Read Biak YOHANES 13 Bible Online

YOHANES 13 - Biak bible

YOHANES 13

¹Ras oser wer munara Paskahya ḇyeḇefrur, Yesus ifawi kwar, mboi fafisu ḇyedi ryama kwar fa ibur supswan ine faro kmari. Imnis raris iswar manfamyan ḇyesi rarirya baboine iswarsi isof papupesya.

²Rofyor sisya sanan kam, ma Ibiris fyararum kwar ro Yudas Iskariot, Simon mandaḇendi sne ḇyedi ro nyan rosai nari ḇyuki ḇyoḇ Yesus.

³Yesus ifawi, mboi Kmari ḇyuk roi ḇeḇor nakam faroi kwar ma ifawi ryama ker Allah ma nari kyaḇer faro Allah.

⁴Raimnai Yesus iyori ma pyer syatu ḇyedi. Dun marḇun oso ma fyesi ro sifer ḇyedi,

⁵raimnai iwek war ro sayer oso, ma ḇyuki ḇyan manfamyan ḇyesi wemin sena ma ḇyunek kuker marḇun ḇefes ro sifer ḇyedi ani.

⁶Rofyor ryama faro Simon Petrus, Petrus ikofen faroi, ḇo doḇo: “Manseren, inja waḇe ban wemin ayesuya?”

⁷Yesus ikofen faroi: “Rosai yafrur ro knikineya wafawi ḇaim, ḇape ras ḇarpurya nari wafawi.”

⁸Petrus ikofen faroi, ḇo doḇo: “Roḇa Manseren, wapok ban wemin ayesuyaḇa.” Yesus kyarem faroi: “Rofyor yaḇan wemin besuyaḇa, nari wasma rarwas kuker ayaḇa.”

⁹Simon Petrus ikofen faroi, ḇo doḇo: “Manseren rarirya ido, ban wemin ayesuya monda ḇa, mboi ḇramin ma ḇukor ayedi kako!”

¹⁰Yesus ikofen faroi: “Mansei ḇemasi kwar, ipok imasi wer ḇa, mboi koḇan wemin ḇyesya, snar isren kwar. Mko kako mkosren kwar mboi mkosren kam ba.” (

¹¹Snar ifawi kwar, nari mansei ḇeḇoḇiya. Eḇedari ikofen: “Mkosren kwar ḇape mkosren kam baim.”)

¹²Ḇyan wemin sena kwar, syansun sansun ḇyena wer raimnai kyain. Raimnai ikofen farosi: “Mkofawi kwarke rosai yafrur faro mkoya?

¹³Mkap ayaḇe Guru ma Manseren ma kaku ro wos mkoḇena, snar kaku aya ine Guru ma Manseren.

¹⁴Inja rofyor yaḇe Manseren ma Guru mkoḇedi ḇape yaḇan wemin mkoḇena, rarirya mko kako mkakḇan yae wemin mkoḇena.

¹⁵Snar yaḇuk nyan oso kwar faro mko, insa mko kako mkakfrur raris moḇ rosai yafrur faro mko kwar raya.

¹⁶ oso ikaki syadibur tuan ḇyedi ḇa, roḇaido wawan oso iba syadi ḇewani yaḇa.

¹⁷Rofyor mkofawi roi nane kam kwar, ma rofyor mkofrur na ido, aski faro mko.

¹⁸Yakofen faro mko kam ḇa, snar yafawi, mansei yakinfir kwar. Ḇape imnis rosai sfas kwar ro Refo isoine: Snonkaku ḇeyanan fnoḇek aya nari isampum aya.

¹⁹Yakofen na rarirya faro mko rofafisu ine kako rofyor roi yakofen nane ndama ḇaim, insa roi ḇeḇesya ani ryama kwar, rarirya mkokyar mboi aya irya.

²⁰Kaku ḇeri yakofen faro mko; mansei ḇena snonkaku yawansya, nya aya, ma mansei ḇena ayansya sakna kako ḇewan ayanya.”

²¹Yesus ikofen rarirya kwar iswar fafayaḇa inja ḇyesaksi: “Yakofen faro mko, kaku ḇeri rofandu mko nari oso ḇyoḇ aya.”

²²Manfamyan ansi smam yaesi, ma sikmom snar sifawi mansei Yesus ikofenya ḇa.

²³Oso rofandu Yesus manfamyan ḇyesi, isoine manfamyan iswar ani ma ḇekain fanami, ro ḇar raku ḇyedi.

²⁴Simon Petrus pyanir manfamyan ani ma ikofen, ḇo doḇo: “Wafuken manseiso ikofen ḇesyanya!”

²⁵Manfamyan ḇekain fanam Yesus ani iknenef ma ikofen faroi, ḇo doḇo: “Manseren, manseiso eḇesyani?”

²⁶Yesus kyarem: “Snonkaku yasowen mamami ma yaḇuk faroya ido irya.” Ikofen rarirya posa dun mamami ma syoweni posa ḇyuki faro Yudas, Simon Iskariot mandaḇendi.

²⁷Ma Yudas duf mamami ani kwar, Ibirisya isawoḇi. Ma Yesus ikofen faroi: “Rosai waḇe wafrurya, iḇye wafrur fasaw.”

²⁸Ḇape snon osero ḇaḇeri ro ḇekain ḇeyanan ansi ifawiḇa, rosai Yesus ikofen rarirya faro Yudas.

²⁹Snar Yudas iso ḇeyuf mansrip ḇeser pipiya inja skara, mboi Yesus iwani fa kyoḇes roi ḇeḇefandun faro munara ani, roḇaido ḇyuk roi ono faro ḇesaḇararsya.

³⁰Yudas dun mamami raimnai rya fasau. Ma rofyor ani roḇ kwar.

³¹Rofyor rya kwar, Yesus ikofen: “Insape Rumkun Snonkaku isma baba ma Allah isma baba kukeri.

³²Rofyor Allah isma baba snar i, ma Allah nari ḇyuk faḇei baba kako, baba ro Allah mankundi ḇardi ma nari ḇyuk baba fasaw faroi.

³³Ne, romawa ayena mko, fafisu kermkun monda kaker, aya isya fnoḇek mko. Ma nari mkosewar aya, ḇape raris yakofen faro kawasa Yahudisya: Ḇemoḇ yara yoḇya, mkopok mkorama roiḇa, rarirya kako knikine yakofen faro mko.

³⁴Yaḇuk sasoser ḇaḇo faro mko, insa mko swar yae mko; imnis raris moḇ yaswar mko kwar raya, rarirya mko kako mko swar yae mko.

³⁵Rofyor mko swar yae mko ido snonkakusya kam nari sifawi mboi manfamyan ayesi mko, rofyor mko swar yae mko kada.”

³⁶Simon Petrus ikofen faro Yesus, ḇo doḇo: “Manseren, waḇe rwaḇeso?” Yesus kyarem: “Moḇ yarayoḇya, nari wapok waso ayaḇeri ro knikine ḇa, ḇape insape nari waso aya.”

³⁷Petrus ikofen faroi, ḇo doḇo: “Manseren, snaro yaso beri au ro knikine ḇa? Yamarisen yamar sadwer aw!”

³⁸Yesus kyarem: “Kakuke wamarisen fa wamar sadwer aya? Kaku ḇeri yakofen faro aw: Mankokosya sor ḇaim, famyun aya ḇe rarwan rikior kwar.”