Read Biak LUKAS 8 Bible Online

LUKAS 8 - Biak bible

LUKAS 8

¹Posa kwar fyoroba Yesus imbran yar ro mnu ḇe mnu ma ḇyaryas Ankankinem Ḇeḇya ro Ḇaḇesasoser Allah. Ma manfamyan samfur seser risuru sifnoḇek i,

² ma bin ono kako ḇyuk pararei ro rur ḇeḇarḇor ma dafduf ḇeḇor, isoine Maria sap ḇe Magdalena, ḇesma ḇaḇemkei kwar ro rur ḇeḇarḇor rifik,

³Yohana Khuza swari ḇefararur ro rum Herodes, Susana ma bin ḇeḇor ḇese. Bin-bin sine suf farmyan maran ani kuker nana sena.

⁴Fafisu kawasa ḇeḇor semarani ḇo srama, isoine kawasa ro mnu ḇe mnu ḇerama ḇeḇeoser kuker Yesus, ikofen sarḇer oso:

⁵“Snon ḇekekef mor oso isasyar fa kyekef rokaker ḇyena. Rofyor kyekef, rokaker anna ono nasapi ro nyan andir, inja snonkaku saref apepen na mansya ro farsyos san na rao isof naḇro.

⁶Ono nasapi ro saprop ḇeḇe karui, nasur kwar ḇape nmas snar nasma warḇa.

⁷Ono wer nasapi ro manuk borek, ma manuk borek anna nasur fnoḇek nparek na isof nmas.

⁸Ma ono nasapi ro saprop ḇeḇye, ma nasur kwar namarem ḇe rarwan utin oser.” Iwawos rarirya kwar Yesus ikofen: “Mansei ḇena knaram fa ḇerower, iḇye kada ryower!”

⁹Manfamyan ḇyesi sifuken faroi, sarḇer ani ikofen rosai.

¹⁰ Inja kyarem: “Faro mko kada mkosma fakamaman fa mkofawi kankunes ro Ḇaḇesasoser Allah, ḇape faro snonkaku ḇese roi ḇeḇesya ani ḇyeḇeḇuk kuker sarḇer, insa smam ḇoi seknaḇa ma srower ḇoi sifawi naḇa.

¹¹Kankunes sarḇer ani isoine: Rokaker anna irya Allah wos ḇyena.

¹²Ḇesapi ro nyan andir anna isoine snonkaku ḇemnaf wos anna kwar; ḇarpurya Ibirisya ryama ma dun wos anna bur sisnesna, insa sikyar awer ma sisma koreriḇa.

¹³Ḇesapi ro saprop ḇeḇe karui isoine snonkaku, ḇemnaf wos anna, sisma na kuker raryaḇ, ḇape wos anna nerares ḇa, sikyar knik monda ma rofafisu faraurowes sisusubur kakyar sena.

¹⁴Ḇesapi ro manuk borek isoine snonkaku ḇemnaf wos anna, ma nasur pdef ḇape ḇaḇeḇirḇar ma ḇaḇekayan ma kankenem ḇaḇe marares, nepen na isof nbuk bon ḇembrai ḇa.

¹⁵Ḇesapi ro saprop ḇeḇye isoine snonkaku, ḇemnaf wos anna kwar, ḇekram na ro sne kuker ḇaḇye ma nasasyar bon ro ḇaḇefarmkuya.”

¹⁶ “Snonkakuyo pyam padamara posa ikawefi kuker fyomba roḇa ryiri ro kamboyo baḇdi, imboi ryiri ro adadu, insa snonkaku kam ḇesun ro rumya smam sanana ḇyedi.

¹⁷ Snar roi oso nari iyokef ḇa nari sfasna na, ma sḇekankunes roi osoḇa nari sifawina ma sfababa na.

¹⁸ Inja, mkokara nyan manafnaf mkoḇena. Snar mansei ḇesma, faroi nari ssḇuk, ḇape mansei ḇesmaḇa, nari sunburi rosai kyara nasya faroi.”

¹⁹Yesus snari ma naek ḇyesi srama faroi, ḇape sisrowi ḇa snar kawasasya sibor.

²⁰Snonkaku sikofen ḇadir faroi: “Snami ma naek bansi sisya ro ḇandi ma simarisen sisrow au.”

²¹Ḇape kyarem faro si: “Awini ma naek ayesya siso, ḇemnaf Allah wos ḇyena ma ḇefrur na.”

²²Ro ras oso Yesus dek ro wai fnoḇek manfamyan ḇyesi, ma ikofen farosi: “Mkorama kokaḇorḇe danosenya ḇariwara.” Rarirya skokaḇor.

²³Ma rofyor skayun kaker, Yesus ḇyarek ma denef. Kniko ḇama wamdoḇer iso ro danosen ani, isof ḇakna nekro wai ma fyanam imsar.

²⁴Inja manfamyan ḇyesi srama sḇani ma sikofen ḇo soḇo: “Guru, Guru, koroë!” Inja ikḇok, raimnai ifyow wam ma ḇak anna. Rofyor aniḇeri wam ma ḇak namnai ma danosen ani iḇrin.

²⁵Raimnai ikofen farosi: “Kakyar mkoḇena naisya ro?” Rarirya simkak ma sikandor, ma sikofen yae farosi: “Manseso snonkaku ine, isof ḇyuk sasoser faro wam ma sorenya ma nasouseri?”

²⁶Raimnai Yesus ma manfamyan ḇyesi sko fyafer ro sup kawasa Gerasa ḇekar ḇe sup Galilea ḇariwara.

²⁷Rofyor Yesus dado rande kwar, snon oso ro mnu ani ryama isrow Yesus; snon ani rur ḇemaḇaksya sisawoḇi ma fyoro kwar syansuni ḇa ma ikenem ro rum ba, mboi ikenem ro rusna monda.

²⁸Rofyor myam Yesus, fyararar ma kyain wepur ḇyansuba ro ḇarpon ḇyedi ma ikofen kuker mkaren ḇeba: “Rosai wafrur kuker aya, ne, Yesus Rumkun Allah Ḇekaki Syadi? Yor ro au, insa wafrur kandera awer aya.”

²⁹Ikofen rarirya snar Yesus ḇyuk sasoser fa rur ḇemaḇak ansi sisasyar bur snon ani. Snar fyor ono ido rur ḇemaḇak ansi sisasmeri, isof sewanka i ma seapyaur i, ḇape imerakuk roi ḇeḇor sikfesi na rur ansi suni ḇe moḇ-moḇ ḇeḇeusḇa.

³⁰Ma Yesus ikofen faroi: “Snonsnon beja iso?” Kyarem ḇo doḇo: “Legion,” (snonkaku syaran) snar rur ḇemaḇak sya sibor sisawoḇi.

³¹Raimnai rur ḇemaḇak ansi sor faro Yesus, insa ḇyuk sasoser awer fa ssun ro der marmari.

³²Ro dia randip nai ḇeḇor ono ssewar sanan ro urek bam, ma rur ḇemaḇak ansi sor faro Yesus, insa imarisen fa ssun ro randip ansi. Inja Yesus ḇyuk raris fararyor sedi.

³³Rarirya rur ḇemaḇak ansi sisasyar bur snon ani ma ssun ro randip ansi. Randip nai ansi soper ro fofen andirya ma ssun ro danosen ma simar kam.

³⁴Ḇewaren randip ansi smam roi ḇeḇesya anna kwar, sifrar ḇe mnuya ma sfar faro mnu-mnu nakam roi ḇeḇesya ani ro dia.

³⁵Ma kawasa-kawasa sya sisasyar fa smam rosai ḇeḇesya ani. Rofyor srama faro Yesus ma sisrow snon rur ḇemaḇak sya sibur ani kyain fanam Yesus wemin ḇyesuya; ma syansuni kwar ma iknon dam. Ma kawasa ansi simkak.

³⁶Snonkaku ḇemam kwar roi ḇeḇesya ani mankunsi sikofen ḇadir farosi, rariso snonkaku rur ḇemaḇaksya sisawoḇ ani isma faspar kwar.

³⁷Raimnai kawasa ḇekain ro sup Gerasa sor faro Yesus, insa ibursi, snar simkak mankenem. Inja Yesus dek ro waiya, ma skayun kaḇer.

³⁸Ma snon rur ḇemaḇaksya sibur ani dor faro Yesus insa imarisen ido isoi. Ḇape Yesus iwani fa rya, doḇo:

³⁹“Wabur ḇe rum bedi ma farfyar roi ḇeḇor kam Allah ifrur faro au kwar.” Snon ani rya iyar mnu ani ḇesiper ma ikofen ḇadir roi ḇeborkam Yesus ifrur faro mankundi na.

⁴⁰Rofyor Yesus kyaḇer, kawasa sibor srafa sisrowi snar sikam siwafi.

⁴¹Inja snon oso snonsnon ḇyedi Yairus ryama. Ikada mananir ro rum-ari. Kyain wepur ma ḇyansuba ro ḇarpon Yesus wemin ḇyesuya ma dor faroi, insa Yesus ryaḇe rum ḇyedi,

⁴²snar inai binjos ḇyedi ḇeḇe wampasi wambarek samfur seser risuruya, fyanam imar. Ro marandan ḇe Yairus rum ḇyedi kawasa sibor sifyosepen Yesus.

⁴³Bin oso iduf dafduf rik ḇe wampasi wambarek samfur seser risuru kwar ma mansei ryawer kako ḇyuk pararei faroiḇa.

⁴⁴Imbran fa fyanam Yesus ro dokor ḇyedi ma duf Yesus syatu ḇyedi pusyom na, ma rofyor ani kako dafduf rik ani imnai beri.

⁴⁵Raimnai Yesus ikofen: “Mansei ḇepan ro aya?” Ma snar oso kyaremba, Petrus ikofen ḇo doḇo: “Guru, kawasa ḇeḇor spanjuḇer ma sifyos apepen au.”

⁴⁶Ḇape Yesus ikofen: “Snon oso isya pyan ro aya, snar yaḇaḇir papoik isya isasyar ro baken yedi.”

⁴⁷Rofyor bin ani myam, mboi fararur ḇyedi ḇyeḇefawi, inja ryadai ḇo ryama, kyain wepur ḇo ḇyansuba ro Yesus ḇarpon ḇyedi ma fyarfyar faro kawasa ḇeḇor rosai ḇefnai fa pyan ro Yesus ma rofafisu ani iprei beri.

⁴⁸Inja Yesus ikofen faro bin ani: “Ne, inai yedi, kakyar bedi ḇyuk aski faro aw kwar, wabur kuker aski!”

⁴⁹Rofyor Yesus iwawos kaker, snon oso ro kina mananir rum ari ani ryama ikofen ḇo doḇo: “Romawa bani imar kwar, inja wafrur kandera awer Gurui.”

⁵⁰Ḇape Yesus imnaf rarirya ikofen faro Yairus: “Wamkak awer, wakyar monda, snar romawa ḇani nari ikenem.”

⁵¹Rofyor sra ro Yairus rum ḇyedi, Yesus ḇyuk fa Petrus, Yohanes ma Yakobus ma inai ani snari fnoḇek kmari skosun skoso Yesus ma snon oso ḇaḇeri dakso.

⁵²Snonkaku ḇeḇor ansi skanes inai ani. Ḇape Yesus ikofen: “Mkokanes awer; imarḇa, ḇape denef.”

⁵³Simbrif Yesus, snar sifawi romawa ani imar kwar.

⁵⁴Raimnai Yesus duf romawa ani ḇramin ḇyedi ma dorḇo ikofen: “Ne, romawa wakḇok.”

⁵⁵Ma romawa ani rur ḇyedi kyaḇer ma rofafisu ani kako ikḇok ma dores. Raimnai Yesus iwan fa sfan romawa ani.

⁵⁶Ma romawa ani sinan ḇyansu sukandor, ḇape Yesus myunwareksi insa sikofen ḇadir awer faro manseryawer kako rosai ḇerarirya ani.