Read Biak YOHANES 21 Bible Online

YOHANES 21 - Biak bible

YOHANES 21

¹Ḇarpurya Yesus fyasna mankundi wer faro manfamyan ḇyesi ro danosen Tiberias andirya ma fyasna mankundi farosi radine.

²Ro danosen andir ani manfamyan ḇyesi ono sisya siryur isoine: Simon Petrus, Tomas sap kako ḇe Didimus, Natanael ro Kana ro Galilea, Zebedeus mandaḇen ḇyesuya ma manfamyan ḇyesi suru wer.

³Simon Petrus ikofen farosi, ḇo doḇo: “Yaḇe yaraswan.” Sikofen faroi, ḇo soḇo: “Nkoso aw!” Sra sek ro waya, ḇape roḇ ani smun ino ḇaḇeri.

⁴Fafisu fanam meser, Yesus dores ro danosen andirya; ḇape manfamyan ansi sifawiḇa, mboi ḇeyores ani Yesus irya.

⁵Yesus ikofen farosi: “Ne, romawa yesi, mkosma manfna onoke?” Skarem ḇo soḇo: “Oroḇa beri.”

⁶Inja Yesus ikofen farosi: “Mko nap pam mkoḇedi ro waya ḇar rakuya, ma nari mkosma in ono.” Raimnai snap pam ani ma ssambraḇ fa spaw pam aniḇa snar insya sibor mankenem.

⁷Inja manfamyan Yesus iswar ani ikofen faro Petrus: “Manseren irya.” Fafisu Petrus imnaf mboi Manseren irya, inja syansun sansun ḇyena, snar syansuni ḇa, raimnai doper ro danosenya.

⁸Manfamyan ḇesesya siyauser kuker waya ma spaw pam ḇefo kuker in ani ḇe ḇonde snar sḇinkwan ro ḇondeyaḇa, indokada rof utin oser monda.

⁹Fafisu srande kwar smam fondesna kuker in ma mamami.

¹⁰Yesus ikofen farosi: “Indo mkun in mko mun babo ansi ono muma.”

¹¹Simon Petrus dek ro waya raimnai skopaw pam ani ḇe ḇonde, ifo kuker in ḇeba-ḇeba monda: Utin oser samfur ririm seser rikior, sibor rarirya ḇesyaḇo pam ani imuk ḇaḇeri.

¹²Yesus ikofen farosi: “Mkorama kanan.” Manfamyan ansi oso ḇaḇeri ḇefuken faroi: “Inja manseso aw?” Snar sifawi, mboi Manseren irya.

¹³Ḇarpurya Yesus fyanamsi, ma dun mamami ani fa ḇyukḇoḇ si. Ifrur rarirya kuker in ansi.

¹⁴Ine rarwan ḇeḇe kior Yesus fyasna mankundi faro manfamyan ḇyesi posa ro aḇiḇer ḇyedi ro fandu ḇemarsya.

¹⁵Sanan posa kwar Yesus ikofen faro Simon Petrus: “Simon, Yohanes mandaḇen ḇyedi, waswar syadi ayake ro min besine?” Petrus kyarem faroi, ḇo doḇo: “O Manseren, wafawi, mboi yaswar aw.” Yesus ikofen faroi: “Wafarandows domba-domba ayesi.”

¹⁶Yesus ikofen faroi ḇerarwan ḇeḇe suruya: “Simon, Yohanes mandaḇen ḇyedi, waswar syadi ayake?” Petrus kyarem faroi; ḇo doḇo: “O Manseren wafawi, mboi yaswar aw.” Yesus ikofen faroi: “Wafarandows domba-domba ayesi.”

¹⁷Yesus ikofen faroi wer ḇerarwan ḇeḇekiorya: “Simon, Yohanes mandaḇen ḇyedi, waswar syadi ayake?” Inja Petrus sne ḇyedi fyafardun snar Yesus ifuken ḇerarwan rikior: “Waswar syadi ayake?” Ma ikofen faroi: “Manseren, Manseren wafawi roi ḇeḇor kam, wafawi, mboi yaswar aw.” Yesus ikofen faroi: “Wafarandows domba-domba ayesi.

¹⁸Kaku ḇeri yakofen faro aw: Fafisu besnonkborya mankundaw fes sifer bedi kuker ḇeḇoḇek ma wambran ḇe moḇ rosai wamarisenya, ḇape rofyor bemansar kwar, nari fos ḇramsu ma snonkaku ḇese siyaḇek aw ma sun awḇe moḇ mankundaw wamarisenḇa.”

¹⁹Wos nane ikofen na rarirya fa nfasna Petrus marmar ḇyedi ḇeḇuk baba faro Allah. Posa kwar Yesus ikofen faro Petrus: “Waso aya.”

²⁰Fafisu Petrus iknenef, myam mboi manfamyan Yesus iswar ani isoine manfamyan ro fafisu skanan kam ma ḇekain fanam Yesus ma ḇefuken, ḇo ḇeyoḇo: “Manseren, manseiso nari ḇeḇoḇ awya?”

²¹Rofyor Petrus myam manfamyan ani, ikofen faro Yesus, ḇo doḇo: “Manseren, rariso kuker snon ine?”

²²Yesus kyarem: “Rofyor yamarisen, nari ikenem rao isof yakaḇer werma, ine fararur bedisyaḇa. Mboi awkada waso aya.”

²³Inja wos ani ḇyesno ro fandu manfamyan Yesus ḇyansi mankunsi, mboi manfamyan ani nari imarḇa. Ḇape Yesus ikofen rariryaḇa, mboi doḇo: “Rofyor yamarisen nari ikenem rao isof yakaḇerma wer, ine fararur bedisyaḇa.”

²⁴Manfamyan ani iso, ḇeḇuk ḇaḇesaksi ro roi ḇeḇor nane kamya. Iso ḇefas epen na kako, insa kofawi rosai ikofen na nkaku.

²⁵Yesus roi ifrurna naisya nabor kaker, ḇape rofyor neḇefas kam oser ḇe oser ido, yakara ḇoi moḇ ono ro supswan ine fa naser syap ḇeḇor nari sfas naba.