Read Biak YOHANES 4 Bible Online

YOHANES 4 - Biak bible

YOHANES 4

¹Rofyor Manseren Yesus ifawi, snon Farisisya simnaf kwar, mboi Yesus isma ma ḇyuk masi sren faro manfamyan sibor syadi wer ro Yohanes —

²mboi Yesus mankundi ḇeḇuk masi sren yaḇa, mboi manfamyan ḇyesi, —

³Inja ibur Yudea ma kyaḇer ḇe Galilea.

⁴Nari iḇe dunuk ro sup Samaria.

⁵Ma ryama ro mnu oso ro Samaria, ḇenirḇe Sikhar fanam saprop ḇepon iwara Yakub ḇyuk faro romawa ḇyedi, Yusuf.

⁶War ḇeyer Yakub isya rodia. Yesus imor kaku ro mararan ani, inja kyain ro war ḇeyer ani andiirya. Ras ani indokada oras samfur seser risuru.

⁷Snar manfamyan ḇyesi sra kwar ḇe mnuya fa skoḇes roḇean.

⁸Ḇarpurya bin Samaria oso ryama dukeḇ war. Yesus ikofen faroi: “Buk waroma yinem kada.”

⁹Ma bin Samaria ani ikofen faroi, ḇo doḇo: “Inja aw, snon Yahudi, ḇesyaḇo wor war ro aya, bin Samaria?” (Snar kawasa Yahudi sikenemso Samariasya ḇa.)

¹⁰Yesus kyarem faroi: “Rofyor wafawi Allah fakamama ḇyedi ma mansei ḇeyor faro aw: Buk waroma yinem! Nari wor kwar roi fa ḇyuk kwar faro aw war ḇekenemya.”

¹¹Bin ani ikofen faroi, ḇo doḇo: “Manseren, wasma papos osoḇa ma war ḇeyer ine ikakibos; ro moḇ rosai wasma war ḇekenemya roya?

¹²Inja waba syadi ro kma nkoḇedi Yakub, ḇeḇuk war ḇeyer ine maro nko ma mankundi dakinem roi kako, kuker romawa ḇyesi ma rofanfan ḇyesi?”

¹³Yesus kyarem faroi: “Mansei ḇeyinem war ine, nari imbrow wer,

¹⁴ḇape mansei ḇeyinem ro war nari yaḇuk faroi, ipok imbrow wer ḇa isof fyoro. Isyadi wer war nari yaḇuk faroi, nari ḇyewar ḇeryuḇer ro kankenem ḇyedi, ma isof kankenem ḇekain fyoroya.”

¹⁵Bin ani ikofen faroi, ḇo doḇo: “Manseren, bukma ḇe aya war ani, insa yambrow werḇa ma yarama yukeḇ war ro dine werḇa.”

¹⁶Yesus kyarem faroi: “Rwamura, wor swambri ḇo mukaḇer muma rodine.”

¹⁷Bin ani ikofen faroi ḇo doḇo: “Ayama yana swa osoḇa.” Yesus ikofen faroi: “Wos bedi kyakubos beri, mboi wasma swayoḇa,

¹⁸snar nwa swari rim kwar ma ḇeroyus aw ro baboine, ikada swabediryaḇa.”

¹⁹Bin ani ikofen faroi, ḇo doḇo: “Manseren, insape yafawi aw nabi oso.

²⁰Kpu nkoḇesi sisyom Allah ro bon ine bori, ḇape er besi sikofen ḇo soḇo, kosyom Allah monda ro Yerusalem.”

²¹Yesus ikofen faroi: “Bin awne wakyar faro aya, fafisuya nari ryama, mboi nari mkosyom Allah ro bon ineḇa, ma ro Yerusalemḇa kako.

²²Mkosyom rosai mkomam ḇaḇirḇa, nkokada nkosyom rosai nkomam ḇaḇir, snar korerya ryama ro er Yahudi.

²³Ḇape fafisuya nari ryama ma ryama kwar, mboi ḇesyom kuker napnapes nari siyom Kmaya kuker Rur ma napnapes; snar Kmaya imarisen samsyom ḇerarirya.

²⁴Allah Rur rirya ma mansei ḇesyomi nari, sisyomi kuker Rur ma napnapes.”

²⁵Bin ani kyarem faroi, ḇo doḇo: “Yafawi, nari Wairek ryama, sniri kako ḇe Kristus; rofyor ryama kwar, nari ḇyaryas roi ḇeḇor nanekam maro nko.”

²⁶Yesus ikofen faroi: “Aya iso wawos kukerya.”

²⁷Rofyor ani manfamyan ḇyesi srama ma sikandor, mboi isya dawawos kuker bin oso. Ḇape oso rofandusi ifuken ḇaḇeri faro bin ani: “Rosai wamarisenya? Roḇaido: Ḇefuken Yesus, snaro wawawos kuker bin ani?”

²⁸Rarirya bin ani ibur babewu ḇyedi rodia ma ryaḇe mnu ma ikofen faro snonkaku ḇero mnuya ansi:

²⁹“Mkorama, mkakmam snonkaku oser isya ikofen ḇadir faro aya ro roi ḇeḇor yafrur kwar nakam. Imbude Kristus iryake?”

³⁰Inja snonkakusya sisasyarbur mnu ani fa sisrow Yesus.

³¹Ro fafisu ani manfamyan ḇyesi sidifi, ḇo soḇo: “Guru, wanan.”

³²Ḇape ikofen farosi: “Faro aya roḇean naisya mkomambaḇir naba.”

³³Inja manfamyan ansi sawos yaye farosi: “Imbude snonkaku ono sun roḇean ono fa dan kwarke?”

³⁴Yesus ikofen farosi: “Roḇean ayena isoine yafrur marisen ḇewan ayanya ma yaḇeimnis fararur ḇyuk ḇe ayanya.

³⁵Mboi mkokofen ḇo mkoḇo: Paik rifiak wer fafisu afufyake? Ḇape yakofen faro mko: Mkomam kada yaf na nambrai kwar fa neḇeyuf.

³⁶Snonkaku ḇeyufsya sisma sasuref sedi kwar ma sfanjur bon faro kankenem ḇekain fyoroya, isof ḇekekef ma ḇeyufsya sikam simarisen.

³⁷Wos sarḇer ine kyaku isoine: Ono sḇuḇer mboi ono ḇese suf.

³⁸Yawan mko fa mkuf roi mkoker ḇa; snonkaku ḇese sesasewar mboi mkorama mkuf bon ro sasewar sena.”

³⁹Ma kawasa Samaria sibor ro mnu ani sikyar kwar faroi snar bin ani wos ḇyena, ḇeḇesaksi: “Ikofen ḇadir faro aya roi ḇeḇor yafrur kwar nakam.”

⁴⁰Fafisu snonkaku Samaria ansi srafa sisrow Yesus, sor faroi insa ryowus si; ma ryowus si rodia ḇe ras risuru.

⁴¹Ma snonkaku sibor syadi wer ḇekyar snar wos ḇyena,

⁴²ma sikofen faro bin ani: “Nkokyar, snar wos ḇena wer ḇa mboi snar mankun inko, nkomnaf kwar roi ma nkofawi, mboi kaku ḇeri i ḇeḇuk koreri faro supswan ine.”

⁴³Ma ras risuru susyonde ro Sikhar, Yesus ryaḇe Galilea,

⁴⁴snar Yesus mankundi myam kwar, mboi nabi oso sesyowi i ḇa ro mankundi mnu ḇyedi.

⁴⁵Ma rofyor ryama kwar ro Galilea, kawasa Galilea siwafi, snar smam roi ḇeḇor kam ifrur kwar ro Yerusalem ro munara ani, snar sikako sakso munara ani.

⁴⁶Inja Yesus kyaḇer wer ḇe Kana ro Galilea, ro moḇ ifrur warna fa neanggur ani. Ma ro Kapernaum manfyan wairek oso romawa ḇyedi iduf.

⁴⁷Fafisu imnaf, mboi Yesus ryama ker Yudea kwar ro Galilea, rya isrowi ma dor, insa ryama ma ḇyuk pararei faro romawa ḇyedi, snar romawa ḇyedi iduf marḇak.

⁴⁸Inja Yesus ikofen faroi: “Rofyor mkomam aḇyair kanandor ḇa, nari mkokyarḇa.”

⁴⁹Manfyan warek ani ikofen faroi, ḇo doḇo: “Manseren, rwama rofyor romawa ayedi imar ḇaim kada.”

⁵⁰Yesus ikofen faroi: “Rwamura, romawa bani ikenem!” Snon ani ikyar wos Yesus ikofen faroi ani, inja ryaḇeri.

⁵¹Fafisu isya kaker ro nyanya faduri manfyan ḇyesi srama sisrowi ma sikofen faroi, mboi romawa ḇyedi iprei.

⁵²Ikofen farosi oras rifis romawa ani ipreiya. Skarem faroi, ḇo soḇo: “Mandoḇinja orkokya oras oser samsam ḇyedi imnai.”

⁵³Rarirya sinan ani iswarepen, mboi rofafisu aniso Yesus ikofen faroi: “Romawa bani iprei.” Rarirya i kuker kina ḇyesi sikyar faro Yesus.

⁵⁴Ine aḇyair kanandor ḇeḇesuru Yesus ifrur ro fafisu iburker Yudea ḇe Galilea.