Read Biak YOHANES 2 Bible Online

YOHANES 2 - Biak bible

YOHANES 2

¹Ro ras ḇeḇekiorya munara fakawiwin oso isya ḇyeḇefrur ro mnu Kana sup Galilea, ma Yesus snari isya rodia;

²Yesus ma manfamyan ḇyesi sakposi kako ro munara fakawawin ani.

³Rofyor anggur sesi siḇro, Yesus snari ikofen faroi: “Anggur sesya siḇro.”

⁴Yesus ikofen faroi: “Awine rosai wamarisen ro aya? Fafisu yedi ryama ḇaim.”

⁵Inja snari ikofen faro ḇeyuffarmyansya: “Rosai ikofen faro mko, mko frurna!”

⁶Rodia babewu riwonem naisya sfasos na faro ḇanḇan imnis rari kawasa Yahudi, oser-oser iser fyom risuru oroḇa kior.

⁷Yesus ikofen faro ḇeyuffarmyan ansi: “Mkoser babewu nane rao nafo kuker war.” Ma siser narao nafo.

⁸Raimnai ikofen farosi: “Knikine mko nawna ma mkun faro manfarkin munaraya.”

⁹Manfarkin munara ani ryepen war ani kwar, ḇefawnai kwar ḇe anggur ani ma ifawiḇa anggur ansi srama kero, ḇape ḇeyuffarmyan, ḇenaw war ani, ḇefawiya dor manfakawin snonya,

¹⁰ma ikofen faroi: “Imnis raris rari Yahudi, snonkakusya ssḇuk anggur ḇeḇye resari isof kawasasya sinem rao sisyopen, insape ssḇuk anggur ḇeḇye mankunba; ḇape wakram anggur ḇeḇesya isof knikine.”

¹¹Ine aḇyair kanandor ḇepon Yesus ifrur ro Kana sup Galilea, ma kuker aḇyair ine fyasna baba ḇyedi. Inja manfamyan ḇyesi sikyar faroi.

¹²Raimnai Yesus ryaḇe Kapernaum fnoḇek snari ma naek ḇyesi ma manfamyan ḇyesi, ma skain rodia ḇe ras riḇeso monda.

¹³Fafisu ras munara Paskah kawasa Yahudi fyanam kwar, Yesus dekḇe Yerusalem.

¹⁴Ro Allah Rum ḇyedi manfarḇyan sapi, kambing, domba ma manjawa, ma ḇesadwer pipi skain rodia.

¹⁵Inja pyar kaḇrai baken osoḇe ayos, raimnai ḇyuki iyaw sikam ro Allah Rum ḇyedi kuker kambing-domba ma sapi sesi; pipi ḇesadwer isbawer si ḇo pyambar meja-meja sena.

¹⁶Faro manfarḇyan manjawasya ikofen: “Mkun roi ḇeḇor nanekam bur moḇ ine, mkofrur Mami rum ḇyedi awer ḇe moḇ ḇefarḇyan.”

¹⁷Inja manfamyan ḇyesi siswar smai fasfas ḇeyoḇo: “Saswar ayedi faro rum bedi, O Allah, ifrur dosam imnis for ḇekun.”

¹⁸Kawasa Yahudi sisampum Yesus, ḇo soḇo: “Aḇyair rosai fasna maro nko, mboi wasma papoik fa wafrur rarirya?”

¹⁹Yesus kyarem farosi: “Mkokakok Allah Rum ḇyedine kada, ma ro ras rikior nari yaḇawes i wer.”

²⁰Raimnai kawasa Yahudi sikofen faroi: “Wampasi wambarek samfur rifiak seser riwonem Allah Rum ḇyedine snonkaku sḇawesi ma au nari ḇeḇawesi ro ras rikioryake?”

²¹Ḇape roi dawos sarḇer kuker Allah Rum ḇyedi, isoine mankundi baken ḇyedi.

²²Ḇarpurya, rofafisu diḇri ro fandu ḇemarsya, insape manfamyan ḇyesi siswarepen roi ḇeḇesya ani ikofeni kwar, ma sikyar fasfas Refo ma Yesus wos ikofen ani kwar.

²³Ma fafisu isya ro Yerusalem, fyor munara ḇeba Paskahya, kawasa sibor sikyar faroi snar smam aḇyair ifrur kwar na.

²⁴Ḇape Yesus mankundi ikyar siḇa, snar myamkir sikam,

²⁵ma fandun fa snonkaku oso ikofen faroi, ro manseirya wer kako snar myamkir rosai isya ro snonkaku sisnes na.