesi sifrur rarirya kako kwar faro nabi sararer sya.”

²⁷“Ḇape faro mko, ḇemnaf aya, Yakofen: Mkoswar mbroḇ mkoḇesi, mkofrur pyum faro snonkaku ḇeyain mko sya;

²⁸mkor ḇok faro snonkaku befras mko; mkonadi warek snonkaku ḇeyonef mko.

²⁹Mansei ḇeḇaser fofer besya oso, buk fofer besi ḇarya wer, ma mansei ḇeyun syatu bedi, buk sansun baken bedi fa dun iwer kako.

³⁰Buk faro snonkaku mansei ḇeor faro au; ma wor siḇer awer faro snonkaku ḇeyun roi nwana.

³¹ Ma raris wamarisen insa snonkaku sifrur faro au, wakfrur rarirya kako faro si.

³²Ma rofyor mkoswar snonkaku ḇeswar mko, rosai fainda faro au? Snar snonkaku ḇesasar sya kako sakswar faro snonkaku ḇeswar si sya.

³³Snar rofyor mkofrur pyum faro snonkaku ḇefrur pyum faro mko sya, rosai fainda faro mko? Snonkaku ḇesasar sya kako sakfrur rarirya.

³⁴Ma rofyor mkor resari roi oso faro snonkaku oso, snar mkokyar nari mkosma kaḇer roi oso roi, fainda rosai faro au? Snonkaku ḇesasar sya kako sakḇuk resari faro snonkaku ḇesasar sya, insa sisma munsu nabor namnis.

³⁵Ḇape mko kada, mkoswar mbroḇ mkoḇesi ma mkofrur pyum faro si ma mkoḇuk resari ma mkokyar awer nari mkosma munsu, rarirya ḇaḇyak mkoḇedi nari iba ma nari mkoḇeromawa Allah Ḇekaki Syadi, snar ikada ipyum faro snonkaku ḇekofen kasumasa ḇa ma snonkaku ḇeḇarḇor sya.

³⁶Iḇyekada mkoḇesnemura, imnis raris Kma mkoḇedi kako ḇyesnemura.”

³⁷“Mkoḇe mankara awer, rarirya mko kako nari sakḇemankara mkoḇa. Ma mkoḇuk samamyai awer, rarirya mko kako nari sakḇuk samamyai faro mkoḇa; mkoḇuk ampun rarirya mko kako nari sḇeampun mko.

³⁸Mkoḇuk kada nari smunsu faro mko: warnkyara ḇeḇye oso, skukira ifyos, ma sisas i isof isbawer ma ḇesbawer anna nari sisbawer na ro farandan bedi. Snar warnkyara mkoḇuki kyaraya, nari ssḇuki kyara mko kako.”

³⁹ Yesus ikofen wos peper oso wer faro si: “Rariso snon ḇepraf oso ikfin snon ḇepraf ḇeseya? Mkofawiḇake nari sukam susapi ro der?

⁴⁰ Romawa farkor oso nari isyadi ro guru ḇyediḇa, ḇape rofyor fyarkor posa kwar ro farkarkor ḇyena nari imnis guru ḇyedi.

⁴¹Snaro mam faro papoi ḇero naek bedi mkamor ḇyesuya, ḇoi ai fyor ḇeba ḇeḇeayuḇ ro mkamor besuya wafawiḇake?

⁴²Rariso nari wakofen faro naek bedi: Naeko iḇye yapyos papoi ḇero mkamor besuya, mboi ai baken ḇeba ḇeḇeayuḇ ro mkamor besuya kada mam i ḇake? Ne, snonkaku ḇeankarkar, wasasyar ḇepon ai baken ḇeba ḇeḇeayuḇ ro mkamor besuya resari insape mam pyum fa wapyos papoi-papoi anna ro naek bedi mkamor ḇyesu ya.”

⁴³“Snar ai knam ḇeḇye oso nari imarem bon ḇeḇyeḇayo ḇa, ma rarirya kako ai knam ḇeḇyeḇa oso nari imarem bon ḇepyumo ḇa.

⁴⁴ Snar ai knam oser-oser ḇyeḇemambir ro bon ḇyena. Snar korokem ara bonḇa ro aikus borek ma anggur bon ro kaḇrai borekḇa.

⁴⁵Snonkaku ḇeḇye ifrur roi ḇeḇye ro sne karambram ḇeḇye ḇyedi ma snonkaku ḇeḇarḇor ifrur roi ḇeḇarḇor ro sne karamḇram ḇeḇarḇor ḇyedi. Snar roi ikofen na nakḇairo sne ḇyedi.”

⁴⁶“Snaro mkor aya: Manseren, Manseren, mboi mkofrur roi yakofen naḇa?

⁴⁷Mansesi ḇerama faro aya ma ḇemnaf wos ayena ḇo ḇefruruser na — nari yafasnai faro i kuker mansei yaḇuki imnisya, —

⁴⁸imnis raris snon oso ḇeḇawes rum: Snon ani ḇyai woni ḇekaki ma ryir araref ḇyedi ro karuna bo. Ro fafisu faḇruḇ ma dafya myun rum ani, rum ani imararerḇa, snar rum ani sifrur i fa idworen.

⁴⁹Ḇape mansei ḇemnaf wos ayena, mboi ḇefrur userna ḇa, imnis raris snon oso ḇefrur rumro saprop ḇeḇeararef ḇa. Rofyor dafya myun i, rum ani fasaw kaku kyarḇaken ma imkokbos beri.”