Read Biatah Bidayuh TIBIRIK 11 Bible Online

TIBIRIK 11 - Biatah Bidayuh bible

TIBIRIK 11

¹Sibungas-i, bara daya di ndi ong ong biyŭn ndi piminyu ka pakai ndi masam bang bang piminyu.

²Darŭm ngara bigandon di tarun tana di timor, ngara ndŭg tarun tana rabak di Babylonia ka rŭŭ diginŭ.

³Ngara nang dupan adŭp ngara, “Ja ata ndai batuh batā! Ata badang-i da riang.” Jadi ngara biyŭn batuh batuh batā ka biyŭn gŭh tar ngga pirakat batuh batā anŭ.

⁴Ngara nang, “Ja ata ndai ndi kupo ngga tawā-i adi bigatung ndŭg rangit, isa ata tungang bada dŭn ta timagah ka dŭh re papar sasah di ndi ong ong.”

⁵Komŭnŭ TUHAN mūn di tingga kupo ngga tawā adi ngara ko ndai,

⁶ka nang, “Ngara ati, adi taŭn-i ndi bangsa daya adi minyu ndi masam piminyu; ati gi-sibungas kayuh adi ngara re ndai. Dŭh tui ngara re tungang ndai tadŭ tadŭ kayuh adi ngara raan!

⁷Ja ata mūn di ngarut piminyu ngara isa ngara dŭh mirati dingan-i.”

⁸Jadi TUHAN mesak ngara bada papar sasah di ndi ong ong ka ngara dŭh pijuu ndai kupo anŭ.

⁹Kupo anŭ dog kadŭn Babylon,[25] sabab diginŭ TUHAN ngarut piminyu sopŭrŭg daya, ka so nŭ Ayŭh mesak ngara bada papar sasah di ndi ong ong.

¹⁰Ati inŭh bara sesang Shem. Duwŭh sawa ripas uba bās anŭ, kan Shem mbŭh 100 sawa umbur-i, ayŭh biyŭn ndi anak dari dŭn Arpachshad.

¹¹Ripas anŭ, ayŭh udip 500 sawa dinge ka biyŭn anak anak adi bŭkŭn.

¹²Kan Arpachshad mbŭh 35 sawa umbur-i, ayŭh biyŭn ndi anak dari dŭn Shelah;

¹³ripas anŭ, ayŭh udip 403 sawa dinge ka biyŭn anak anak adi bŭkŭn.

¹⁴Kan Shelah mbŭh 30 sawa umbur-i, ayŭh biyŭn ndi anak dari dŭn Eber;

¹⁵ripas anŭ, ayŭh udip 403 sawa dinge ka biyŭn anak anak adi bŭkŭn.

¹⁶Kan Eber mbŭh 34 sawa umbur-i, ayŭh biyŭn ndi anak dari dŭn Peleg;

¹⁷ripas anŭ, ayŭh udip 430 sawa dinge ka biyŭn anak anak adi bŭkŭn.

¹⁸Kan Peleg mbŭh 30 sawa umbur-i, ayŭh biyŭn ndi anak dari dŭn Reu;

¹⁹ripas anŭ, ayŭh udip 209 sawa dinge ka biyŭn anak anak adi bŭkŭn.

²⁰Kan Reu mbŭh 32 sawa umbur-i, ayŭh biyŭn ndi anak dari dŭn Serug;

²¹ripas anŭ, ayŭh udip 207 sawa dinge ka biyŭn anak anak adi bŭkŭn.

²²Kan Serug mbŭh 30 sawa umbur-i, ayŭh biyŭn ndi anak dari dŭn Nahor;

²³ripas anŭ, ayŭh udip 200 sawa dinge ka biyŭn anak anak adi bŭkŭn.

²⁴Kan Nahor mbŭh 29 sawa umbur-i, ayŭh biyŭn ndi anak dari dŭn Terah;

²⁵ripas anŭ, ayŭh udip 119 sawa dinge ka biyŭn anak anak adi bŭkŭn.

²⁶Ripas Terah mbŭh 70 sawa umbur-i, ayŭh jadi sama Abram, Nahor, ka Haran.

²⁷Ati inŭh bara sesang Terah, adi sama Abram, Nahor, ka Haran. Haran inŭh sama Lot,

²⁸ka Haran kabŭs di kupo adŭp-i Ur di Babylon, darŭm sama-i gibabŭ udip.

²⁹Abram tambit Sarai ndu sawŭn, ka Nahor tambit Milcah, anak dayung Haran, adi gŭh sama Iscah.

³⁰Sarai Aboh

³¹Terah taban anak dari-i Abram, sukuh-i Lot, adi anak dari Haran, ka iban dayung-i Sarai, sawŭn Abram, ngga bu so kupo Ur di Babylonia di ka tana Canaan. Ngara bu jeh ka Haran ka rŭŭ diginŭ.

³²Terah kabŭs diginŭ kan umbur-i mbŭh 205 sawa.