Read Biak YOHANES 14 Bible Online

YOHANES 14 - Biak bible

YOHANES 14

¹“Mkosnemna neḇirḇar awer; mkokyar faro Allah, mkokyar maro aya kako.

²Ro Mami rum ḇyedi moḇ kankain nasya nabor. Rofyor rariryaḇa, nari yakofen na faro mko. Snar yaramura ḇediwa insa yafasos moḇ faro mko.

³Ma rofyor yara ro diwa kwar ma yafasos moḇ faro mko kwar, nari yakaḇer muma wer ma yun mkoḇe moḇ ayedi, insa moḇ rosai aya isya roya, mko kako mkoisya ro moḇ ani.

⁴Ma moḇ yaraḇeya, mkofawi nyan ḇeraḇe moḇ ani.”

⁵Raimnai Tomas ikofen faro Yesus, ḇo doḇo: “Manseren, nkofawi moḇsai rwaḇeyaḇa; inja rariso nari nkofawi nyanya?”

⁶Yesus ikofen faroi: “Aya ine kada nyanya ma napnapes ma kankenem. Snonkaku oso ḇaḇeri ḇerama faro Mami, rofyor imbranuk ro ayaḇa.

⁷Rofyor mkomambaḇir aya, nari mkomambaḇir kaku mami kako. Knikine mkomam baḇiri ma mkomami kwar.”

⁸Filipus ikofen faro Yesus, ḇo doḇo: “Manseren, fasna Kmaya maro nko, rarirya imnis maro nko kwar.”

⁹Yesus ikofen faroi: “Fyoro kaku aya isya fnoḇek mko, Filipus, ḇesyaḇo mambaḇir ayaḇa? Mansei ḇemam aya kwar ido, myam Kmaya kwar kako; rariso wakofen: Fasna Kmaya maro nko.

¹⁰Wakyarḇake, yaḇe oser kuker Kmaya ma Kmaya ḇyeoser kuker aya? Rosai yakofen faro aw, yakofen na ro mankundaya ḇardiḇa, ḇape Kmaya ḇaḇeoser nuḇedi, iso ḇefrur nakamya.

¹¹Mkokyar faro aya mboi yaḇe oser kuker Kmaya ma Kmaya ḇye oser kuker aya, mboi roḇaido mkokyar snar rosai yafrur kwar na.

¹²Kaku ḇeri yakofen faro mko: Mansei ḇekyar faro aya, nari dakfrur kako fararur-fararur yafrur nane, mboi nari ifrur roi ḇeba syadi wer. Snar yara faro Kmaya;

¹³ma rosai mkor kuker snonsnon ayedi, nari yafrur na faro mko, insa Kmaya isma baba ro Rumkunya.

¹⁴Rofyor mkor roi ono kuker snonsnon ayedi, nari yafrur na.”

¹⁵“Rofyor mkoswar aya ido, nari mkoḇeuser sasoser ayena kam kada.

¹⁶Nari yor faro Kmaya, ma nari ḇyuk faro mko snon ḇesaramper oso ḇese, insa ifnoḇek mko,

¹⁷isoine Rur Napnapesya. Supswan ine dakna iba, snar supswan ine dakmam iba ma ssmambaḇir iba. Ḇape mko kada mkomamḇaḇiri, snar ifnoḇek mko ma ḇyeoser kuker mko.

¹⁸Nari yabur mkoḇa imnis awak param. Nari yakaḇer maro mko wer.

¹⁹Fyoroḇa wer supswan ine nari smam aya werḇa, ḇape mkoma nari mkomam aya, snar yakenem ma mko kako nari mkakkenem.

²⁰Rofyor ani nari mkofawi, mboi yaḇeoser kuker Mami, ma mkoḇe oser kuker aya ma ayano yaḇe oser kuker mko.

²¹Mansei ḇeyuf sasoser ayena ma ḇeḇeuser na, iso ḇeswar ayanya. Ma mansei ḇeswar aya, ikada nari Mami dakswari ma aya kako nari yakswari ma nari yafasna aya ḇardi faroi.”

²²Yudas ḇekofen ine Iskariot isyaḇa, ifuken faro Yesus, ḇo doḇo: “Manseren, rosai eḇedari woḇo fasna au maḇe nko, mboi faro supswan ineḇa?”

²³Yesus kyarem: “Rofyor oso iswar aya, ikada nari ḇyeuser farkarkor ayena, ma Mami nari iswari ma nari nko rama faroi ma nko kainusi.

²⁴Mansei ḇeswar ayaḇa, nari ḇyeuser farkarkor ayenaḇa; ma farkarkor mkomnaf anna ndama ro ayaḇa, mboi ndama ro Kmaya ḇewan aya.

²⁵Yakofen roi ḇeḇor annane kam faro mko, rofyor aya isya kaker kuker mko;

²⁶ḇape Rur Ḇesren, isoine Rur Ḇeḇuk snepreiya nari Kmaya iwani kuker snonsnon ayedi, iso nari ḇefarkor fa ḇemko ma ḇeḇuk swarepen ro roi ḇeḇor yakofen kwar faro mko anna kam.

²⁷Askiya yaḇeifa kyainus mko. Aski ayena yaḇuk na faro mko, ma rosai yaḇuk faro mko namnis kuker roi supswan ine ḇyuk faro mko naba. Mkosnemna neḇirḇar ma mkomkak awer.

²⁸Mkomnaf mboi yakofen faro mko kwar: ‘Yara, ḇape nari yakaḇer faro mko wer.’ Rofyor mko swar aya kada, nari mko marisen kaku snar yara faro Mami, snar Mami ḇeba syadi ro aya.

²⁹Ma knikine yakofen na kako faro mko rofyor ndama ḇaimya, insa mko kyare, rofyor ndama kwarya.

³⁰Yawos nabor wer faro mkoḇa, snar papoik supswan ine ryama ma ipok ayaḇa.

³¹Ḇape insa supswan ine sifawi, mboi yaswar Mami ma yafrur roi ḇeḇor kam Mami syoser faro ayana kwar. Mkoyor mko kora kobur moḇ ine.”