Read Biak YOHANES 11 Bible Online

YOHANES 11 - Biak bible

YOHANES 11

¹ Snon oso snonsnon ḇyedi Lazarus isya ro dafduf. Kyain ro Betania fnoḇek srar ḇyesuya Maria ma ḇedar ḇyedi Marta.

²Maria ine bin ḇerem Manseren wemin ḇyesuya kwar kuker mani ḇespum ma ḇepyos wemin ansu kuker snonḇuryam ḇyena.

³Ma Lazarus ḇeduf ani Maria srar ḇyedirya. Bin ansuya suyankinem faro Yesus, ḇo suyoḇo: “Manseren, snonkaku waswar ani iduf.”

⁴Fafisu Yesus imnaf ankinem anna, ikofen: “Dafduf ani nari dunḇe marmarḇa, ḇape nari fyasna Allah baba ḇyena, snar kuker dafduf ani Allah Rumkun ḇyedi nari isma baba kako.”

⁵Mboi Yesus iswar kaku Marta, Maria ma Lazarus.

⁶Yesus imnaf kwar Lazarus iduf, ḇesyaḇo kyain ras risuru wer ro moḇsai isya roya;

⁷ḇape ḇarpurya ikofen faro manfamyan ḇyesi: “Mko rama kokaḇer wer ḇe Yudea.”

⁸Manfamyan ḇyesi sikofen faroi, ḇo soḇo: “Rabi, babo ine kawasa Yahudi sesewar fa sso aw, ḇesyaḇo wamarisen kaker fa kwaḇer ḇe diwara?”

⁹Yesus kyarem farosi: “Mkofawi ḇake oras samfur seser risuru ro ras oser? Mansei ḇembran ro meserya wemin ḇyesu sukarkarḇa, snar myam isna supswan ine.

¹⁰Ḇape rofyor snon oso imbran ro roḇ, wemin ḇyesu sukarkar, snar isnaya isya roiḇa.”

¹¹Raimnai Yesus ikofen wer farosi: “Lazarus, naek koḇani denef kwar, ḇape yara fa yaḇani ro anenef ḇyedi.”

¹²Irya manfamyan ḇyesi sikofen faroi, ḇo soḇo: “Manseren, rofyor denef, nari ikḇok ro mankundi.”

¹³Yesus dawos ro Lazarus marmar ḇyedi, ḇape skara ḇo soḇo: Yesus ikofen ro anenef monda.

¹⁴Eḇedari Yesus ikofenbos farosi: “Lazarus imar kwar;

¹⁵ḇape kasumasa snar aya isya rofafisu aniḇa, rarirya iḇye syadi faro mko, insa mkosma farkarkor kakyar. Knikine mkorama koramura faroi.”

¹⁶Inja Tomas sapḇe Didimus, ikofen faro min ḇyesi, isoine manfamyan ḇesesya, ḇo doḇo: “Mkorama kosoi, insa kakmar fnoḇeki.”

¹⁷Ma rofyor Yesus rya kwar ro Betania, isma Lazarus sikriri ras rifiak kwar.

¹⁸Betania kyain fanam Yerusalem, indokada swafya mil risuru.

¹⁹Rodia kawasa Yahudi sibor srama kwar faro Marta ma Maria fa ssḇuk sneprei faro su snar srar suḇedi marmar ḇyedi.

²⁰Ma fafisu Marta imnaf mboi Yesus ryama, inja rya fa isrowi. Ḇape Maria kyain ro rum.

²¹Mboi Marta ikofen faro Yesus, ḇo doḇo: “Manseren rofyor awsya ro dinekada, srar ayedi nari imar ḇa.

²²Ḇape knikine kako yafawi mboi Allah nari ḇyuk faro aw roi ḇeḇor wor faroi na.”

²³Yesus ikofen faro Marta: “Srar bani nari diḇeri.”

²⁴Marta ikofen faro Yesus, ḇo doḇo: “Yafawi mboi nari diḇri rofyor ḇemarsya siḇersi ro ras fawarya.”

²⁵Yesus kyarem faroi: “Aya ine aḇiḇer ma kankenem; mansei ḇekyar faro aya, imar kwaro nari ikenem wer,

²⁶ma snonkaku ḇemar ma ḇekyar faro aya nari simar ḇa isof fyoro-fyoro. Wakyar roi ḇeḇesne ani?”

²⁷Marta kyarem, ḇo doḇo: “O Manseren, yakyar mboi aw Wairek Allah Rumkun ḇyedi, awso nari ḇerama ḇe supswan ine.”

²⁸Ma ikofen rarirya kwar raposa, rya dor ḇeba ḇyedi Maria ma fyararum faroi, ḇo doḇo: “Guru isya rodiwa ma dor aw.”

²⁹Maria imnaf rarirya iyori fasau fa isrow Yesus.

³⁰Ḇape rofyor ani Yesus syun ro mnu ani ḇaim. Isya kaker ro moḇ Marta isrowi ro ani.

³¹Fafisu kawasa Yahudi ḇefnoḇek Maria ro rumsya fa ḇeḇuk sneprei faroi, smam mboi Maria iyori fasau ma ryaḇe ḇondi, inja sisoi, snar skara soḇo mboi ryaḇe rus fa kyanes ro diwa.

³²Maria rya kwar ro moḇ Yesus isya ro ani ma isrow Yesus, ma kyain wepur ro ḇarpon ḇyedi ma ikofen faroi, ḇo doḇo: “Manseren, rofyor awsya ro dinekada, srar ayedi nari imarḇa.”

³³Fafisu Yesus myam Maria kyanes ma kawasa Yahudi ḇerama ḇefnoḇekisya kako sakkanes, inja Yesus sneri isosi ma ikofen:

³⁴“Moḇ saiso mko kriri roya?” Skarem, ḇo soḇo: “Manseren, rwamura fa wakmam!”

³⁵Fyor ani Yesus kyanes.

³⁶Kawasa Yahudisya sikofen, ḇo soḇo: “Mkomam kada, iswarbos faroi!”

³⁷Ḇape snonkaku ono fandusi, soḇo: “I ḇeḇuk mamam faro ḇeprafsi, ipok ḇake fa ifrur isof snon ine imarḇa?”

³⁸Yesus iswarsi wer, inja ryaḇe rus ani. Rus ani aḇyaḇ rirya, ma sisiseni kuker karui.

³⁹Yesus ikofen farosi: “Mkokris karui ine!” Lazarus ḇemar ani srar ḇyedi Marta ikofen faro Yesus, ḇo doḇo: “Manseren, ras rifiak kwar ro rusya, inja nari isnarem.”

⁴⁰Yesus kyarem: “Yakofen ḇeaw; rofyor wakyar nari wakmam Allah papoik ḇyena!”

⁴¹Inja sikris karui ani raimnai Yesus myam ḇebo ma ikofen: “Mami, yakofen kasumasa faro aw, snar wamnaf aya kwar.

⁴²Yafawi wamnaf aya ḇesya kwar, ḇape snar snonkaku ḇeyores yar aya rodine, yakofen na insa sikyar, mboi Mami ḇewan aya kwarya.”

⁴³Ma ikofen rarirya kwar, ma dor naba: “Lazarus, wasasyar!”

⁴⁴Snonkaku ḇemar ani isasyar ro rus ani, wemin ma ḇramin ḇyesuya neḇeparek kuker kruḇen ḇeruren ma mkamor ḇyesuya suḇe ḇekawef kuker marḇun. Yesus ikofen farosi: “Mkoper kruḇen anna insa imbran ḇe mkei.”

⁴⁵Kawasa ḇeḇor ḇerama ḇeḇuk sneprei faro Maria ansi smam rosai Yesus ifrur na inja sikam sikyar Yesus.

⁴⁶Ḇape onokada sra faro snon Farisisya ma sfarfyar farosi ro rosai Yesus ifrur kwar na.

⁴⁷Inja mananir imam-imam ma snon Farisi sor Kankain Karkara Agama fa siryur ma sikofen, ḇo soḇo: “Rosai nari kofrurya? Snar snon ani ifrur aḇyair kanandor nabor.

⁴⁸Rofyor komam mondai, nari kawasa kam sikyar faroi, ma kawasa Roma nari srama ma skakok Allah Rum ḇyedi ma er koḇansine ḇesiper.”

⁴⁹Ḇape oso rofandusi isoine Kayafas, imam ḇeba ro wampasi wambarek ani, ikofen farosi, ḇo doḇo: “Mkofawi royoḇa,

⁵⁰ma mkokara ḇake, mboi iḇye syadi faro mko, rofyor snonkaku oser imar fadwer er ḇesiper koḇedi, ro er ḇesiper koḇedi ryoe.”

⁵¹Kayafas ikofen rarirya ro mankundi ḇa, ḇape snar ḇye imam ro wampasi wambarek ani, inja ḇyardi mboi Yesus nari imar sadwer er ansi,

⁵²ma faro er Yahudi sererḇa, ḇape insa fyanjur Allah romawa ḇyesi ḇekakek sya fa seoser kako.

⁵³Randak ro ras ani sḇesneoser fa smun Yesus.

⁵⁴Snar rarirya Yesus imbran fababa wer ḇa ro ḇarpon kawasa Yahudi imbran rodia ḇe sup mnuk ḇefanam sup ḇeḇeursḇa, ḇe mnu oso snonsnon ḇyedi Efraim, ma kyain fnoḇek manfamyan ḇyesi rodia.

⁵⁵Rofafisu ani ras ḇeba munara Paskah Yahudi sedi fyanam kwar ma kawasa ḇeḇor ro mnu ani sraḇe Yerusalem insa sfasren mankunsi ḇepon ro munara Paskah ani.

⁵⁶Ssewar Yesus ma sores ro Allah Rum ḇyedi dori, sikofen yae farosi, ḇo soḇo: “Rariso kakara mkoḇena? Nari ryama kako ḇe munara ineke?”

⁵⁷Rofafisu ani mananir imam-imam ma snon Farisi ssḇuk sasoser kwar insa snonkaku mansei ḇefawi Yesus ro moḇsai isya, sikofen ḇadir insa sfori.