Read Biak YOHANES 10 Bible Online

YOHANES 10 - Biak bible

YOHANES 10

¹“Yakofen faro mko: Kaku ḇeri mansei ḇesun ro kedwai padwar dombayaḇa, ma dek ro ayaryaido, ḇekaraw ma ḇefasyar rirya;

²ḇape mansei ḇesun ro kedwaiya, ikada manfarandows domba rirya.

³Faroi ḇewarenya ḇyas kedwai padwarya ma dombasya simnaf mkaren ḇyedi ma dor domba ḇyesi oser-oser kuker snonsnon sena ma fyarkin sifa sisasyar.

⁴Rofyor domba ḇyesi kam dunsi ḇe ḇondi kwar, pyonsi ma domba-domba ansi sisoi, snar simnaf ḇaḇir mkaren ḇyedi.

⁵Simewer siso snonkaku ḇesesyandi, ḇape sifrar sibursi, snar simnaf ḇaḇir mkaren ḇyediḇa.”

⁶Yesus ikofen sarḇer ani farosi, ḇape sifawi rosai ikofen ḇesyanya ḇa.

⁷Ma Yesus ikofen wer: “Kaku ḇeri yakofen faro mko, aya ine kedwai ḇe domba-dombasya.

⁸Snonkaku ḇerama ḇepon ro aya, sikada mankaraw ma manfasyar, ma domba-domba ansi simnaf siḇa.

⁹Aya ine kedwai; mansei ḇesun ḇeyunuk ro aya, nari isma aski ma ikada nari syun syae ma isma maper aḇris.

¹⁰Mankarawya ryama fa kyaraw ma myamun ma kyakok monda; ḇape yarama insa snonkakusya sisma kankenem fyoroya.

¹¹Aya ine manfarandows ḇeḇye. Manfarandows ḇeḇye ḇyuk kankenem ḇyedi faro domba-domba ḇyesi;

¹²mboi snonkaku besma sasuref manfarandows risyaḇa, ma snar domba-domba ḇyesisya ḇa, rofyor myam naf supya ryama, ifrar ibur domba-domba ansi, isof naf sup ani doper ma fyasasye domba-domba ansi.

¹³Ibur snar snon ḇesma sasuref rirya ma fyandun domba-domba ansiḇa.

¹⁴Aya ine manfarandows ḇeḇye ma yamamḇaḇir domba-domba ayesi ma domba-domba ayesi simnaf ḇaḇir aya

¹⁵imnis raris Mami ifawi aya ma ayano yafawi Mami, ma yaḇuk kankenem ayedi faro domba-domba ayesi.

¹⁶Yasma domba-domba ono ḇese kako fa sisya, ḇeyaksun ro padwar ine ḇa; domba ansi nari yunsi kako ma nari simnaf mkaren ayedi ma sikam senai oser kuker manfarandows oser.

¹⁷Mami iswar aya, snar yaḇuk kwar kankenem ayedi faro yasma kaḇeri wer.

¹⁸Snonkaku oso ḇaḇeri duni bur ayaḇa, mboi yaḇuki raris mankundaya marisen ayedi. Yasma papoik fa yaḇuki ma papoik fa yun kaberi kako. Inekada fararur yasma ro Kma yedi.”

¹⁹Rarirya kawasa Yahudi ansi sfamfaḇri ro mankunsi snar wos anna. Sibor rofandusi soḇo:

²⁰“Rur ḇemaḇakya iswoḇeri ma syawo; snaro mkoroweri?”

²¹Ḇesesya soḇo: “Snonkaku rur ḇemaḇakya iswoḇersya sawos rariryaḇa; rur ḇemaḇaksya nari sifrur fa ḇeprafsya smame?”

²²Fyoroḇa Ras Saḇseḇen Allah Rum byedi ro Yerusalem; fafisu ani supya ipnunek.

²³Ma Yesus imbran ro Allah Rum byedi ro sim Salomo.

²⁴Inja kawasa Yahudi sores yari ma sikofen ḇo soḇo: “Fyor rosai ryakaker wafrur fa nkokenem kuker ḇirḇar? Rofyor Wairek isawido, wakofen maḇe inko.”

²⁵Yesus kyarem farosi: “Yakofen faro mko kwar, ḇape mko kyarḇa; fararur-fararur yafrur kuker Mami snonsnon ḇyedi, naiso ḇefasna ḇadir ro aya,

²⁶ḇape mko kyarḇa, snar mkaksun ro domba-domba ayesi ḇa.

²⁷Domba-domba ayesi simnaf mkaren ayedi ma ayano yafawisi ma siso aya,

²⁸ma yaḇuk kankenem ḇekain fyoro farosi ma sikada nari sroḇa fyoro-fyoro ma snonkaku osoḇaḇeri nari pyosersi ro ḇramin ayedi.

²⁹Mami, ḇeḇuksi maro aya, iba syadi ro mansei ryawer, ma snonkaku oso ḇaḇeri pyosersi ro Mami ḇramin ḇyesuya.

³⁰Aya ma Mami nuḇe oser.”

³¹Kawasa Yahudi ssun karui fa siḇe sḇukso Yesus wer.

³²Yesus ikofen farosi: “Mkomam yafrur fararur ḇeḇye nabor kwar, Mami ḇyuk maro aya; ro fararur ḇeḇor anna, fararur rosai ḇefnai fa mkoḇe mkoso aya kuker karui?”

³³ Yahudi ansi skarem faroi, ḇo soḇo: “Snar fararur ḇeḇye oso eḇedari nkoḇe nkoso aw kuker karuiyaḇa, mboi snar wonef Allah, ma snar aw snonkaku monda, ḇesyaḇo woḇo wamnis kuker Allah.”

³⁴Yesus ikofen farosi: “Ro Refo Yahudi mkoḇedi fasfas oso isyaḇake doḇo: Yakofen kwar: Mkoine Allahke?

³⁵Kofawi mboi rosai ḇefas ro Refo, isya rofyoro. Rofyor Allah ḇyuk aror “Allah” faro snonkaku ḇena wos ḇyedisya,

³⁶snaro mko kofen yonef Allah, snar yakofen aya ine Allah Rumkun ḇyedi? Mboi Mami kyinfir aya ma iwan ayaḇe supswan ine.

³⁷Rofyor yafrur fararur-fararur Mami ḇyenaḇa, mkokyar awer aya,

³⁸ḇape rofyor yafrur na ma mkomewer mkokyar aya, mkokyar fararur-fararur anna, insa mkofawi mkomambir ma mkofawi mboi Mami ḇye oser kuker aya ma ayano yeḇe oser kuker Mami.”

³⁹Ḇerarwan oser wer ssewar fa sfori, ḇape ikfis ro siḇrasna.

⁴⁰Ḇarpurya Yesus ryaḇe war Yordan ḇariwara, ḇemoḇ ḇepon Yohanes ḇyuk masasi ro ani, ma kyain ro dia.

⁴¹Ma kawasa sibor srama faroi ma sikofen, ḇo soḇo: “Yohanes kada dakfrur aḇyair kanandor osoḇa, ḇape wos ḇeḇor ikofen nakam ḇekur snon ine nkaku kam.”

⁴²Ma kawasa ḇeḇor ro dia sikyar faro Yesus.