Read Biak YOHANES 5 Bible Online

YOHANES 5 - Biak bible

YOHANES 5

¹Raimnai Yahudisya ras ḇeba sedi fyanam, inja Yesus dekḇe Yerusalem.

²Ro Yerusalem fanam “Kedwai Ḇeba Domba” sawon oso isya, ro wos Ibrani sniriḇe Betesda; ḇye aḇdares ririm

³ma ro abdares anna kawasa ḇeduf sibor kaku sḇarek ro na: isoine snonkaku ḇepraf, ḇeyapaper ma snonkaku ḇepapipen, ḇewaf sawon ani irḇaren.

⁴Snar rofafisu ono Manseren malaikat ḇyedi dado ro sawon ani fa irḇaren war ani; ma mansei ḇesabu ḇepon ro war ani ro fafisu irḇaren kwarya, ikada iprei ro dafduf rosairya wer.

⁵Rodia snon oso isya iduf ḇewampasi wambarek samfur rikior seser war kwar.

⁶Rofyor Yesus myam snon ani ḇyarek rodia ma snar Yesus ifawi, mboi iduf fyoro kwar, inja Yesus ifuken faroi: “Wamarisen fa wapreike?”

⁷Snon ḇeduf ani ikofen faroi, ḇo doḇo: “Manseren, yana snonkakuyo rodineḇa fa ḇesabu aya ḇe sawon ani rofyor warya irḇarenya, ma rofyor yara ḇe sawon ani, snonkaku ḇese sisabu ḇepon aya kwar.”

⁸Yesus ikofen faroi: “Wakḇoke, wakanow yar ḇena ma wambrane.”

⁹Ma rofafisu ani beri snon ani iprei inja ikanow yar ḇyena ma imbrane. Fafisu ani ras Mananai Yahudi rirya.

¹⁰Inja snonkaku Yahudisya sikofen faro snon ḇeprei babo ani: “Ras ine ras Mananai Yahudi inja wapok ḇar yar benaḇa.”

¹¹Ḇape kyarem farosi, ḇo doḇo: “Snonkaku ḇeḇuk pararei maro aya kwarya, iso ḇekofen maro aya: wakanow yar ḇena ḇo wambrane.”

¹²Sifuken faroi, ḇo soḇo: “Snon manseiso ḇekofen faro aw: Wakanow yar ḇena ma wambranya?”

¹³Ḇape snon ḇeprei babo ani ifawi mansei ḇeḇesyan yaba, snar Yesus syun ro fadu snonkaku ḇeḇor ro mob ani.

¹⁴Ḇarpurya Yesus isrowi ro Allah Rum ḇyedi dori inja ikofen faroi: “Waprei kwar; wafrur sasar wer awer, imbude roi ḇeḇyeḇa syadi nkur aw wer ri.”

¹⁵Snon ani isasyar ma fyar faro kawasa Yahudisya, mboi Yesus iso ḇeḇuk pararei faroi kwarya.

¹⁶Ma eḇedari kawasa Yahudisya sesasewar fa siḇe sewayam Yesus, snar ifrur roi ḇeḇor anna ro ras Mananai Yahudi.

¹⁷Ḇape ikofen farosi: “Mami ifararur isof ras ine, inja aya kako yakfararur.”

¹⁸Inja kawasa Yahudisya sesasewar syadi wer insa smuni, snar ifararur ro ras Mananai Yahudiya derer ḇa, ḇape snar dap Allah ḇe kma ḇyedi, rarirya dow mankundi fa imnis kuker Allah.

¹⁹Inja Yesus kyarem farosi: “Kaku ḇeri yakofen faro mko, Rumkunya nari ifrur royo ro mankundi ḇa, ikada ifrur monda rosai myam ro Kmari ifrur na; snar rosai Kmaya ifrurna, naiso Rumkunya dakfrurna.

²⁰Snar Kmaya iswar Rumkunya inja fyasna faroi roi ḇeḇor kam ifrur ro mankundi, mboi nari fyasna faroi fararur-fararur ḇeba syadi wer ro fararur-fararur anna, isof mkokandor.

²¹Snar imnis raris Kmaya ḇyawes snonkaku ḇemarsya ma ḇyuk fa sikenem, rarirya kako Rumkunya dakḇuk kankenem faro mansei imarisenya.

²²Kmaya ḇyemankara oso ḇaḇeri, mboi ḇyuk kwar ḇaḇemankara ani ḇesiper faro Rumkunya,

²³insa kawasa kam sesyowi Rumkunya imnis raris moḇ sesyowi faro Kmaya. Mansei ḇeḇesyowi Rumkunya ḇa, ikako ḇyesyowi Kma ḇewani yaḇa.

²⁴Yakofen faro mko: Kaku ḇeri mansei ḇerower wos ayena ma ikyar faro ḇewan ayanya, isma kankenem ḇemnaiḇa ma dakso samamyaiya ḇa, snar ikfisbur marmarya kwar ḇe kankenemya.

²⁵Yakofen faro mko: Kaku ḇeri fafisuya nari isyama ma ryama kwar, mboi snonkaku ḇemarsya simnaf Allah Rumkun ḇyedi mkarenya, ma ḇemnafi sya, nari sikenem.

²⁶Snar imnis raris Mami isma kankenemya ro mankundi, rarirya ḇyuk faro Rumkunya fa daksma kankenemya ro mankundi kako.

²⁷Ma ḇyuk kwar papoik faroi fa ḇyuk mankara, snar i Rumkun Snonkaku rirya.

²⁸Mkokandor awer roi ḇeḇesya nane, snar fafisu ḇyedi nari ryama, mboi snonkaku ḇeḇor ḇero ureren na dona nari simnaf mkaren ḇyedi,

²⁹ ma faro ḇefrur mnis sya nari siḇersi ro ureren na faro kankenem ḇekain fyoroya, ḇape faro ḇeḇarḇorsya nari siḇersi fa sisma samamyai.”

³⁰“Mankundaya ḇardi yafrur royoḇa; yaḇe mankara imnis kuker rosai yamnaf na, ma ḇaḇemankara yena nanapes, snar yaso marisen ayena ḇa, mboi marisen ro Kma bewan ayanya.

³¹Rofyor yaḇe saksi ro roi ḇekur mankundaya, rarirya ḇaḇesaksi yena nanapesḇa;

³²ono ḇese sisya sesaksi ro roi ḇekur aya ma yafawi ḇaḇesaksi ssḇuk fa ḇekur aya mboi nanapes.

³³Mkofarem wawansya kwar faro Yohanes ma ḇyesaksi kwar ro nanapes;

³⁴ḇape yaḇefandun ḇaḇesaksi ro snonkakuḇa, mboi yakofen roi ḇeḇesya ani, insa mkosma koreri.

³⁵Yohanes imnis paramrom ḇesak ma ḇesnai ma mkokada mkomarisen knik monda sasnai ḇyedi.

³⁶Ḇape ḇaḇesaksi ayedi iba syadi ro ḇaḇesaksi Yohanes, isoine fararur ḇeḇor Mami ḇyuk maḇe Aya, insa yafrur na. Fararur ani kako iso yafrur kwar ine, ma iso ḇefasnai aya, mboi Mami iso ḇewan Aya.

³⁷Mami ḇewan Aya, iso ḇeḇuk saksi ro Aya. Mkopok mkomnaf mkaren ḇyediḇa, moḇ isnai raya kako mkopok fa mkomami ḇa,

³⁸ma wos ḇyena mkadu na ro mkosnemna ḇa, snar mkokyar faro wawan ani ḇa isoine ayaḇa.

³⁹Mkokukeḇ Refo, snar mkokara mkoḇe, mboi kuker i nari mkosma kankenem ḇemnaiḇa, ḇape Refoya ḇyuk ḇaḇesaksi ro Aya,

⁴⁰rarirya mkomewer mkorama faro aya fa mkosma kankenem ani.

⁴¹Yafandun ḇa kuker samsyom ro snonkaku.

⁴²Ḇape faro mko, yafawi mboi ro mkosnemna mkona saswar faro Allah ḇa.

⁴³Yarama kuker snonsnon ro Mami ḇape mkofandun ayaḇa; rofyor snonkaku ḇese srama kuker snonsnon sena, nari mkomarisen si.

⁴⁴Nari mkokyar rariso, ne, mko ḇesewar sanandik ro snonkaku ḇese ma ḇesewar syom ḇerama ker Allah oser bakenya ḇa?

⁴⁵Mkokara awer nari yaḇuk sof mko ro ḇarpon Mami; ḇeḇuksof faro mkoya iso Moses, mkokyar ani.

⁴⁶Snar rofyor mkokyar faro Moses, rarirya nari mkokyar faro Aya, snar roi fyasna nkur Aya.

⁴⁷Ḇape rofyor mkokyar roi fyasna ḇa rariso nari mkokyar rosai yakofen na?”