Read Biak YOHANES 6 Bible Online

YOHANES 6 - Biak bible

YOHANES 6

¹Raimnai Yesus imbran ḇe danosen Galilea ḇar iwara, isoine danosen Tiberias.

²Kawasa ḇeḇor semarani ḇo sisoi, snar smam aḇyair-aḇyair kanandor ḇeḇuk parare, ifrur faro snonkaku ḇedufsi.

³Ma Yesus dek urek oso ma kyain rodia kuker manfamyan ḇyesi.

⁴Ma Paskah, ras ḇeba kawasa Yahudi, fyanam kwar.

⁵Fafisu Yesus myam yaryari, myam snonkaku sibor semarani ḇo srama yoḇi, inja ikofen faro Filipus: “Romoḇ rosai nari kokoḇes mamami roya, insa kawasa sine san?”

⁶Yesus ikofen rarirya snar imarisen imnasen Filipus, snar mankundi ifawi kwar, rosai nari ifrurya.

⁷Filipus kyaren ḇo doḇo: “Mamami ḇeḇemaeja kumpan sarak utin risuru kakoyo, nari namnis farosi ḇa.”

⁸Snon oso ro manfamyan ḇyesi, isoine Andreas, Simon Petrus naek ḇyedi, ikofen faroi, ḇo doḇo:

⁹“Rodine romawa oso isya, nya mamami ririm ma in risuru; ḇape ndarirya ḇo nari namnis snonkaku ḇeḇor sine?”

¹⁰Yesus ikofen: “Mkowansi fa skain.” Ro moḇ ani aḇris sibor, inja snonkaku ansi skain, barbor sedi indokada snon syaran ririm.

¹¹Raimnai Yesus dun mamami anna, ma ikofen kasumasa faro Allah. Posa kwar ḇyerarwas na farosi, rarirya kako in ansuya, ma san rao isof sisyopen.

¹²Ma rofyor sarbor kwar ikofen faro manfamyan ḇyesi: “Mkoryur mamami kerker ḇesyadi na, insa sisawen awer na.”

¹³Inja siryur inoken samfur seser risuru nafo kuker roḇean ḇesyadi ro mamami ririm snonkaku ḇeḇor ansi san na.

¹⁴Fafisu snonkaku ansi smam aḇyair kanandor ifrur kwar ani, sikofen ḇo soḇo: “Kaku ḇeri inekada nabi nari ḇerama ḇe supswan ine.”

¹⁵Snar Yesus ifawi, siḇe srama fa sidifi insa ḇye wairek farosi. Inja isusu bursi ḇe urek.

¹⁶Ma fafisu fyanam roḇ kwar, Yesus manfamyan ḇyesi sraḇe danosen, ma sek ro wai

¹⁷ma sunuk ḇe Kapernaum. Fafisu pyampan kwar Yesus ryama ḇaim kaker fa isrowsi,

¹⁸mboi sorenya ikroḇ snar wamya ipok.

¹⁹Skoḇores indokada kilometer risuru kior kwar, skomam Yesus imbran ro warya bori muma fanam wai ani. Inja skomkak kaku.

²⁰Ḇape ikofen farosi: “Aya irya, mkomkak awer!”

²¹Simarisen fa dek ro waiya, ma rofafisu ani beri kako wai ani ifyafer ro moḇ skorayoḇya.

²²Ro meserdi kawasa ḇeḇor ḇekain ro danosenya ḇar iwara ansi, sifawi insanja wai oser monda rodia ma Yesus iso manfamyan ḇyesi ḇa, ḇoi serer siso ḇesyoḇsya.

²³Ḇape rofafisu ani wai ono ndama ker Tiberias napyar fanam moḇ san mamami ro ani, posa ro Yesus ikofen kasumasa kuker roḇean anna.

²⁴Fafisu kawasa ḇeḇor ansi smam, mboi Yesus isya ro diaḇa ma manfamyan ḇyesi kako roḇa, sek ro wai anyaḇo sisyoḇ ḇe Kapernaum fa ssewar Yesus.

²⁵Fafisu kawasa ḇeḇor ansi sisrow Yesus ro danosenya ḇar iwara, sikofen faroi, ḇo soḇo: “Rabi, fafisu rosai rwama ro dineya?”

²⁶Yesus kyarem farosi: “Kaku ḇeri yakofen faro mko, mkosewar aya, snar mkomam aḇyair kanandor yafrur naba ḇoi snar mkan mamami rao mkosyopen.

²⁷Mkofararur, faro roḇean nari ḇero na awer, mboi faro roḇean ḇekain fyoro faro kenkenem ḇemnai ḇaya kada, nari Rumkun Snonkaku ḇyuk faro mko; snar iso Mami ḇyeasas kwar, isoine Allah.”

²⁸Raimnai sikofen faroi, ḇo soḇo: “Rosaiso nari nkofrurya, insa nkofrur Allah roi imarisen na?”

²⁹Yesus kyarem farosi: “Allah fararur imarisenya, isoine iḇye syadi mkokyar faro Allah wawan iwan kwarya.”

³⁰Inja sikofen faroi, ḇo soḇo: “Aḇyair rosai wafrurya, insa nkomami ma nkokyar faro au? Fararur rosai nari wafrurya?

³¹Kpu nkoḇesi san manna kwar ro sup ḇeḇeursḇa, imnis fasfas oso isya ro Refo: ssḇuk farosi fa san mamami ḇeraker boiyaswa.”

³²Inja Yesus ikofen farosi: “Kaku ḇeri yakofen faro mko, Moses i ḇeḇuk mamami faro mko ro boiyaswa yaḇa, mboi Kma yedi ḇeḇuk faro mko mamami ḇekaku ro boiyaswa.

³³Snar mamami ḇeraker Allah irya mamami ḇesabu ro boiyaswa ma ḇeḇuk kankenem faro supswan.”

³⁴Inja sikofen faroi, ḇo soḇo: “Manseren, buk maḇe nko ḇesya kwar mamami ani.”

³⁵Yesus ikofen farosi: “Aya ine mamami ḇeḇuk kankenem; mansei ḇerama faro aya, nari ipok ibiser werḇa, ma mansei ḇekyar faro aya, ipok imbruw werḇa.

³⁶Ḇape yakofen faro mko kwar: Kaku ḇeri mkomam aya kwar, ḇape mkokyar ḇa.

³⁷Roi ḇeḇor kam Mami ḇyuk faro aya, nakam nari ndama faro aya, ma mansei nari ḇerama faro aya, nari yasaweni ḇa.

³⁸Snar ayai ḇesabu kwar ro boiyaswa, insa yafrur marisen ayena ḇa, ḇape yaḇeuser Allah marisen ḇyena ḇewan aya kwar.

³⁹Ma Allah ḇewan aya marisen ḇyedi, isoine insa snonkaku ḇeḇor kam ḇyuk faro aya kwar ono sro awer, ḇape insa yaḇawes si wer ro ras ḇepupesya.

⁴⁰Snar Mami marisen ḇyedi ryadine, isoine insa snonkaku oser-oser ḇemam Rumkunya, ma ḇekyar faroi, sisma kankenem ḇekain fyoro, ma insa yaḇawes si ro ras ḇepupesya.”

⁴¹Inja kawasa Yahudisya suremi snar ikofen kwar: “Aya ine mamami ḇesabu ro boiyaswa.”

⁴²Sikofen, ḇo soḇo: “Mboi inenido Yesus iryake, Yusuf mandaḇendi, snar kma ma sna ḇyesu kofawi su? Rariso ikofen, ḇo doḇo: Aya ine yasabu ker boiyaswa?”

⁴³Yesus kyarem farosi: “Mkurem awer.

⁴⁴Snonkaku oso ḇaḇeri nari ryama faro aya, rofyor Mami ḇewan aya duni maro aya, ma nari yaḇawesi ro ras papupesya.

⁴⁵Fasfas isya ro syap nabi-nabi ḇerok radine: Ma sikam nari Allah fyarkorsi. Ma snonkaku oser-oser ḇemnaf kwar, ma ḇemarisen farkarkor ro Mami, srama faro aya.

⁴⁶Fasfas ani ikofen ḇa mboi ono sisya smam Mami. Demir i ḇerama ro Allah, iso ḇemam kwar Kmari.

⁴⁷Yakofen faro mko: Kaku ḇeri mansei ḇekyarya, isma kankenem ḇekain fyoroya.

⁴⁸Aya ine kada mamami ḇeḇuk kankenemya.

⁴⁹Kpu mkoḇesi san kwar manna ro sup ḇeursḇa ma simar kwar.

⁵⁰Ine mamami ḇesabu ro boiyaswa: Mansei ḇeyan mamami ine ido, ikada nari imar ḇa.

⁵¹Aya ine mamami ḇekenem ḇesabu kwar ro boiyaswa. Rofyor oso dan ro mamami ine ido, ikada ikenem fyoro-fyoro ma mamami yaḇuk ani irya kraf ayedi, yaḇuk faro kankenem supswan.”

⁵²Kawasa Yahudi sfamfaḇri rofandu mankunsi ma sikofen: “Rariso nari ḇyuk kraf ḇyedi fa ḇyeroḇean fa kani?”

⁵³Inja Yesus ikofen farosi: “Kaku ḇeri yakofen faro mko rofyor mkan kraf Rumkun Snonkakuya ḇa ma mkinem rik ḇyedi ḇa, nari mkosma kankenemya ro mankun mko ḇa.

⁵⁴Mansei ḇeyan kraf ayedi ma ḇeyinem rik ayedi, ikada isma kankenem ḇekain fyoro ma nari yaḇuk fa diḇri ro awar ḇepupesya.

⁵⁵Snar kraf ayedi irya roḇean ḇekaku ma rik ayedi aninem ḇekaku.

⁵⁶Mansei ḇeyan kraf ayedi ma ḇeyinem ro rik ayadi kada ḇyeoser kuker aya ma yaḇe oser kukeri.

⁵⁷Imnis raris Mami ḇekenem ḇewan aya ma yakenem snar Mami, rarirya kako mansei ḇeyan aya, nari ikenem snar aya.

⁵⁸Ine kada mamami ḇesabu kwar ro boiyaswa, mamami ḇemnis kuker mamami kpu mkoḇesi san raimnai simar kwar aniḇa. Mansei ḇeyan mamami ine ikada isma kankenem fyoro-fyoroya.”

⁵⁹Roi ḇeḇor nanekam Yesus ikofen na ro Kapernaum rofyor ḇyuk farkarkor ro Rum nadi.

⁶⁰Rofyor simnaf wos anna kam sibor ro manfamyan Yesus ḇyesi sikofen, ḇo soḇo: “Wos nane npakrek, mansei nari ḇekḇaḇ ḇemnaf naya?”

⁶¹Yesus ifawi, mboi manfamyan ḇyesi sisurem snar wos anna, ikofen farosi: “Inja wos anna neḇirḇar kakyar mkoḇena?

⁶²Ma rariso rofyor mkomam Rumkun Snonkakuya dekḇe moḇ randakya isya roya?

⁶³Rurya iso ḇeḇuk kankenem, krafya ḇyefainda oso ḇaḇeri. Wos yawos faro mko nane irya Rur ma kankenem.

⁶⁴Ḇape rofandu mko ono sisya sikyarḇa.” Snar Yesus ifawi ro randakya, mansei ḇekyarḇa ma mansei nari ḇeḇoḇiya.

⁶⁵Raimnai ikofen: “Eḇedari yakofen faro mko: Snonkaku oseroḇaḇeri nari ryama faro aya ido, Mami nari ḇyuk na faroi ḇa.”

⁶⁶Randak ro ras ani manfamyan ḇyesi sisusu buri ma sisoi werḇa.

⁶⁷Inja Yesus ikofen faro manfamyan samfur seser risuru ḇyesi: “Inja mko kako mkomarisen mkobur ayake?”

⁶⁸Simon Petrus kyarem faroi, ḇo doḇo: “Manseren, faro mansei nari nkobur faroya? Manseren wos ḇena nbuk kankenem ḇekain fyoro;

⁶⁹ma nkokyar kwar ma nkofawi au Manseren wawan ḇesren ro Allah.”

⁷⁰Yesus kyarem farosi: “Mboi aya iso ḇekinfir mko snon samfur seser risuru ine? Mboi oso rofandu mko ḇyeibiris.”

⁷¹Ikofen fa kyurya isoine Yudas, Simon Iskariot mandaḇendi; snar iso nari ḇeḇoḇ Yesus, oso ro fandu manfamyan samfur seser risuru ansi.