Read Biak YUDAS 1 Bible Online

YUDAS 1 - Biak bible

YUDAS 1

¹Naek srar ḇesma fararyor kwar ro Allah Kmaya, iswar kaku ma mkoḇeḇewaren faro Yesus Kristus. Aya — Yudas — naek ro Yakobus, ḇeḇemanwawan ro Yesus Kristus;

²yakyar Allah ḇyeḇok mko ma ḇyuk ḇemko ḇaḇye ma aski nabor kada.

³Naek srar yaswar kaku! Kaku ḇeri yakara yafas syap faro mko ro ḇaḇeaski kokam kofawi kwar ani. Ḇape baboine yaḇaḇir yasma dafdif fayaḇuk ananun faro mko kuker syap ine insa mkofaḇri ro Allah kakyar ḇyuk ḇeoser kwar monda isof fyoro-fyoro faro kawasa ḇyesi.

⁴Snar fawawi ḇa, mboi snonkaku ono sisya ssun yokef rofandu mko. Si snonkaku ḇeḇarḇor ḇeḇeninyan ḇaryas ro Allah koḇedi ḇaḇye ḇyena fasḇuk ifrur nafsu-rmomen sena. Ma sfamyunepen Yesus Kristus, Manpapoik oser monda isoine Manseren koḇedi. Ro awar ḇeponya samamyai sedi ḇyeḇeḇaryas ro Refo kwar.

⁵Nane kam mkofawina kwar. Mboi yamarisen yaḇuk swarepen faro mko rariso Manseren ḇyuk aski faro Israelsya ro sup Masir, ḇape ḇarpurya myun ḇekyar ḇa sya.

⁶Mkoswarepen malaikat-malaikat ḇeyunuk yawek papoik sedi, isof sisasyarbur moḇ kankain sena. Malaikat ansi Allah ḇyewanka si kuker wanka ḇekain fyoro ro moḇ ḇepampan. Ro diwa sidwarek pdef si isof ssḇuk samamyai faro si ro Ras ḇebaya.

⁷Mkoswarepen kako mnu Sodom ma Gomora fnoḇek mnumnu ḇefanami na, kawasa ḇekain ro mnu anna sakfrur roi ḇarḇor imnis malaikat ansi sifrur na. Sifrur farḇuk ma ḇarḇor, isof sisma kandera kuker samamyai ro for ḇekain fyoro, insa neswarapepen faro kawasasya kam.

⁸Rarirya kako kawasa ḇemafu isof sifrur mamas faro baken mankunsi sena. Smam kyof Allah papoik ḇyena ma sonef roi ḇekenem ḇepyum ro boiyaswa.

⁹Mikhael mankundi ḇeḇeḇru ro malaikatsya, rofyor fyamfaḇri ryakrakrok kuker Ibiris ro mansei nari ḇesrow Moses kekḇa ḇyedi, Mikhael ipok ḇyemankara faro Ibiris kuker wos anonef ḇa. Mikhael ikofen monda, “Manseren nari isonek aw!”

¹⁰Ḇape snonkaku ansi sisampum ma sonef roi ḇeḇor sifawi ḇana. Sikada simnis raris aiwan ḇena swaruser ḇa, ma ḇefawi roi ḇeḇor kuker kakara sena. Ḇape snar roi ḇeradine nafrur farmambriwer si.

¹¹Raro faro si, snar siso Kain nyan ḇyena. Insa sisma pipi, simbran nyan ḇeḇor imnis raris Bileam. Ma si kako sroe snar sisampum imnis raris Korakh.

¹²Rofyor mkofrur munara nanan, snonkaku ansi sifrur mamas rofandu mko, snar simai ḇa sanan kuker masaḇsoḇ, ma sfandun mankunsi monda. Sikada simnis mandep wamya iwufpum, ḇape ssḇuk mekem ḇa. Sikada simnis ai knam ḇemarem ḇa rofyor mamaremya; ai knam spas rares na kwar inja nmasbos kaku.

¹³Simnis raris risen ḇekaḇaḇus ḇemun ro soren, rarirya kako sḇayorem fararur ḇeḇyeḇa sena ḇefrur mamyai. Sikada simnis kumsya ḇewayan mura-muma ma Allah fyasos moḇ ḇepampan syadi ḇekain fyoro faro si kwar.

¹⁴Henokh, ḇeḇeḇarpur ro Adam ro syos ḇeḇefikya, ḇyaryar snonkaku sine ro ḇepon kwar ḇo doḇo, “Mkomam, Manseren nari ryama kuker malaikat syaran-syaran ḇesren ḇyesya,

¹⁵fasḇuk kakara faro snonkaku kam. Manseren nari ḇyuk samamyai faro fararur ḇeḇarḇor ro ḇefawi i ḇasya. Ma nari ḇyuk samamyai kako faro wos anonef ro kawasa ḇesasar ma ḇeḇeankarkar sikofen faro i kwar.”

¹⁶Snonkaku ansi sisurem ma sfafayaf ḇesya kwar. Sikenem imnis marisen-rmomen ḇesasar sena. Sisandik mankun si, ma skara snonkaku nari sisma fainda rosya.

¹⁷Ḇape naek srar yesi mko, mkoswarepen rosai Manseren koḇedi Yesus Kristus manwawan ḇyesi sikofen ro ḇepon kwar.

¹⁸Sikofen ḇadir ḇepon faro mko kwar, mboi kowaf Ras Ḇepupesya, nari snonkaku ḇeyonef mko sikḇawes isoine snonkaku ḇekenem imnis marisen nafsu-rmomen ḇarḇor sena.

¹⁹Sikada snonkaku ḇefrur anun ḇesisya ma sisma papoik ro rarmomen rari supswan. Sikada snonkaku ḇena Allah Rur ḇyedi ḇa.

²⁰Ḇape mko kam, naek srar ayesi, mko kada mkokfin mankun mko ro kankenem kakyarya kada; kakyar mkoḇena nasren kaku; ma mkonadi kuker papoik Allah Rur ḇyedi,

²¹ma mkokenem ḇesya kwar ro fadadiren Allah saswar ḇyedi rofyor mkowaf ḇaḇye ro Manseren koḇedi Yesus Kristus, nari ḇeḇuk kankenem ḇekaku ḇekain fyoroya faro mko.

²²Faro snonkaku ḇeḇeḇirḇarsya mkofasna mkoswar si kada.

²³Mkosmer sibur for insa sisma aski. Faro ḇesesya iḇye mkofasna saswar kuker makakak, ḇape mkayin mar sena ḇemamas kuker nafsu-rmomen ḇesasar sena.

²⁴Allah, ḇesma papoikya i waren insa mkosapi ḇa, ma papoik ani ḇeyun mko ḇeḇarpon baba ḇyedi kuker raryaḇ ḇefarorew ḇa,

²⁵ikada Allah oser monda Ḇeḇuk koreri faro ko ro Yesus Kristus Manseren koḇedi. Ikada Allah ḇepyum, ḇeba, ḇesma papoik ma samambraḇ ro awar ḇepon isof baboine ma fyoroya! Amin.