Read Biak YOHANES 17 Bible Online

YOHANES 17 - Biak bible

YOHANES 17

¹Yesus ikofen rarirya. Raimnai iwakwaker ḇe nanki ma ikofen: “Mami, fafisuya ryama kwar; buk baba faro Rumkun bedi, insa Rumkun bedi dakfrur baba faro aw.

²Imnis raris buk faroi kwar papoik robo kawasasya kam, rarirya nari ḇyuk kako kankenem ḇekain fyoroya faro snonkakusya kam buk faroi kwarsya.

³Kankenem ḇekain fyoroya, isoine mboi ssmambaḇir aw werer Allah ḇenapes, ma ssmambaḇir Yesus Kristus wawan kwar ani.

⁴Yafrur wasma baba kwar ro supswan ine kuker nyan yafrur posa fararur buk maro aya fa yafrur na.

⁵Inja knikine, o Mami, buk baba ḇe aya ro aw ḇardi, kuker baba yasma ro ḇarpon bedi rofyor supswan ine isya ḇaim.

⁶Yafasna Mami kwar faro snonkaku ḇeḇor buk kwar maro aya ro supswan ine. Sikada aw ḇenasi ma buksi maro aya kwar ma siso wos ḇena kwar.

⁷Insape sifawi, mboi snonkaku buk ḇe ayansya kam seknam ro aw.

⁸Snar roi ḇeḇor buk maro aya kwar yaḇuk na kwar farosi ma sakna na kwar. Sifawibos kaku, yaḇe knam ro aw ma sikyar aw ḇewan ayanya.

⁹Yaḇe nadi warek si. Yaḇe nadi faro supswan ineḇa, ḇape faro snonkaku buk kwar maro aya, snar aw ḇenasi,

¹⁰ma roi ḇeḇor ayena kam aw ḇenananya ma roi nwana ayai ḇenananya, ma yasma baba kukersi kwar.

¹¹Ma aya isya ro supswan ine werḇa, ḇape sikada sisya kaker ro supswan ine, ma yara mufaḇe aw. O Mami ḇesren, fadurusi ro snonsnon ḇedi, isoine snonsnon bedi bema ḇe aya kwar; insa sḇeoser imnis raris Ko.

¹²Rofyor aya isya fnoḇek si, yafadurusi ro snonsnon bedi, isoine snonsnon bedi buk kwar maḇe aya; yawarensi kwar, ma oso rosi ryoḇa derer faroi sfasna kwar fa ḇeroe, insa fasfas Refoya imnis.

¹³Insape yara mufaḇe aw ma yakofen nakam ine rofyor aya isya kaker ro supswan ine, insa raryaḇ ayena rofandusi.

¹⁴Yaḇuk wos ḇena farosi kwar, inja supswan ine sayinsi, snar sikada supswan ine nyasiḇa, imnis raris aya ine kako sup-swan ine nya ayaḇa.

¹⁵Yor fa wunsi bur supswan ineḇa, imboi insa fadirensi ro ḇarḇorya.

¹⁶Supswan ine nyasiḇa, imnis aya kako supswan ine nya ayaḇa.

¹⁷Fasren si ro napnapesya; wos bedi kada napnapes rirya.

¹⁸Imnis raris wawan aya kwar ḇe supswan ine, rarirya yawansi ḇe supswan ine kako;

¹⁹ma yafasren mankundaya farosi, insa seḇeyakfasren ro napnapesya.

²⁰Ma yaḇenadi warek serer mondaḇa, ma yaḇenadi warek kako snonkaku ḇekyar faro ayasya snar ḇararyas sena;

²¹insa sikam seoser, imnis raris Mami, ḇyeoser kuker aya ma aya yaḇeoser kuker Mami, insa sikako sakḇe oser kuker Ko, insa supswan ine sikyar, mboi Mami ḇewan ayanya.

²²Yaḇuk farosi baba, buk kwar maḇe ayana, insa sḇeoser, imnis raris moḇ Ko ḇeoser raya.

²³Aya yaḇe oser kukersi ma aw beoser kuker aya insa simnis sḇeoser, insa supswan ine sifawi, mboi aw ḇewan aya kwar ma waswarsi, imnis raris waswar aya.

²⁴O Mami ḇenapes, mboi supswan ine dakmam baḇir awḇa, ḇape aya kada yamambaḇir aw ma naek ansine kada sifawi, mboi aw ḇewan ayanya.

²⁵O Mami, yamarisen insa, moḇ rosai aya isya roya, sisya fnoḇek aya, snonkaku buk kwar maḇe aya, insa smam baba ayena buk kwar maḇe aya, snar waswar aya kwar rofyor supswan ine ḇyeḇefrur ḇaimya.

²⁶Ma yakofen ḇadir snonsnon bedi farosi kwar ma nari yakofen ḇadir wer, insa saswar buk faro aya ḇyeoser kuker si ma ayano yaḇe oser kukersi.”