Read Biak YOHANES 20 Bible Online

YOHANES 20 - Biak bible

YOHANES 20

¹Ro ras ari arwo prim kaku, fafisu isnai karkir, Maria Magdalena ryaḇe rus ani ma myam mboi karui ḇesisen urerenya ḇyeḇekris kwar bur urerenya.

²Ifrar fa syewar Simon Petrus ma manfamyan Yesus iswar ani, ma ikofen faroi, ḇo doḇo: “Snonkaku ono ssun Manseren bur ureren ḇyani ma nkofawi moḇ sikrami wer royaḇa.”

³Inja Petrus ma manfamyan ḇese ani sura ḇe rus ani.

⁴Sufrar kam ḇape manfamyan ḇese ani ifrar samberen syadi Petrus inja pyonra ro rus ani.

⁵Kyankunem ma ikiki myam ro urerenya, kruḇen ḇeparek Yesusya ḇyarek ro moḇ ani, ḇape syun ro ureren aniḇa.

⁶Simon Petrus iyauser ma syun pdef ro ureren ani. Myam kruḇen ḇeparek Yesus ani ḇyarek rodia,

⁷ma marḇun ḇefes Yesus bukor ḇyedi ḇyarek fanam kruḇen ḇeparekiya ḇa, mboi ḇyeḇeyaper ḇo ḇyarek ḇese.

⁸Inja manfamyan ḇese ḇefrar ḇepon maro rus ani, dakkiki kako ma myam rarirya inja ikyar.

⁹Snar rofyor ani kada sifawi ḇaim rosai sfas ro Refo mboi nari diḇeri bur marmarya.

¹⁰Raimnai manfamyan ansuya subur ḇe rum.

¹¹Ḇape Maria dores fanam ureren ani ḇo kyanes. Fafisu kyanes ḇo ikiki fa myam ro ureren ani,

¹²ma myam malaikat risuru susansun sansun ḇepyoper ḇo sukain ro moḇ Yesus kekḇa ḇyedi ḇyarek ro ani, suminya ro mun ḇukorya ma suminya ro mun weminya.

¹³Malaikat ansuya sukofen faroi: “Awine, rosai kwanes kukerya?” Maria kyarem, ḇo doḇo: “Snonkaku ono ssun Manseren ayedi kwar ma yafawi moḇ sriri royaḇa.”

¹⁴Ikofen rarirya kwar iknenef ḇeḇarpur ma myam Yesus dores, ḇape ifawiḇa, mboi Yesus irya.

¹⁵Yesus ikofen faroi: “Awine, rosai kwanes kukerya? Mansei swewarya?” Maria kyara ḇo doḇo snon ḇewaren yaf rirya inja ikofen faroi, ḇo doḇo: “Tuan rofyor awi ḇeyuni ido wakofen ḇadiri ḇe aya, moḇ rosai rwiri roya, insa yara yuni.”

¹⁶Yesus ikofen faroi: “Maria!” Maria iknenef ma ikofen faroi kuker wos Ibrani: “Rabuni!” isoine, “Guru”.

¹⁷Yesus ikofen faroi: “Pan awer ro aya, snar yara faro Mami ḇaim, mboi rwa wakofen faro naek ayansi, mboi insape yaḇe yara faro Mami ma Kma mko ḇedi, faro Allah ayedi ma Allah mkoḇedi.”

¹⁸Maria Magdalena rya ma ikofen faro manfamyan ansi: “Yamam Manseren kwar!” ma Manseren iso ḇekofen roi ḇeḇor anna faroi.

¹⁹Ro ras ari ani kako fafisu roḇ kwar, Yesus manfamyan ḇyesi siryur ro rum oso ma kedwana neḇesopder, snar simkak kawasa Yahudisya. Rofafisu ani Yesus ryama dores fandusi, ma ikofen: “Aski faro mko!”

²⁰Ma ikofen rarirya kwar, fyasna ḇramin ḇyesu ma pe ḇyedi farosi. Manfamyan ansi simarisen kaku rofafisu smam Manseren.

²¹Ma Yesus ikofen wer: “Aski faro mko! Imnis raris Mami iwan aya, rarirya knikine yakwan mko kako.”

²²Ma rofyor dawawos rarirya kwar, iwuf yoi ḇyedi farosi ma ikofen: “Mkosma Rur Ḇesrenya.

²³Rofyor mkopyos snonkaku oso sasar ḇyena, Allah kako dakpyos sasar ḇyena. Mboi rofyor mkopyos oso sasar ḇyenaḇa, Allah kako dakpyos sasar ḇyenaḇa.”

²⁴Tomas, snon oso ro manfamyan samfur seser risuru, ḇyansi sap i kako ḇe Didimus, isya fnoḇek min ḇyesiḇa rofafisu Yesus ryama farosi ani.

²⁵Inja manfamyan ḇese ansi sikofen faroi, ḇo soḇo: “Nko mam Manseren kwar!” Ḇape Tomas kyarem farosi, ḇo doḇo: “Rofyor yamam apurwan paku ro ḇramin ḇyesuyaḇa, ma yasyun ḇrampin ayesi ro apurwan paku ani ma yasyun ḇramin ayesi ro pe ḇyediḇa, yakyar ḇaim.”

²⁶Ras riwar nawas kwar Yesus manfamyan ḇyesi siryur wer ro rum ani ma Tomas ifnoḇeksi kako. Fafisu ani kedwana neḇesopder kam, ḇesyaḇo Yesus ryama dores fanandusi, ma ikofen: “Aski faro mko!”

²⁷Ḇarpurya Yesus ikofen faro Tomas: “Wasyun ḇrampin besi rodine, ma mam ḇramin ayesuine, fos ḇramsu ma wasyun ro pe ayedine ma wakyarḇa kaker awer, mboi wakyar beri.”

²⁸Tomas kyarem faroi, ḇo doḇo: “O Manseren yedi ma Allah yedi!”

²⁹Yesus ikofen faroi: “Snar mam aya kwar eḇedari wakyarya. Aski faro ḇemamḇa, mboi ḇekyarsya.”

³⁰Aḇyair-aḇyair kanandor naisya nabor kaker Yesus ifrur ro ḇarpon manfamyan ḇyesi mamam sena, ḇape neḇefas kamba ro syap ine,

³¹ḇape roi ḇeḇor nane neḇefas kwar insa mko kyar, mboi Yesus Wairek ḇeḇuk koreri, Allah Rumkun ḇyedirya, ma snar mko kyar faroi, inja mkosma kankenemya.