Read Biak YOHANES 3 Bible Online

YOHANES 3 - Biak bible

YOHANES 3

¹Snon farisi oso snonsnon ḇyedi Nikodemus, snon manfarkin ro agama Yahudi.

²Roḇ oso ryama faro Yesus ma ikofen: “Rabi, nkofawi, mboi rwama imnis Guru Allah wawan ḇyedi; snar snonkaku osero ḇaḇeri fa ifrur aḇyair-aḇyair wafrur nane, rofyor Allah ifnoḇeki ḇa.”

³Yesus kyarem, doḇo: “Yakofen faro aw, kaku ḇeri rofyor snonkakuyo ḇyeḇeyaḇen kaḇer werḇa, ipok myam Allah Ḇaḇesasoser ḇyediḇa.”

⁴Nikodemus ikofen faroi, ḇo doḇo: “Rariso nari saḇen snon oso, rofyor ḇyemansar kwar? Inja, nari syun wer ro snari sneyuser ḇyena ma ḇyeḇeyaḇen werke?”

⁵Yesus kyarem: “Kaku ḇeri yakofen faro au, rofyor snon oso ḇyeḇeyaḇen kuker war ma Rurya ḇa ipok daksun ro Allah Ḇaḇesasoser ḇyediḇa.

⁶Rosai saḇen ro krafya, kraf rirya, ma rosai saḇen ro Rurya, Rur rirya.

⁷Wakandor awer, snar yakofen faro aw: Nari mkoḇe ḇeyaḇen wer.

⁸Wamya iso ḇemoḇ imarisen, ma wamnaf rakrokya, ḇape wafawi moḇ ryamuma royaḇa, roḇaido moḇ iḇe isoyoḇya ḇa. Rarirya kuker snonkaku ḇeyaḇen ro Allah Rur ḇyedi.”

⁹Nikodemus kyarem, ḇo doḇo: “Rariso nari roi ḇeḇesya ani ryarirya?”

¹⁰Yesus kyarem, doḇo: “Aw guru ro Israel, insape woḇe wafawiḇa?

¹¹Kaku ḇeri yakofen faro aw, nkowawos ro roi inkofawi ma nkoḇe saksi ro roi nkomam, ḇape mkomewer ḇaḇesaksi nkoḇena.

¹²Mkokyarḇa, rofyor yawawos kuker mko ro roi ḇero supswan ine, rariso nari mkokyar, rofyor yawawos kuker mko ro roi ḇero boiyaswa?

¹³Snon oso ḇaḇeri ḇeyek kwar ḇe boiyaswa, mboi i ḇeyado kwar ro boiyaswa, isoine Rumkun Snonkakuya.

¹⁴Ma imnis kuker Moses kyaf ikak kansai ro ai oso ro sup ḇeursḇa, rarirya kako Rumkun Snonkakuya nari skafi ro apropya,

¹⁵insa snonkaku ḇekyar faroi sisma koreri ḇekain fyoroya.

¹⁶Snar Allah saswar ḇyedi ibabos faro supswan ine, isof ḇyuk kwar Rumkun Mandos ḇyedi, insa snonkaku ḇekyar faroi sya sroḇa, mboi sisma koreri.

¹⁷Snar Allah iwan Rumkun ḇyedi fa ḇyuk samamyai faro supswan ineḇa, mboi insa fyaspari.

¹⁸Mansei ḇekyar faroi, nari sisma samamyaiḇa; ḇape mansei ḇekyarḇa, isya ro samamyaiya kwar, snar ikyar faro Allah Rumkun Mandos ḇyedi snonsnon ḇyediḇa.

¹⁹Ma samamyaiya isoine: Isnaya ryafes kwar ḇe supswan ine, ḇape snonkakusya simarisen syadi pampanya ro isnaya, snar fararur sena naḇarḇor.

²⁰Snar mansei ḇefrur ḇarḇor, dayin isna ani ma rya faro isnai aniḇa, insa fararur ḇarḇor ḇyena nbayir awer;

²¹ḇape mansei ḇefrur roi ḇenapes, rya faro isnaya, insa ḇyeḇefasna ḇayir, mboi rosai ifrur na namnis kuker Allah marisen ḇyedi.”

²²Raimnai Yesus rya kuker manfamyan ḇyesi ḇe sup Yudea ma kyain rodiwa fnoḇeksi ma ḇyuk masi sren.

²³Ḇape Yohanes kako dakḇuk masi sren ro Ainon, fanam Salim, snar rodia war na nabor, ma snonkaku sibor sisrow ro dia fa ḇyuk masi sren farosi,

²⁴snar rofyor ani Yohanes ḇyeḇesun ro bui ḇaim.

²⁵Mboi rofafisu ani Yohanes manfamyan ḇyesi sfamfaḇri kuker snon Yahudi oso kuker mnuk fasasren.

²⁶Inja sra faro Yohanes ma sikofen faroi, ḇo soḇo: “Rabi, snon ḇefnoḇek kuker aw ro war Yordan ḇariwara ma faroi buk ḇaḇesaksi kwar, dakḇuk masi sren kako ma kawasa syakam sra faroi.”

²⁷Yohanes kyarem, ḇo doḇo: “Snonkaku oso ḇaḇeri nari ḇeyun faro mankundi, rofyor neḇeḇuk faroi ro boiyaswaḇa.

²⁸Mankun mko mkoḇesaksi, mboi yakofen kwar: Aya ine Wairek ḇa, ḇape siwan aya fa yaponi.

²⁹Ḇena ḇinfakawinya, isoine manfakawinya; ḇape manfakawinya bati ḇyesi ḇeyores fanami ma ḇemnafi, siryaḇ fafayaḇa, snar simnaf mkaren ro manfakawin ani. Irya raryaḇ ayedi iba.

³⁰Ikada nari iba syadi, ḇape ayakada nari yabaḇa syadi.

³¹Mansei ḇeraker boiyaswa isyadi ro nakam; mansei ḇeḇe knam ro supswan ine, i snonkaku ro supswan ine ma dawawos ro wos supswan. Mansei ḇeraker boiyaswa, ikada isyadi ro nakam.

³²Ḇyuk ḇaḇesaksi ro roi myam na ma roi imnaf na, ḇape snonkaku osero ḇaḇeri ikyar ḇaḇesaksi ḇyena.

³³Mansei ḇekyar ḇaḇesaksi ḇyena, ikada kyarem, mboi Allah inapes.

³⁴Snar mansei Allah iwan ani, iso ḇeḇaryas Allah wos ḇyedi, snar Allah ḇyuk Rur ḇyedi ḇesiper faroi.

³⁵Kmaya iswar Rumkunya ma ḇyuk roi ḇeḇor nakam faroi kwar.

³⁶Mansei ḇekyar faro Rumkunya, isma kankenem ḇekain fyoroya, ḇape mansei ḇeḇeuser Rumkunya ḇa, ipok isma koreriḇa, mboi Allah masasor ḇyedi kyuri ḇesya kwar.”