Read Biak YOHANES 9 Bible Online

YOHANES 9 - Biak bible

YOHANES 9

¹Rofyor Yesus imbranuk, myam snon ḇepraf oso ro fafisu ḇyeḇeaḇenya.

²Manfamyan ḇyesi sifuken faroi, ḇo soḇo: “Guru, snaro snon ine ipraf rofyor ḇyeḇeaḇenya, snar mankundi sasar ḇyena roḇa ido snari ma kmari sasar suḇenake?”

³Yesus kyarem: “Snon ine sasar ḇyenaḇa ma sinan ḇyesuyaḇa kako, ḇape snar fararur-fararur Allah nari neḇefasna roi.

⁴Nari kofrur ḇewan ayanya fararur ḇyena rofyor isnaya isya kaker; mboi roḇya ryama, snonkaku oso ipok ifararur werḇa.

⁵Fyor aya isya ro supswan ine, aya ine isna supswan ine.”

⁶Rofyor ikofen wos nane kam kwar, ininef ḇe sapropya, ma irḇaren aninef ḇyena ro sapropya, raimnai ipyos na ro snon ḇepraf ani mkamor ḇyesuya

⁷ma ikofen faroi: “Rwamura, ban mkamsu ro sawon Siloam.” Siloam isoine: “Manwawan”. Inja snon ani rya ḇyan mkamor ḇyesuya, raimnai kyaḇer muma ma myam kwar.

⁸Ḇape min ḇyesi ma ḇese ḇefawi i ḇefararyor ani, inja soḇo: “Inja snon ḇefararyor ani iso ineke?”

⁹Ono ḇese sikofen, ḇo soḇo: “Kaku, irya ḇaḇoi.” Ono ḇese wer sikofen, ḇo soḇo: “Isyaḇa ḇoi, imnisbos kakui.” Snon ani mankundi ikofen, ḇo doḇo: “Kaku aya irya.”

¹⁰Sikofen faroi, ḇo soḇo: “Rariso mkamsu suḇas wer?”

¹¹Kyarem, ḇo doḇo: “Snonkaku ḇenirḇe Yesus irḇaren saprop na ma ḇyuki isfu mkamor ayesuya ma ikofen maro aya: ‘Rwamura ma ban mkamor besuya ro sawon Siloam. Inja yara, ma rofyor yaḇan mkamor ayesuya, ma yamam beri.’ ”

¹²Raimnai sikofen faroi, ḇo soḇo: “Snon ani isyaro?” Kyarem farosi, ḇo doḇo: “Yafawiḇa.”

¹³Raimnai ssun snon ḇepraf ani faro kawasa Farisisya.

¹⁴Ras Yesus irḇaren sapropya ma aninef fa ḇyuki isfu snon ani mkamor ḇyesuya, irya ras Mananai Yahudi rirya.

¹⁵Eḇedari kawasa Farisi ansi sifuken faroi, rariso mkamor besuya suḇas wer. Kyarem, ḇo doḇo: “Isfu saprop irḇaren kwar ro mkamor ayesuya, raimnai yaḇan mkamor ayesuya ma insape yamam.”

¹⁶Ma ono ro Farisi ansi sikofen, ḇo soḇo: “Snon ine ḇyeknam ro Allah ḇa, snar ḇyefandun ras Mananai Yahudiya ḇa.” Ono kada sobo: “Rariso snon ḇesasar oso ipok ifrur aḇyair kanandor radine?” Rarirya sfamfaḇri ro fandusi.

¹⁷Raimnai sikofen wer faro snon ḇepraf ani, ḇo soḇo: “Mboi awne ido, rosai wakofen roi, snar ifrur mkamor ḇesuya fa mam kwar?” Kyarem farosi, ḇo doḇo: “Inido nabi rirya.”

¹⁸Ḇape kawasa Yahudi ansi sikyarḇa, snon ani insandi ipraf ma myam wer, isof sor sinan ḇyesuya

¹⁹ma sifuken su, ḇo soḇo: “Romawa muḇedisine, iso mukofen, ḇo muyoḇo, ipraf ro ḇyeḇeaḇenya? Rariryaido, rariso knikine myam wer?”

²⁰Sinan ansu sukarem, ḇo suyoḇo: “Roi nufawiya isoine, mboi i romawa nuḇedirya ma fafisu ḇyeḇeaḇenya ipraf.

²¹Ḇape rariso knikine myam werya, nufawiḇa, ma mansei ḇeḇas mkamor ḇyesuya, nufawiḇa kako. Mkofuken ro mankundi, snar ḇyesnonkbor kwar, ifawi kyarem ro mankundi.”

²²Sinan ḇyansu suwos rarirya snar sumkak kawasa Yahudisya, snar kawasa Yahudisya sna sne oser kwar, mboi snonkaku mansei ḇekaremi ḇe Wairek, nari spampumi.

²³Eḇedari sinan ḇyesu sukofen, ḇo suyoḇo: “Ḇyesnonkbor kwar, inja mkofuken faro mankundi.”

²⁴Raimnai sorḇe oser wer snon insanja ḇepraf ani ma sikofen faroi: “Wawos kuker napnapes ro ḇarpon Allah; nkofawi mboi snon ani snon ḇesasar.”

²⁵Kyarem farosi, ḇo doḇo: “Snon ani snon ḇesasar rirya, yafawiḇa; ḇape roi oser yafawiya, mboi isoine insandi yapraf ma knikine yamam wer.”

²⁶Sikofen faroi, ḇo soḇo: “Rosai ifrur faro aw? Rariso ḇyuk mkamor besuya fa suḇas wer?”

²⁷Kyarem farosi, ḇo doḇo: “Yakofen faro mko kwar, ma mkomnafḇa; snaro mkomarisen mko mnaf wer? Imbude mkomarisen mkakḇe manfamyan faroi kako?”

²⁸Rarirya skoryaei ḇo sikofen faroi: “Awkada ḇe manfamyan faro snon ani mboi nkokada manfamyan ro Moses.

²⁹Nkofawi, mboi Allah iwawos faro Moses, ḇape faroi nkofawiḇa moḇsai ryama roya.”

³⁰Snon ani kyarem farosi, ḇo doḇo: “Kokandor kaku snar mkofawi moḇ ryamuma royaḇa, ḇape ḇyas mkamor ayesuya kwar fa yamam wer.

³¹Kofawi, mboi Allah imnaf snonkaku ḇesasarsya ḇa, mboi snonkaku ḇesren ma ḇeḇeuser marisen ḇyedi.

³²Ro ḇepon isof babo ine komnaf ḇaḇeri, mboi snonkaku oso isya ḇyas mkamor snonkaku ḇepraf ro fafisu ḇyeḇeaḇenya ḇaim.

³³Rofyor snonkaku ani ryamuma ro Allah ḇa, ipok ifrur royoḇa.”

³⁴Skarem faroi, ḇo soḇo: “Aw ine beḇeaḇen ro sasar ḇesyaḇo woḇe farkor nko?” Raimnai siyawi ḇe ḇondibur rum nadi.

³⁵Yesus imnaf mboi siyawi kwar ḇeḇondi. Ḇarpurya isrowi ma ikofen: “Wakyar faro Rumkun Snonkakuyake?”

³⁶Kyarem ḇo doḇo: “Manseren manseirya? Insa yakyar faroi.”

³⁷Yesus ikofen faroi: “Aw mami mondaḇa; ḇape iso ḇeyawawos faro aw ine!”

³⁸Ikofen ḇo doḇo: “Manseren yakyar!” Raimnai ḇyan suba ro ḇarpon ḇyedi.

³⁹Yesus ikofen: “Yarama ḇe supswan ine insa yaḇe mankara, insa mansei ḇemamba smame, ma mansei ḇemamsya siprafe.”

⁴⁰Wos anna Farisi ono sakmnaf na, inja sikofen faroi, ḇo soḇo: “Inja woḇe nkokako nkoprafke?”

⁴¹Yesus ikofen farosi: “Mboi mkopraf kada, mkoḇe sasarḇa, ḇape snar mkoḇo: Nko kada nkomam, rarirya sasar mkoḇena naisya faswef.”