Read Biatah Bidayuh TIBIRIK 1 Bible Online

TIBIRIK 1 - Biatah Bidayuh bible

TIBIRIK 1

¹Di sibungas-i di tika Tapa napa rangit ngga ong,[1]

²ong ati dŭh biyŭn gayŭn ka puno ngga karŭm patŭ', ka Roh Tapa[2] ngukap di tunduh piin.

³ Ka Tapa nang, “Isa-i agi jawa,” ka jawa sawŭ agi.

⁴Ka Tapa kiris jawa anŭ kana, ka Tapa kutung jawa so karŭm.

⁵Ka Tapa kadŭn jawa “Sandu” ka karŭm, “Singarŭm.” Singumi andu ripuan ka isan isan nusak, ka-i dog kadŭn andu adi ndi.

⁶ Ka Tapa nang, “Isa-i kayuh adi mun sakŭb agi adi kutung piin bada sidŭrŭ duwŭh yŭn,” ka-i sawŭ agi. Sawŭ meh Tapa napa kayuh mun sakŭb adi nyidŭrŭ piin adi di ribo-i, so piin adi di sambu-i.

⁸Ka Tapa kadŭn sakŭb anŭ “Rangit.” Singumi andu ripuan, ka isan isan nusak, ka anŭ inŭh andu adi duwŭh.

⁹Ka Tapa nang, “Isa-i piin adi di ribo rangit tikuruk di ndi yŭn, isa tana tatŭng.” Ka-i sawŭ jadi simŭnŭ.

¹⁰Ka Tapa kadŭn tana anŭ “Deyŭh,” ka piin adi mbŭh tikuruk Ayŭh kadŭn “Rawŭt.” Ka Tapa munos asŭng-I kiris anŭ adi mbŭh jadi.

¹¹Ka Tapa nang, “Isa-i tana piruah barang masam kayuh adi timbu di tana; anŭ adi bisa buān buwa adi bisirah, ka tŭngŭn tŭngŭn kayuh adi buān buwa.” Ka-i sawŭ jadi simŭnŭ.

¹²Ngapŭi tana piruah barang masam kayuh adi timbu di tana; Ka asŭng Tapa munos kiris anŭ adi mbŭh jadi.

¹³Jadi singumi andu ripuan ka isan isan nusak; anŭ inŭh andu adi taruh.

¹⁴Ka Tapa nang, “Isa jawa timbur di rangit ka nyidŭrŭ sandu so singarŭm ka kiren tipuh sinde andu, sawa, ka gawai adat[3] dog piguru.

¹⁵Ngara re nyirinyak di rangit yŭn nggen jawa di ong.” Ka-i sawŭ jadi simŭnŭ.

¹⁶Ka Tapa napa duwŭh tibande jawa anŭ: batŭh andu adi nguasa sandu, ka jawa buran adi nguasa ngarŭm; ayŭh napa gŭh sigara bitang bitang.

¹⁷Ka Tapa na ngara di rangit da nggen jawa di ong,

¹⁸bada nguasa sandu ngga ngarŭm, ka nyidŭrŭ jawa so karŭm. Ka Tapa munos asŭng-I kiris anŭ adi mbŭh jadi.

¹⁹Jadi singumi andu ripuan ka isan isan nusak, ka anŭ inŭh andu adi pat.

²⁰Ka Tapa nang, “Isa-i rawŭt brisi ngga bagŭ masam dāng adi udip, ka isa au-tarun brisi ngga dudu manuk.”

²¹Ngapŭi Tapa napa sigara dāng dāng-bās adi udip darŭm rawŭt, ka sigara dāng dāng adi kimitak darŭm piin ngga sigara manuk manuk. Ka Tapa munos asŭng-I kiris anŭ adi mbŭh jadi.

²²Ka Tapa nyiberkat ngara ka bada ngara adi udip darŭm piin papah ka bitambah bagŭ, ka ngisi rawŭt, ka bada gŭh sigara manuk papah bitambah bagŭ di darŭm ong.

²³Jadi singumi andu ripuan, ka isan isan nusak; anŭ inŭh andu adi rimŭh.

²⁴Ka Tapa nang, “Isa-i tana piruah barang masam pimudip dāng: dāng kudip ngga dāng tarun, adi baga ngga adi sŭ.” Ka-i sawŭ jadi simŭnŭ.

²⁵Tapa napa sopŭrŭg ngara anŭ, ka asŭng-I raru munos kiris ngara.

²⁶ Tapa nang, “Ja ata napa manusia; raŭn gayŭn ngara re brimun ngga jata. Ngara re nguasa iken, manuk, ngga sopŭrŭg dāng kudip ngga dāng tarun,[4] adi bās ngga adi sŭ.”

²⁷ Jadi Tapa napa manusia nunda gayŭn adŭp-I. Ayŭh napa ngara, dari ngga dayung.

²⁸Ka Tapa nyiberkat ngara ka nang di ngara, “Mira biranak meh angān ka papah, isa sesang ngan udip di ndi ong ong ka nguasa-i. Aku bada angān nguasa sopŭrŭg iken, manuk manuk, ngga sopŭrŭg dāng tarun.

²⁹Aku mbŭh nggen di angān barang masam ruwang kayuh ngga barang masam buwa kayuh jadi pinguman ngan;

³⁰pak yŭn sopŭrŭg dāng tarun, ngga sopŭrŭg manuk, Aku mbŭh nggen barang masam kupai ngga kayuh adi pidawŭn jadi pinguman ngara.” Ka-i sawŭ jadi simŭnŭ.

³¹Ka Tapa kiris barang masam kayuh adi-I mbŭh napa, ka asŭng-I mbŭh raru munos. Singumi andu ripuan, ka isan isan nusak. Anŭ inŭh andu adi nŭm.